4 വർഷം കഴിഞ്ഞാലും അഗ്നിവീരന്മാരെ സൈന്യത്തിൽ നിലനിർത്തണം; പരിധി ഉയർത്താൻ കര, നാവിക, വ്യോമസേനകൾ

JULY 5, 2026, 10:40 PM

ന്യൂഡൽഹി: അഗ്നിപഥ് പദ്ധതിപ്രകാരം നാല് വർഷത്തെ സേവനം പൂർത്തിയാക്കുന്ന അഗ്നിവീരന്മാരെ സൈന്യത്തിൽ നിലനിർത്തുന്നതിനുള്ള പരിധി ഉയർത്താൻ ഇന്ത്യൻ സായുധ സേനകൾ ആലോചിക്കുന്നു.

നാവികസേന 75 ശതമാനം വരെ അഗ്നിവീരന്മാരെ സ്ഥിരപ്പെടുത്താൻ ആവശ്യപ്പെടുമ്പോൾ, കരസേനയും വ്യോമസേനയും ഇത് 50 ശതമാനമായി ഉയർത്താനാണ് നീക്കം നടത്തുന്നത്. നിലവിലെ നിയമപ്രകാരം, 4 വർഷത്തെ സേവനത്തിന് ശേഷം യോഗ്യതയുടെയും സൈന്യത്തിന്റെ ആവശ്യകതയുടെയും അടിസ്ഥാനത്തിൽ വെറും 25 ശതമാനം അഗ്നിവീരന്മാർക്ക് മാത്രമാണ് സ്ഥിരനിയമനം നൽകാൻ വ്യവസ്ഥയുള്ളത്.

2023-ന്റെ തുടക്കത്തിൽ പരിശീലനം ആരംഭിച്ച ആദ്യ ബാച്ച് അഗ്നിവീരന്മാരുടെ 4 വർഷത്തെ കാലാവധി ഈ വർഷം അവസാനത്തോടെ പൂർത്തിയാകാനിരിക്കെയാണ് സേനാവിഭാഗങ്ങളുടെ ഭാഗത്തുനിന്നും ഈ നീക്കം.

'ദി ഇന്ത്യൻ എക്സ്പ്രസ്' റിപ്പോർട്ട് അനുസരിച്ച്, ആധുനിക ആയുധങ്ങളും അത്യാധുനിക സൈനിക സാങ്കേതികവിദ്യകളും കൈകാര്യം ചെയ്യാൻ പരിചയസമ്പന്നരായ സൈനികരുടെ എണ്ണം കൂട്ടേണ്ടത് അത്യാവശ്യമാണെന്നാണ് മൂന്ന് സേനാവിഭാഗങ്ങളും വിശ്വസിക്കുന്നത്. ആദ്യ ബാച്ചുകൾ പുറത്തിറങ്ങുമ്പോൾ അവരിൽ ഭൂരിഭാഗത്തെയും ഒഴിവാക്കുന്നത് സൈന്യത്തിന്റെ സുഗമമായ പ്രവർത്തനത്തെ ബാധിച്ചേക്കാം.

ഈ നിർദ്ദേശം പ്രതിരോധ മന്ത്രാലയത്തിന് കീഴിലുള്ള ഡിപ്പാർട്ട്മെന്റ് ഓഫ് മിലിട്ടറി അഫയേഴ്സുമായി (DMA) സേനാ മേധാവികൾ ഉടൻ ചർച്ച ചെയ്യും. സർക്കാർ പൊതുവായ 25 ശതമാനം എന്ന പരിധിയിൽ മാറ്റം വരുത്തിയില്ലെങ്കിൽ പോലും, ഉയർന്ന സാങ്കേതിക വൈദഗ്ധ്യം ആവശ്യമുള്ള പ്രത്യേക സൈനിക വിഭാഗങ്ങളിൽ കൂടുതൽ അഗ്നിവീരന്മാരെ സ്ഥിരപ്പെടുത്തുന്ന കാര്യവും പരിഗണനയിലുണ്ട്.

ഉദാഹരണത്തിന്, ഡ്രോൺ സാങ്കേതികവിദ്യയും ആധുനിക യുദ്ധമുറകളും കൈകാര്യം ചെയ്യാൻ ഇന്ത്യൻ കരസേന പുതുതായി രൂപീകരിച്ച 'ഭൈരവ്' ലൈറ്റ് കമാൻഡോ ബറ്റാലിയനുകളിൽ ഇത്തരത്തിൽ കൂടുതൽ പരിചയസമ്പന്നരായ അഗ്നിവീരന്മാരെ സ്ഥിരമായി നിയമിച്ചേക്കാം. മുൻപ് ഇത്തരമൊരു നിർദ്ദേശം ഡിഎംഎയ്ക്ക് അയച്ചിരുന്നെങ്കിലും പുനഃപരിശോധനയ്ക്കായി അത് തിരിച്ചയച്ചിരുന്നു. നിലവിൽ ഈ നിർദ്ദേശങ്ങളെക്കുറിച്ച് മൂന്ന് സേനാവിഭാഗങ്ങളും ഔദ്യോഗികമായി പ്രതികരിച്ചിട്ടില്ല.