'നീചമായ നുണകള്‍': ഭക്ഷണത്തിനായി കാത്തിരിക്കുന്ന പാലസ്തീനികളെ വെടിവയ്ക്കാന്‍ ഉത്തരവിട്ടെന്ന റിപ്പോര്‍ട്ട് തള്ളി ഇസ്രായേല്‍ സേന

JUNE 27, 2025, 7:14 PM

ടെല്‍ അവീവ്: ഗാസയില്‍ മാനുഷിക സഹായത്തിനായി കാത്തിരിക്കുന്ന നിരായുധരായ പാലസ്തീനികളെ വെടിവയ്ക്കാന്‍ സൈനികര്‍ ഉത്തരവിട്ടതായുള്ള റിപ്പോര്‍ട്ട് ഇസ്രായേല്‍ സൈന്യം നിഷേധിച്ചു. സമീപ ആഴ്ചകളില്‍ ഭക്ഷ്യ വിതരണ കേന്ദ്രങ്ങളെ സമീപിക്കുന്നതിനിടെ നൂറുകണക്കിന് ആളുകള്‍ കൊല്ലപ്പെട്ടതായുള്ള റിപ്പോര്‍ട്ടുകള്‍ പുറത്തുവന്നിരുന്നു.

സഹായ കേന്ദ്രങ്ങളെ സമീപിക്കുന്ന പാലസ്തീന്‍ ജനക്കൂട്ടത്തിന് നേരെ വെടിവയ്ക്കാന്‍ ഗാസയിലെ ഇസ്രായേലി സൈനികര്‍ക്ക് അവരുടെ കമാന്‍ഡര്‍മാര്‍ നിര്‍ദ്ദേശം നല്‍കിയതായി വെള്ളിയാഴ്ച ഹാരെറ്റ്‌സ് ദിനപത്രത്തിലെ ഒരു ലേഖനത്തില്‍ പറഞ്ഞിരുന്നു.

സഹായ കേന്ദ്രങ്ങളിലേക്കുള്ള സമീപന വഴികളിലെ മരണങ്ങളെ 'കൊലപാതകം' എന്നാണ് ഹാരെറ്റ്‌സുമായി അജ്ഞാതമായി സംസാരിച്ച ഒരു സൈനികന്‍ വിശേഷിപ്പിച്ചതെന്ന് റിപ്പോര്‍ട്ടില്‍ പറയുന്നു. അടിയന്തര ഭീഷണി ഇല്ലെങ്കില്‍ പോലും ഇസ്രായേല്‍ സൈന്യം വെടിവയ്ക്കുന്നു. ലേഖനം അനുസരിച്ച്, ഇസ്രായേല്‍ സൈന്യം അടുത്തിടെ പീരങ്കി ഷെല്ലുകള്‍ ഉപയോഗിച്ച് ജനക്കൂട്ടത്തെ പിരിച്ചുവിടാന്‍ തുടങ്ങിയത് മരണസംഖ്യ കുത്തനെ വര്‍ദ്ധിപ്പിച്ചുവെന്ന് പറയുന്നു.

ലേഖനത്തില്‍ ഉന്നയിച്ച ആരോപണം ഞങ്ങള്‍ ശക്തമായി നിരസിക്കുന്നു. വിതരണ കേന്ദ്രങ്ങളെ സമീപിക്കുന്നവര്‍ ഉള്‍പ്പെടെ സാധാരണക്കാര്‍ക്ക് നേരെ മനഃപൂര്‍വ്വം വെടിവയ്ക്കാന്‍ ഐഡിഎഫ് സേനയോട് നിര്‍ദ്ദേശിച്ചിട്ടില്ലെന്ന് ഇസ്രായേല്‍ പ്രതിരോധ സേന (ഐഡിഎഫ്) ലേഖനത്തിന് മറുപടിയായി പറഞ്ഞു. വ്യക്തമായി പറഞ്ഞാല്‍, ഐഡിഎഫ് നിര്‍ദ്ദേശങ്ങള്‍ സിവിലിയന്മാര്‍ക്കെതിരായ ബോധപൂര്‍വമായ ആക്രമണങ്ങളെ വിലക്കുന്നുവെന്നും കൂട്ടിച്ചേര്‍ത്തു.

ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹുവും പ്രതിരോധ മന്ത്രി ഇസ്രായേല്‍ കാറ്റ്സും ഈ റിപ്പോര്‍ട്ട് തള്ളിക്കളഞ്ഞു. ലോകത്തിലെ ഏറ്റവും ധാര്‍മ്മിക സൈന്യമായ ഐഡിഎഫിനെ അപകീര്‍ത്തിപ്പെടുത്താന്‍ രൂപകല്‍പ്പന ചെയ്ത നീചമായ നുണകള്‍ എന്ന് അവര്‍ റിപ്പോര്‍ട്ടിനെതിരെ പ്രതികരിച്ചത്. മെയ് 27 മുതല്‍ സഹായ കേന്ദ്രങ്ങളെയോ സഹായവുമായി വരുന്ന ട്രക്കുകളെയോ സമീപിച്ചപ്പോള്‍ 500 ലധികം പാലസ്തീനികള്‍ കൊല്ലപ്പെട്ടതായി പലസ്തീന്‍ ആരോഗ്യ മന്ത്രാലയം അറിയിച്ചു. സഹായ കേന്ദ്രങ്ങളിലേക്ക് അടുക്കുമ്പോള്‍ പാലസ്തീനികള്‍ ദിവസേന ആക്രമണത്തിന് ഇരയാകുന്നുണ്ടെന്ന് ആരോഗ്യ ഉദ്യോഗസ്ഥര്‍ പറഞ്ഞു.