"എൽഡിഎഫ് ഇല്ലെങ്കിൽ ഈ നാട് നശിച്ച് പോകും"; വോട്ട് രേഖപ്പെടുത്തി നടൻ വിനായകൻ

APRIL 9, 2026, 4:18 AM

നിയമസഭാ തിരഞ്ഞെടുപ്പിൽ വോട്ട് രേഖപ്പെടുത്താൻ നടൻ വിനായകൻ എത്തി. എറണാകുളം ഗാന്ധിനഗറിലെ മാതാനഗർ സ്കൂളിലെ പോളിങ് ബൂത്തിലാണ് താരം തന്റെ സമ്മതിദാനാവകാശം വിനിയോഗിച്ചത്. വോട്ട് ചെയ്ത ശേഷം മാധ്യമങ്ങളോട് സംസാരിക്കവെ, കേരളം നിലവിൽ നേരിടുന്നത് ഏറ്റവും നിർണ്ണായകമായ തിരഞ്ഞെടുപ്പാണെന്നും വളരെ പ്രശ്നകരമായ സാഹചര്യമാണ് നിലവിലുള്ളതെന്നും അദ്ദേഹം അഭിപ്രായപ്പെട്ടു.

ഇടതുപക്ഷ ജനാധിപത്യ മുന്നണിയുടെ പ്രസക്തിയെക്കുറിച്ച് വിനായകൻ വാചാലനായി. "എൽഡിഎഫ് ഇല്ലാതെ ഈ നാട്ടിൽ ഒരു പണിയും നടക്കില്ല. അല്ലാത്തപക്ഷം നാട് നശിച്ച് പോകും. സത്യമാണ് ഞാൻ പറയുന്നത്, എൽഡിഎഫ് ഇല്ലെങ്കിൽ ചിലർ ഈ നാട് കത്തിച്ചു കളയും എന്ന അവസ്ഥയാണ്," എന്ന് വിനായകൻ പ്രതികരിച്ചു. നാടിന്റെ നിലനിൽപ്പിന് എൽഡിഎഫ് അനിവാര്യമാണെന്ന ഉറച്ച നിലപാടാണ് അദ്ദേഹം പങ്കുവെച്ചത്.

അതേസമയം, സംസ്ഥാനത്ത് ഉച്ചയോടെ പോളിങ് ശതമാനം 46 കടന്നു. മധ്യകേരളത്തിലും പാലക്കാടും തുടക്കം മുതൽക്കേ കനത്ത പോളിങ്ങാണ് രേഖപ്പെടുത്തുന്നത്. വോട്ടിങ് മന്ദഗതിയിലായിരുന്ന തെക്കൻ ജില്ലകളിലും പകൽ പുരോഗമിക്കുന്തോറും പോളിങ് ശതമാനം ക്രമാനുഗതമായി ഉയരുന്നത് ശ്രദ്ധേയമാണ്.

രാവിലെ വോട്ടെടുപ്പ് ആരംഭിക്കുന്നതിന് മുൻപ് തന്നെ മിക്ക ബൂത്തുകളിലും വോട്ടർമാരുടെ വലിയ നിര തന്നെ കാണാമായിരുന്നു. നഗര-ഗ്രാമ ഭേദമില്ലാതെ പ്രായഭേദമന്യേ വോട്ടർമാർ കൂട്ടത്തോടെ എത്തിയതോടെ രാവിലെ എട്ട് മണിയോടെ തന്നെ വോട്ടെടുപ്പ് ദ്രുതഗതിയിലായി.

കടുത്ത രാഷ്ട്രീയ പോരാട്ടം നടക്കുന്ന മണ്ഡലങ്ങളിൽ പോളിങ് ശതമാനം കുത്തനെ ഉയരുന്നത് മുന്നണികളെ ഒരുപോലെ ആവേശത്തിലാഴ്ത്തുന്നുണ്ട്. വൈകുന്നേരത്തോടെ പോളിങ് റെക്കോർഡ് വേഗത്തിൽ എത്തുമെന്നാണ് നിലവിലെ കണക്കുകൾ സൂചിപ്പിക്കുന്നത്.