ഗാസ തുരങ്കത്തിൽ ബന്ദിയെ മരിച്ച നിലയിൽ കണ്ടെത്തി; രണ്ടാമത്തെ ബന്ദിയുടെ കാര്യത്തിൽ കടുത്ത ആശങ്കകൾ എന്ന് ഇസ്രായേൽ സൈന്യം

JANUARY 8, 2025, 7:06 PM

തെക്കൻ ഗാസയിലെ തുരങ്കത്തിൽ നിന്ന് ബന്ദിയാക്കപ്പെട്ടയാളുടെ മൃതദേഹം ബുധനാഴ്ച കണ്ടെടുത്തതായി വ്യക്തമാക്കി ഇസ്രായേൽ സൈന്യം. 2023 ഒക്ടോബർ 7 ന് ഇസ്രയേലിനെതിരായ ഹമാസ് ആക്രമണത്തിനിടെ തട്ടിക്കൊണ്ടുപോയ യൂസഫ് അൽ സിയാദ്നയെ (53) റാഫ മേഖലയിലെ ഒരു തുരങ്കത്തിൽ മരിച്ച നിലയിൽ കണ്ടെത്തിയതായി ഇസ്രായേൽ പ്രതിരോധ സേനയുടെ പ്രസ്താവനയിൽ പറയുന്നു.

യൂസഫ് അൽ സിയാദ്ന "തടങ്കലിൽ കൊല്ലപ്പെട്ടു" എന്ന് ഐഡിഎഫ് പറഞ്ഞു, കുറഞ്ഞത് രണ്ട് ഹമാസ് പ്രവർത്തകരുടെ മൃതദേഹങ്ങൾ സമീപത്ത് കണ്ടെത്തിയതായും അധികൃതർ സ്ഥിരീകരിച്ചു.

മരണത്തിൻ്റെ സാഹചര്യങ്ങളെക്കുറിച്ച് ഞങ്ങൾ ഇപ്പോൾ അന്വേഷിക്കുകയാണെന്ന് ഐഡിഎഫിൻ്റെ അന്താരാഷ്ട്ര വക്താവ് നദവ് ശോഷാനി പറഞ്ഞു.

തെക്കൻ ഇസ്രായേലിലെ നെഗേവ് മരുഭൂമിയിൽ താമസിക്കുന്ന ബദൂയിൻ മുസ്ലീം-അറബ് സമൂഹത്തിൻ്റെ ഭാഗമാണ് അൽ-സിയാദ്ന കുടുംബം. അൽ-സിയാദ്‌നയും അദ്ദേഹത്തിൻ്റെ മൂന്ന് മക്കളും - ഹംസ, ബിലാൽ, ആയിഷ എന്നിവർ തെക്കുപടിഞ്ഞാറൻ ഇസ്രായേലിലെ കിബ്ബത്ത്സ് ഹോളിറ്റിലാണ് ജോലി ചെയ്തിരുന്നത്. 2023 നവംബറിലെ ഹ്രസ്വകാല വെടിനിർത്തൽ കരാറിൽ തിരിച്ചെത്തിയ ഡസൻ കണക്കിന് ബന്ദികളിൽ ബിലാലും ആയിഷയും ഉൾപ്പെടുന്നു. എന്നാൽ ഹംസ എവിടെയെന്ന് അജ്ഞാതമായി തുടരുന്നു.

അതേസമയം ഗാസയിൽ ഇപ്പോൾ 99 ബന്ദികളുണ്ടെന്ന് ഇസ്രായേൽ അധികൃതർ വിശ്വസിക്കുന്നു, ഭൂരിഭാഗവും 2023 ഒക്ടോബർ 7 ന് ഹമാസിൻ്റെ അതിർത്തി കടന്നുള്ള ആക്രമണങ്ങളിൽ 1,200 ൽ അധികം ആളുകൾ കൊല്ലപ്പെടുകയും 250 ബന്ദികളാക്കപ്പെടുകയും ചെയ്തവരാണ്. ഗാസയിൽ ബന്ദികളാക്കിയവരിൽ ഡസൻ കണക്കിന് പേർ മരിച്ചതായി കരുതപ്പെടുന്നു.

ബന്ദിയാക്കപ്പെടുന്നതിന് മുമ്പ് അൽ സിയാദ്‌ന 17 വർഷത്തോളം കിബ്ബട്ട്‌സ് ഹോളിറ്റിലെ ഡയറി ഫാമിൽ ജോലി ചെയ്തിരുന്നു. "സംഭാഷണവും മനുഷ്യബന്ധവുമുള്ള ഒരാളായിരുന്നു, കുടുംബത്തിൻ്റെ ശക്തിയുടെ സ്തംഭം, അവൻ സമൂഹത്തിൽ സ്വാധീനമുള്ള വ്യക്തിയായിരുന്നു," എന്ന് ബന്ദിയാക്കപ്പെട്ട കുടുംബങ്ങളുടെ ഫോറം ബുധനാഴ്ച പ്രസ്താവനയിൽ പറഞ്ഞു.

അൽ-സിയാദ്‌ന കുടുംബത്തിന് "വിനാശകരമായ വാർത്ത ലഭിച്ചു", "ഹംസയുടെ വിധിയിൽ അഗാധമായ ഉത്കണ്ഠയിലാണ്" എന്ന് ഇസ്രായേൽ പ്രസിഡൻ്റ് ഐസക് ഹെർസോഗ് പറഞ്ഞു.

രാജ്യത്തിൻ്റെ പ്രധാനമന്ത്രി ബെഞ്ചമിൻ നെതന്യാഹു സംഭവത്തിൽ തൻ്റെ "അഗാധമായ ദുഃഖം" പ്രകടിപ്പിച്ചു, "ഞങ്ങളുടെ എല്ലാ ബന്ദികളെയും ജീവിച്ചിരിക്കുന്നവരെയും മരിച്ചവരെയും തിരികെ കൊണ്ടുവരാൻ എല്ലാ ശ്രമങ്ങളും തുടരുമെന്ന്" അദ്ദേഹം പ്രതിജ്ഞയെടുത്തു.

അതേസമയം വെടിനിർത്തൽ കരാറിന് വേണ്ടിയുള്ള ബന്ദികളെ സംബന്ധിച്ച് ഇസ്രയേലും ഹമാസും ഖത്തറിൽ പരോക്ഷ ചർച്ചകൾ തുടരുകയാണ്. മാസങ്ങളായി ചർച്ചകൾ മുടങ്ങിക്കിടക്കുകയാണ്.