ഹൂസ്റ്റൺ: ആവേശത്തിമിർപ്പിന്റെ പോർക്കളത്തിൽ കാരിരുമ്പിന്റെ കരുത്തുമായി കാലുറപ്പിച്ച് കമ്പക്കയറിൽ സിംഹഗർജനത്തോടെ ആഞ്ഞുവലിച്ച് ആയിരങ്ങളുടെ ആവേശമായിമാറിയ കോട്ടയം ബ്രദേഴ്‌സ് കാനഡ ബ്ലൂ, ടെക്‌സസ് ഇന്റർനാഷണൽ സ്‌പോർട്‌സ് ആന്റ് ആർട്‌സ് ക്ലബ്ബിന്റെ (ടിസാക്ക്) അന്താരാഷ്ട്ര വടംവലി മത്സരത്തിൽ തുടർച്ചയായ അഞ്ചാം തവണയും ചാമ്പ്യൻമാരായി.

മെയ്ക്കരുത്തും മനക്കരുത്തും സ്വന്തമാക്കിയ ഗ്ലാഡിയേറ്റേഴ്‌സ് കാനഡ റണ്ണറപ്പായി ട്രോഫി ഉയർത്തി. കായികശേഷി പരീക്ഷിച്ച് മൂന്നാം സ്ഥാനം കോട്ടയം ബ്രദർസ് കാനഡ ബ്ലാക്ക് ടീമാണ് സ്വന്തമാക്കിയത്. നാലാം സ്ഥാനത്ത് തോടുകൻസ് ന്യൂയോർക് കിംഗ്‌സ് ടീം നേടി .

ജൂലൈ 25 നു ശനിയാഴ്ച ശനിയാഴ്ച രാവിലെ രാവിലെ മുതൽ വൈകുന്നേരം 10 മണി വരെ ഫോർട്‌ബെൻഡ് കൗണ്ടി എപ്പിസെന്ററിലായിരുന്നു മല്ലൻമാർ ചേരിതിരിഞ്ഞ് ചുവടുറപ്പിച്ച് താളത്തിനൊത്ത് കയറിൽ പിടിമുറുക്കിയ വടംവലിയുടെ പെരുംപോരാട്ടം അരങ്ങേറിയത്.

ഏതാണ്ട് ആറായിരത്തിലധികം കാണികൾ സാക്ഷ്യം വഹിച്ച ടിസാക്കിന്റെ ഈ അഞ്ചാം സീസൺ മൽസരം അമേരിക്കൻ മലയാളി സമൂഹത്തിൽ കായികാഭിനിവേശത്തിന്റെ വേറിട്ട ചരിത്രമെഴുതി.

എരിയുന്ന കനലിൽ കാരിരുമ്പിട്ട് വെട്ടി കൊത്തുപണിയിലൂടെ കടഞ്ഞെടുത്ത ഉരുക്ക് മുഷ്ഠിയും അടിപതറാത്ത പാദച്ചുവടുകളുമായി ശ്വാസമടക്കിപ്പിടിച്ചിരുന്ന കാണികൾക്ക് ആവേശത്തിന്റെ പൂരക്കാഴ്ചയാണ് കായിക കേരളത്തിന്റെ പോരാട്ടങ്ങൾക്ക് അമേരിക്കൻ മണ്ണിൽ ആസ്ഥാനമുറപ്പിച്ച ടിസാക്ക് സമ്മാനിച്ചത്.

വനിതാ വിഭാഗത്തിൽ ആഹാ ഡാർലിംഗ്‌സ് ഒന്നാമതെത്തി. രണ്ടാം സ്ഥാനം ഹൂസ്റ്റൺ വാരിയേഴ്‌സ് മൂന്നാം സ്ഥാനം ഡാളസ് ക്യുൻസും കരസ്ഥമാക്കി

ഹെവി വെറ്റ് കാറ്റഗറിയിൽ ഹ്യൂസ്റ്റൺ ടൈഗേഴ്‌സ് ഒന്നാം സ്ഥാനം കരസ്ഥമാക്കി.
മുഖ്യ സ്‌പോൺസർ ധനാനി ഗ്രൂപ്പ് എം.ഡി ധനാനിയും പരിപാടിയിൽ പങ്കെടുത്തു. കൂടാതെ മിസോറി സിറ്റി മേയർ റോബിൻ ജെ. എലക്കാട്ടും ആശംസകൾ നേർന്നു.

ഗ്രൂപ്പ് ഡാൻസുകൾ, ഹൂസ്റ്റണിലെ പ്രമുഖ ഗായകർ പാടിയ അടിപൊളി പാട്ടുകൾ തുടങ്ങിയുവ മത്സരത്തിന്റെ ഇടവേളകൾക്ക് മികവ് നൽകി രാത്രീ 9 മണിയോടെ ഹൂസ്റ്റൺ കായിക സമൂഹത്തിന്റെ വലിയ പിന്തുണയോടെ മത്സരങ്ങൾ വിജയകരമായി സമാപിച്ചു.

മേയർ റോബിൻ ഇലക്കാട്ട് അഡൈ്വസറി ചെയർമാനായുള്ള കമ്മറ്റിയാണ് വടംവലി മത്സരത്തിന്റെ വിജയത്തിനായി പ്രവർത്തിച്ചത്.

പ്രോഗ്രാം കമ്മിറ്റി ചെയർമാൻ ഡോ. സക്കറിയ തോമസ്, പ്രസിഡന്റ് ഡാനി വി. രാജു, സെക്രട്ടറി മാത്യൂസ് കറുകക്കളം, ട്രഷറർ റിമൽ തോമസ്, പി.ആർ.ഒ സിബു ടോം, വൈസ് പ്രസിഡന്റ് മാത്യു ചിറപ്പുറത്തു, ജോയിന്റ് സെക്രട്ടറി പ്രിൻസ് പോൾ, ജോയിന്റ് ട്രഷറർ ജോസഫ് കൈതമറ്റം സോഷ്യൽ മീഡിയ കോർഡിനേറ്റർ ഫിലിപ്പ് ചോരത്ത്, ടൂർണമെന്റ് കോഓർഡിനേറ്റർമാരായ ചാക്കോച്ചൻ മേടയിൽ, ലൂക്ക് കിഴക്കേപ്പുറത്ത്, പ്രബിട് വെള്ളിയാൻ തുടങ്ങിയവർ മത്സരങ്ങളുടെ ചുക്കാൻ പിടിച്ചു.

മുൻ പിആർഓ ജിജു കുളങ്ങര, ഹൂസ്റ്റണിലെ പ്രമുഖ എംസിമാരായ സുബിൻ ബാലകൃഷ്ണൻ, അമ്പിളി ആന്റണി എന്നിവർ അന്നൗൺസ്‌മെന്റ് സെക്ഷനെ സമ്പന്നമാക്കി. സിജിൽ വലിയവീട്ടിലിന്റെ തത്സമയ അവതരണം വടംവലിയെ ആവേശം കൊള്ളിച്ച് കായിക പ്രേമികളുടെ നിറഞ്ഞ കൈയടി നേടി. ഡിജെ വല്ലാടൻ ലൈവ് കായിക പ്രേമികളുടെ പ്രശംസ പിടിച്ചു പറ്റി.

ജീമോൻ റാന്നി

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്