ബാങ്ക് ഓഫ് ഇന്ത്യയുടെ പേരില്‍ വൻ വാട്ട്‌സ്ആപ്പ് തട്ടിപ്പ്; പാലക്കാട് സ്വദേശിക്ക് അക്കൗണ്ടില്‍ നിന്നും നഷ്ടമായത് മുപ്പതിനായിരം രൂപ

JULY 12, 2025, 1:30 AM

പാലക്കാട്: ബാങ്ക് ഓഫ് ഇന്ത്യയുടെ പേരില്‍ വൻ വാട്ട്‌സ്ആപ്പ് തട്ടിപ്പ്. വാട്ട്‌സ്ആപ്പില്‍ ലഭിച്ച സന്ദേശം തുറന്നതോടെ അക്കൗണ്ടില്‍ നിന്നും പണം നഷ്ടമായെന്നാണ് പുറത്തു വരുന്ന പരാതി. പാലക്കാട് പൊല്‍പ്പളളി സ്വദേശിക്കാണ് മുപ്പതിനായിരം രൂപ നഷ്ടമായത്.

കെവൈസി അപ്‌ഡേറ്റ് ചെയ്തില്ലെങ്കില്‍ അക്കൗണ്ട് മരവിപ്പിക്കുമെന്ന സന്ദേശത്തോടൊപ്പം ലഭിച്ച ഡോക്യുമെന്റ് തുറന്നപ്പോഴാണ് പണം നഷ്ടമായതെന്നാണ് പരാതിക്കാരന്‍ വ്യക്തമാക്കുന്നത്. എടിഎം പിന്‍ ആവശ്യപ്പെട്ട് തട്ടിപ്പുകാര്‍ ഫോണില്‍ ബന്ധപ്പെട്ടിരുന്നുവെന്നും പൊല്‍പളളി സ്വദേശി വ്യക്തമാക്കി.

അതേസമയം ആറ് തവണയായാണ് മുപ്പതിനായിരം രൂപ നഷ്ടമായത്. ആരാണ് തട്ടിപ്പുകാരെന്നോ എവിടേക്കാണ് തട്ടിയെടുത്ത പണം പോയതെന്നോ വ്യക്തമല്ല. പൊലീസിലും സൈബര്‍ സെല്ലിലും പരാതി നല്‍കിയിട്ടുണ്ട് എന്നും പരാതിക്കാരൻ വ്യക്തമാക്കി.