ന്യൂഡെല്‍ഹി: ഡെല്‍ഹി ഹൈക്കോടതി ജഡ്ജി ജസ്റ്റിസ് യശ്വന്ത് വര്‍മ്മയുടെ വീട്ടില്‍ നിന്ന് വന്‍തോതില്‍ പണം കണ്ടെടുത്ത കേസില്‍ എഫ്ഐആര്‍ രജിസ്റ്റര്‍ ചെയ്യണമെന്ന് ആവശ്യപ്പെട്ടുള്ള ഹര്‍ജി സുപ്രീം കോടതി വെള്ളിയാഴ്ച തള്ളി. ചീഫ് ജസ്റ്റിസ് രൂപീകരിച്ച ജഡ്ജിമാരുടെ ഒരു പാനല്‍ ഈ വിഷയം അന്വേഷിക്കുന്നുണ്ടെന്നും അന്വേഷണം അവസാനിച്ച ശേഷം എഫ്ഐആര്‍ രജിസ്റ്റര്‍ ചെയ്യുന്നതിനെക്കുറിച്ച് തീരുമാനമെടുക്കുമെന്നും സുപ്രീം കോടതി പറഞ്ഞു.

'ആഭ്യന്തര അന്വേഷണം തുടരുകയാണ്. റിപ്പോര്‍ട്ടില്‍ എന്തെങ്കിലും തെറ്റ് കണ്ടാല്‍, എഫ്ഐആര്‍ സമര്‍പ്പിക്കാം അല്ലെങ്കില്‍ വിഷയം പാര്‍ലമെന്റിന് റഫര്‍ ചെയ്യാം. ഈ ഘട്ടത്തില്‍, ഈ റിട്ട് ഹര്‍ജി പരിഗണിക്കുന്നത് ഉചിതമല്ല,' ജസ്റ്റിസുമാരായ അഭയ് എസ് ഓക്ക, ഉജ്ജല്‍ ഭൂയാന്‍ എന്നിവരടങ്ങിയ ബെഞ്ച് പറഞ്ഞു.

ആഭ്യന്തര അന്വേഷണത്തെയും ചോദ്യം ചെയ്യുന്ന ഹര്‍ജി അകാലത്തില്‍ നല്‍കപ്പെട്ടതാണെന്ന് കോടതി പറഞ്ഞു. സംഭവം നടന്ന് ഒരാഴ്ച കഴിഞ്ഞിട്ടും അറസ്റ്റുകളോ പിടിച്ചെടുക്കലുകളോ ഉണ്ടായിട്ടില്ലെന്ന് മാത്യൂസ് നെടുമ്പാറ, ഹേമാലി സുരേഷ് കുര്‍ണെ എന്നീ രണ്ട് അഭിഭാഷകര്‍ സമര്‍പ്പിച്ച ഹര്‍ജിയില്‍ ചൂണ്ടിക്കാട്ടി.

കോടതിയുടെ ആഭ്യന്തര സമിതി ഒരു 'നിയമപരമായ അധികാരി' അല്ലെന്നും അതിനാല്‍ പ്രത്യേക ഏജന്‍സികള്‍ക്ക് പകരമാകാന്‍ കഴിയില്ലെന്നും അഭിഭാഷകര്‍ പറഞ്ഞു. കേരളത്തില്‍ ഹൈക്കോടതി ജഡ്ജിക്കെതിരെ പോക്‌സോ കുറ്റം ചുമത്തിയെങ്കിലും പോലീസ് എഫ്ഐആര്‍ രജിസ്റ്റര്‍ ചെയ്തില്ലെന്ന് അഭിഭാഷകര്‍ ചൂണ്ടിക്കാട്ടി. അന്വേഷണം നടത്തുന്നത് കോടതിയുടെ ജോലിയല്ലെന്നും അത് പോലീസിന് വിടണമെന്നും ഹര്‍ജിക്കാര്‍ പറഞ്ഞു.

ആഭ്യന്തര സമിതിയുടെ റിപ്പോര്‍ട്ടിന് ശേഷം, എല്ലാ വഴികളും തുറന്നിരിക്കുന്നെന്നും ഹര്‍ജി അകാലത്തില്‍ സമര്‍പ്പിച്ചതാണെന്നും ഇതിനോട് കോടതി പ്രതികരിച്ചു.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്