ലക്‌നൗ: വിഡി സവര്‍ക്കറെ അപമാനിച്ച സംഭവത്തില്‍ സമന്‍സ് റദ്ദാക്കണമെന്നാവശ്യപ്പെട്ട് ലോക്സഭാ പ്രതിപക്ഷ നേതാവ് രാഹുല്‍ ഗാന്ധി നല്‍കിയ ഹര്‍ജി അലഹബാദ് ഹൈക്കോടതി തള്ളി. വിഡി സവര്‍ക്കര്‍ മാനനഷ്ടക്കേസ് ഇപ്പോള്‍ ലഖ്നൗവിലെ അഡീഷണല്‍ ചീഫ് ജുഡീഷ്യല്‍ മജിസ്ട്രേറ്റ് കോടതിയുടെ പരിഗണനയിലാണ്. ഹര്‍ജിയുമായി രാഹുലിന് വേണമെങ്കില്‍ ലക്‌നൗ കോടതിയെ സമീപിക്കാമെന്ന് ജസ്റ്റിസ് സുഭാഷ് വിദ്യാര്‍ത്ഥി വ്യക്തമാക്കി.

കഴിഞ്ഞ വര്‍ഷം ഡിസംബറില്‍ പ്രതി ചേര്‍ത്ത് സമന്‍സ് അയച്ച കീഴ്ക്കോടതിയുടെ ഉത്തരവിനെതിരെ രാഹുല്‍ ഗാന്ധി ഹൈക്കോടതിയെ സമീപിച്ചിരുന്നു. കൂടാതെ, അഭിഭാഷകന്‍ നൃപേന്ദ്ര പാണ്ഡെ സമര്‍പ്പിച്ച പുനഃപരിശോധനാ ഹര്‍ജി അനുവദിച്ച സെഷന്‍സ് കോടതി വിധിയെ അദ്ദേഹം എതിര്‍ത്തു. 

കോണ്‍ഗ്രസ് നേതാവിന്റെ പ്രസംഗം സമൂഹത്തില്‍ വിദ്വേഷം പ്രചരിപ്പിച്ചതായി കോടതി കണ്ടെത്തിയതിനെത്തുടര്‍ന്ന് ഡിസംബറില്‍ അദ്ദേഹത്തെ വിളിച്ചുവരുത്തിയിരുന്നു. ഭാരത് ജോഡോ യാത്രക്കിടെ നടത്തിയ പത്രസമ്മേളനത്തില്‍, സവര്‍ക്കര്‍ ബ്രിട്ടീഷുകാരുടെ സേവകനാണെന്നും അവരില്‍ നിന്ന് പെന്‍ഷന്‍ കൈപ്പറ്റിയിരുന്നെന്നും രാഹുല്‍ അവകാശപ്പെട്ടിരുന്നു. 

''രാഹുല്‍ ഗാന്ധി സമൂഹത്തില്‍ വിദ്വേഷവും വിദ്വേഷവും പ്രചരിപ്പിച്ചുകൊണ്ട് രാജ്യത്തിന്റെ അടിസ്ഥാന സ്വഭാവസവിശേഷതകളെ ദുര്‍ബലപ്പെടുത്തുകയും അപമാനിക്കുകയും ചെയ്തുവെന്ന് തെളിഞ്ഞു,'' എന്നാണ് ലഖ്നൗ അഡീഷണല്‍ സിവില്‍ ജഡ്ജി അലോക് വര്‍മ്മ തന്റെ ഡിസംബറിലെ ഉത്തരവില്‍ പറഞ്ഞത്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്