മാരിൻലാൻഡിലെ സമുദ്രജീവികൾക്ക് രക്ഷാകേന്ദ്രം; തിമിംഗലങ്ങളെ യുഎസിലേക്കും സ്പെയിനിലേക്കും മാറ്റാൻ അനുമതി

JUNE 3, 2026, 9:48 PM

ടൊറന്റോ: കാനഡയിലെ ഒന്റാറിയോയിൽ പ്രവർത്തനം നിർത്തിയ പ്രമുഖ തീം പാർക്കായ മാരിൻലാൻഡിലെ അവശേഷിക്കുന്ന തിമിംഗലങ്ങളെയും ഡോൾഫിനുകളെയും അമേരിക്കയിലെയും സ്പെയിനിലെയും അക്വേറിയങ്ങളിലേക്ക് മാറ്റാനുള്ള പദ്ധതിക്ക് കനേഡിയൻ സർക്കാർ അംഗീകാരം നൽകി.

ഇതോടെ, പാർക്ക് പൂട്ടിയതിനെത്തുടർന്ന് ഈ സമുദ്രജീവികൾ നേരിട്ടിരുന്ന കൂട്ടക്കൊല ഭീഷണിക്ക് താൽക്കാലിക പരിഹാരമായിരിക്കുകയാണ്. നയാഗ്രക്ക് സമീപമുള്ള ഈ പാർക്കിൽ നിലവിൽ 30 ബെലുഗ തിമിംഗലങ്ങളും നാല് ഡോൾഫിനുകളുമാണുള്ളത്.

2023-ന്റെ തുടക്കത്തിൽ പാർക്ക് വിൽപ്പനയ്ക്ക് വെച്ചിരിക്കുകയാണെന്ന് അധികൃതർ അറിയിക്കുകയും 2024 വേനൽക്കാലത്തോടെ ഇത് പൂർണ്ണമായി പൂട്ടുകയും ചെയ്തിരുന്നു. മൂന്ന് കറുത്ത കരടികളെ പരിപാലിക്കുന്നതിൽ വീഴ്ച വരുത്തിയതിന് ഒന്റാറിയോയിലെ മൃഗസംരക്ഷണ നിയമപ്രകാരം 2024-ൽ മാരിൻലാൻഡ് കുറ്റക്കാരാണെന്ന് കണ്ടെത്തിയിരുന്നു.

കൂടാതെ, പ്രവിശ്യാ സർക്കാരിന്റെ ഔദ്യോഗിക രേഖകൾ പ്രകാരം 2019 മുതൽ ഇതുവരെ 20 തിമിംഗലങ്ങളാണ് ഈ പാർക്കിൽ ചത്തത്. ഇത് വലിയ തോതിൽ ആഗോളതലത്തിൽ വിമർശനങ്ങൾക്കിടയാക്കിയിരുന്നു.വന്യജീവികളുടെ അന്താരാഷ്ട്ര വ്യാപാരം നിയന്ത്രിക്കുന്നതിനുള്ള കൺവെൻഷൻ പ്രകാരമുള്ള (CITES) ആദ്യഘട്ട പെർമിറ്റുകൾ കാനഡയിലെ ഫിഷറീസ് മന്ത്രാലയം ഇതിനകം അനുവദിച്ചുകഴിഞ്ഞു. അടുത്ത ഏതാനും മാസങ്ങൾക്കുള്ളിൽ തന്നെ ജീവികളെ മാറ്റുന്നതിനുള്ള നടപടികൾ പൂർത്തിയാകും.

"തിമിംഗലങ്ങളെ മാറ്റുന്നത് അങ്ങേയറ്റം സങ്കീർണ്ണമായ ഒരു ദൗത്യമാണ്. എങ്കിലും ഈ ജീവികളുടെ സുരക്ഷിതമായ സ്ഥലംമാറ്റത്തിനാണ് ഞങ്ങൾ ഇപ്പോൾ മുൻഗണന നൽകുന്നത്," മാരിൻലാൻഡ് അധികൃതർ പ്രസ്താവനയിലൂടെ അറിയിച്ചു.

കണക്റ്റിക്കട്ടിലെ മിസ്റ്റിക് അക്വേറിയത്തിന്റെ സഹായത്തോടെയാണ് അമേരിക്കൻ കൺസോർഷ്യം ഈ ദൗത്യം ഏകോപിപ്പിക്കുന്നത്. ഈ സ്ഥലംമാറ്റ പ്രക്രിയയ്ക്കായി നികുതിപ്പണം ഉപയോഗിച്ച് സാമ്പത്തിക സഹായം നൽകണമോ എന്ന കാര്യത്തിൽ കനേഡിയൻ സർക്കാർ ഇതുവരെ അന്തിമ തീരുമാനമെടുത്തിട്ടില്ല.