ഇന്റർകാസ്റ്റ് വിവാഹത്തെച്ചൊല്ലി കുടുംബത്തിൽ തർക്കം; യുവദമ്പതികൾ ജീവനൊടുക്കി

APRIL 3, 2026, 10:55 PM

ഹൈദരാബാദ്: തെലങ്കാനയിലെ സിദ്ദിപ്പേട്ട് ജില്ലയിൽ ഇന്റർകാസ്റ്റ് വിവാഹത്തെച്ചൊല്ലിയുള്ള കുടുംബതർക്കത്തെത്തുടർന്ന് യുവദമ്പതികൾ ജീവനൊടുക്കി. അനുമുല രാകേഷ് റെഡ്ഡി (25), ഭാര്യ തരിഗോപ്പുല ഹരിക (22) എന്നിവരാണ് മരിച്ചത്. പ്രണയിച്ചു വിവാഹം കഴിച്ച ഇരുവരും ഹൈദരാബാദിൽ താമസിച്ചു വരികയായിരുന്നു. മൂന്ന് മാസം മുൻപാണ് ഇവർ നാട്ടിലേക്ക് തിരിച്ചെത്തിയത്.

ഹരിക മറ്റൊരു ജാതിയിൽപ്പെട്ട പെൺകുട്ടിയായതിനാൽ രാകേഷിന്റെ മാതാപിതാക്കൾ വിവാഹം അംഗീകരിച്ചിരുന്നില്ല. ഇത് ദമ്പതികളെ വലിയ മാനസിക വിഷമത്തിലാക്കിയിരുന്നു. മാർച്ച് 28-ന് രാകേഷ് കീടനാശിനി കഴിച്ച് ആത്മഹത്യയ്ക്ക് ശ്രമിച്ചു. ചികിത്സയിലിരിക്കെ മാർച്ച് 30-ന് മരണം സംഭവിച്ചു. ഭർത്താവിന്റെ മരണവാർത്ത അറിഞ്ഞതിന് പിന്നാലെ ഏപ്രിൽ 2-ന് ഹരികയും ജീവനൊടുക്കുകയായിരുന്നു.

നേരത്തെ ഹരിക ആത്മഹത്യയ്ക്ക് ശ്രമിച്ചപ്പോൾ പൊലീസ് ഇടപെട്ട് കൗൺസിലിംഗ് നൽകിയിരുന്നു. ഇതിനെത്തുടർന്ന് രാകേഷിന്റെ മാതാപിതാക്കൾ വിവാഹത്തിന് അന്ന് വിമുഖതയോടെ സമ്മതിച്ചിരുന്നതായും ഉദ്യോഗസ്ഥർ പറഞ്ഞു.

ദമ്പതികളുടെ മരണവാർത്ത പുറത്തുവരുന്നതിനിടെ, രാജ്യത്തെ ഇന്റർകാസ്റ്റ്‌ വിവാഹങ്ങളെക്കുറിച്ചുള്ള ഇന്ത്യാ ടുഡേ ജിഡിബി (2025) സർവേ റിപ്പോർട്ടും ചർച്ചയാവുകയാണ്. സർവേയിൽ പങ്കെടുത്ത 56 ശതമാനം ഇന്ത്യക്കാരും അന്തർജാതി വിവാഹങ്ങളെ എതിർക്കുന്നു.

ഉത്തർപ്രദേശിൽ 84 ശതമാനം പേരും ഇത്തരം വിവാഹങ്ങളെ എതിർക്കുമ്പോൾ, ചണ്ഡീഗഡിൽ 91 ശതമാനം പേരും വിവാഹങ്ങളെ പിന്തുണയ്ക്കുന്നവരാണ്. രാജസ്ഥാൻ, കർണാടക, ഹരിയാന തുടങ്ങിയ സംസ്ഥാനങ്ങൾ ഇത്തരം വിവാഹങ്ങളെ പ്രോത്സാഹിപ്പിക്കാൻ പ്രത്യേക പദ്ധതികൾ നടപ്പിലാക്കുന്നുണ്ട്. ദളിത് വിഭാഗത്തിൽപ്പെട്ടവരുമായുള്ള വിവാഹങ്ങൾക്ക് കേന്ദ്രസർക്കാരും സാമ്പത്തിക സഹായം നൽകിവരുന്നു.