ഫിലാഡൽഫിയ: 'നൃത്തവർഷിണി' പുരസ്‌കാര ജേത്രിയായ, നിമ്മീ റോസ് ദാസ് ശിക്ഷണം നൽകുന്ന,  'ഭരതം ഡാൻസ് അക്കാഡമി'യുടെ, രജത ജൂബിലിയാഘോഷത്തിൽ സമാഹരിച്ച, വയനാട് പ്രകൃതിദുരന്ത സമാശ്വാസത്തുക, ഓർമാ ഇന്റർനാഷണലിലൂടെ, വയനാട്ടിൽ ലഭ്യമാക്കുന്നതിന് കൈമാറി. ഓർമാ ഇന്റർനാഷണൽ ഭാരവാഹികൾ ഭരതം ഡാൻസ് അക്കാഡമിയുടെ മാതൃകാ  ജീവകാരുണ്യ സേവനത്തിന് നന്ദി പറഞ്ഞു. ജോസ് ആറ്റുപുറം (ചെയർമാൻ), ജോർജ് നടവയൽ         (പ്രസിഡന്റ്), റോഷിൻ പ്‌ളാമൂട്ടിൽ (ട്രഷറാർ), ജോസ് തോമസ് (ടാലന്റ് പ്രൊമോഷൻ ഫോറം ചെയർ), സജി സെബാസ്റ്റ്യൻ (ഫിനാൻസ് ഓഫീസർ), സെബിൻ സ്റ്റീഫൻ (ഫിലാഡൽഫിയാ ചാപ്ടർ ജോയിന്റ് സെക്രട്ടറി), ആലീസ് ജോസ്, സ്വപ്നാ സജി എന്നിവർ സംസാരിച്ചു.

പ്രകൃതി ദുരന്ത ബാധിതർക്ക് സഹായം നൽകുന്നതിനുള്ള ഭരതം ഡാൻസ് അക്കാഡമിയുടെ ജീവകാരുണ്യ നിലപാടിനെയും അവരുടെ പ്രവർത്തനങ്ങളെയും അഭിനന്ദിക്കുന്നതായി ഓർമാ ഇന്റർനാഷണൽ ഇൻഡ്യാ പ്രൊവിൻസ് പ്രസിഡന്റ്  കെ.ജെ. ജോസഫ് മാസ്റ്ററും (റിട്ടയേഡ് ഹെഡ്മാസ്റ്റർ), സെക്രട്ടറി ഷീജാ കെ.പിയും (കഥാപ്രസംഗ നൃത്താദ്ധ്യാപിക), പ്രവർത്തകരും ആശംസാപൂർവം നന്ദിയോടെ വയനാട്ടിൽ നിന്ന് വീഡിയോ കോൺഫറൻസിൽ അറിയിച്ചു. മുൻ വർഷങ്ങളിൽ ക്യാൻസർ ബാധിത അശരണർക്ക് സാന്ത്വനം പകരുവാൻ ഭരതം ഡാൻസ് അക്കാഡമി ധനസഹായം നൽകിയിരുന്ന വസ്തുത അവർ ഓർമ്മിച്ചു സംസാരിച്ചു.

നിമ്മീ റോസ് ദാസ്, കൊച്ചിൻ കോളേജിൽ, കോളജ് യൂണിയൻ ആർട് വിഭാഗം സെക്രട്ടറിയായിരുന്നു. എറണാകുളം മഹാരാജാസ് കോളേജിൽ നിന്ന് ധനശാസ്ത്രത്തിൽ ബിരുദാനന്തര ബിരുദവും,  ഫിലാഡൽഫിയയിലെ കോളേജുകളിൽ നിന്ന് ഫിസിയോ തെറപ്പിയിൽ ബിരുദവും നേഴ്‌സിങ്ങിൽ മാസ്റ്റേഴ്‌സും നേടി. ഗുരു, വിജയലക്ഷ്മിയുടെ ശിക്ഷണത്തിൽ, ഭരതനാട്യവും കുച്ചുപ്പുടിയും മോഹിനി ആട്ടവും അഭ്യസിച്ചു. ചിത്ര രചനയിലും പെയിന്റിങ്ങിലും മികവു പുലർത്തുന്ന ചിത്രകാരിയെന്ന നിലയിലും പ്രശസ്തയാണ് നിമ്മി. ഫിലഡൽഫിയയിലെ പേരെടുത്ത യൂണിവേഴ്‌സിറ്റിയിലെ നേഴ്‌സ് എഡ്യൂക്കേറ്ററും പ്രശസ്ത ഹോസ്പിറ്റലിൽ നേഴ്‌സ് മാനേജരുമാണ്. നൃത്ത വിദ്യാദാനത്തിലൂടെ,  വിവിധ ഇന്ത്യൻ ഭാഷകളുടെയും, സംസ്‌കാര രീതികളുടെയും പാഠങ്ങൾ, അനേകം വിദ്യാർത്ഥിനി വിദ്യാർത്ഥികൾക്ക് പകർന്നു നൽകുന്നു.

പി.ഡി. ജോർജ് നടവയൽ

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്