മയോണൈസിന് ഒരു വർഷത്തെ വിലക്ക്

APRIL 23, 2025, 11:06 PM

ചെന്നൈ: മയോണൈസ് നിരോധിച്ച് വിജ്ഞാപനമിറക്കി തമിഴ്നാട് സർക്കാർ. ഒരു വർഷത്തേക്കാണ് നിരോധനം.

പച്ച മുട്ടകളിൽ നിന്ന് മയോണൈസ് ഉണ്ടാക്കുന്നതും സംഭരിക്കുന്നതും വിൽക്കുന്നതും നിരോധിച്ചാണ് സർക്കാർ വിജ്ഞാപനമിറക്കിയത്. ഗുരുതര ആരോഗ്യ പ്രശ്നങ്ങൾക്ക് കാരണമാകുന്നുവെന്ന കണ്ടെത്തലിനെ തുടർന്നാണ് നടപടി.

മയോണൈസ് തയ്യാറാക്കുന്നതിലെ അപാകതയും സംഭരണത്തിലെ അപാകതയും ഉൾപ്പെടെയുള്ള ഘടകങ്ങൾ കാരണം പൊതുജനാരോഗ്യത്തിന് കാര്യമായ അപകടസാധ്യതയുണ്ടെന്ന് റിപ്പോർട്ട് ചെയ്യപ്പെട്ടിട്ടുണ്ട്.

ഇക്കാരണത്താൽ, 2006 ലെ ഭക്ഷ്യസുരക്ഷാ നിലവാര നിയമത്തിലെ സെക്ഷൻ 30 (2) (എ) പ്രകാരം മുട്ടയിൽ നിന്ന് നിർമ്മിച്ച മയോണൈസ് ഒരു വർഷത്തേക്ക് നിരോധിച്ചുകൊണ്ട് തമിഴ്‌നാട് സർക്കാർ ഉത്തരവിട്ടു.

മുട്ടയുടെ മഞ്ഞക്കരു, സസ്യ എണ്ണ, വിനാഗിരി തുടങ്ങിയവ ചേർത്തുണ്ടാക്കുന്ന മയോണൈസിൽ നിന്ന് ഭക്ഷ്യവിഷബാധയ്ക്കുള്ള സാധ്യത കൂടുതലാണെന്ന് ഭക്ഷ്യസുരക്ഷാ അഡ്മിനിസ്ട്രേഷൻ കമ്മീഷണർ ആർ ലാൽവേന പുറത്തിറക്കിയ വിജ്ഞാപനത്തിൽ പറയുന്നു.