ഷിക്കഗോ: വിശ്വാസത്തിന്റെ ദീപശിഖയേന്തി ഷിക്കാഗോയുടെ മണ്ണിൽ ജീവിക്കുന്ന മലങ്കര ഓർത്തഡോക്‌സ് ക്രിസ്റ്റ്യൻ സഭാമക്കളെ ഏകോപിപ്പിച്ച് നോർത്ത് അമേരിക്കയാകെ പ്രവർത്തനം വ്യാപിപ്പിക്കുക എന്ന ഉദാത്ത ലക്ഷ്യത്തോടെ രൂപവൽക്കരിക്കപ്പെട്ട 'മലങ്കര ഓർത്തഡോക്‌സ് ക്രിസ്റ്റ്യൻ സൊസൈറ്റി ഓഫ് ഷിക്കഗോ' (എം.ഒ.സി.എസ്) എന്ന കൂട്ടായ്മയുടെ ഔപചാരികമായ ഉദ്ഘാടനവും ഫാമിലി നൈറ്റും വരുന്ന മെയ് 10-ാം തീയതി ശനിയാഴ്ച ഓക് ബ്രൂക്കിലെ ഷിക്കാഗോ മാരിയറ്റ് ഓക് ബ്രൂക്ക് ഹോട്ടലിൽ നടക്കും.

പ്രസിഡന്റ് ഡോ. ബിനു ഫിലിപ്പിന്റെ അധ്യക്ഷതയിലും ചെയർമാൻ ഡോ. ജോസഫ് ഏബ്രഹാമിന്റെ സാന്നിധ്യത്തിലും ചേർന്ന യോഗത്തിലാണ് വർണാഭമായ ഉദ്ഘാടന പരിപാടികൾ നടത്താൻ തീരുമാനിച്ചിരിക്കുന്നത്. കേരളത്തിൽ നിന്ന് അമേരിക്കയിൽ കുടിയേറിയവരും ഇവിടെ ജനിച്ചു വളരുന്നവരുമായ മലങ്കര ഓർത്തഡോക്‌സ് ക്രിസ്റ്റ്യൻ വിശ്വാസികൾക്ക് അവരുടെ പൈതൃകവും സംസ്‌കാരവും സഭാപരമായ മൂല്യങ്ങളും ചോർന്ന് പോകാതെ വരും തലമുറയിലേയ്ക്ക് കൈമാറുകയെന്ന ലക്ഷ്യത്തോടെയാണ് എം.ഒ.സി.എസ് നിലവിൽ വന്നത്.

പുതു തലമുറയുടെ ഹൃദ്യമായ ആശയവിനിമയം, പരസ്പര സഹകരണം, ആരോഗ്യകരമായ ആത്മീയ ഇടപെടൽ തുടങ്ങിയ ലക്ഷ്യങ്ങൾ ഊട്ടിയുറപ്പിക്കുന്നതിന് ശക്തമായ സാമുദായിക അടിത്തറയുള്ള ഒരു സംഘടനയായി എം.ഒ.സി.എസ് നിലകൊള്ളും. ഒപ്പം ഷിക്കാഗോയിലും പരിസര പ്രദേശങ്ങളിലുമുള്ള സഭാ അംഗങ്ങളുടെ ഏതൊരാവശ്യത്തിനും എം.ഒ.സി.എസിന്റെ സഹായഹസ്തമുണ്ടാവും.

പ്രായഭേദമെന്യേ എല്ലാവർക്കും ഒന്നിച്ചു ചേരുവാനുള്ള ഒരു കമ്മ്യൂണിറ്റി സെന്റർ എം.ഒ.സി.എസിന്റെ മുഖ്യ ലക്ഷ്യങ്ങളിലൊന്നാണ്. മലങ്കര ഓർത്തഡോക്‌സ് കുടുംബാംഗങ്ങൾക്ക് സായാഹ്നങ്ങളിൽ ഒരുമിച്ച് കൂടി വിശേഷങ്ങൾ പങ്കുവയ്ക്കാനും കുട്ടികൾക്കും മുതിർന്നവർക്കും കലാ കായിക രംഗങ്ങളിലെ മികവ് പ്രകടിപ്പിക്കുന്നതിനൊപ്പം സഭാ വിശ്വാസവും കൂടി ഊട്ടിയുറപ്പിക്കാനുള്ള വേദിയായിരിക്കും ഈ കമ്മ്യൂണിറ്റി സെന്റർ.

ഈ സൊസൈറ്റക്കിക്ക് ചുക്കാൻ പിടിക്കാനായി ഡോ. ജോസഫ് ഏബ്രഹാം (ചെയർമാൻ), ഡോ. ബിനു ഫിലിപ്പ് (പ്രസിഡന്റ്), എബ്രഹാം വർക്കി (വൈസ് പ്രസിഡന്റ്), അജിത്ത് ഏലിയാസ് (സെക്രട്ടറി), ഫിലിപ്പ് കുന്നേൽ ജോസഫ് (ട്രഷറർ), രാജീവ് കോര (ജോയിന്റ് സെക്രട്ടറി) എന്നിവർക്കൊപ്പം ട്രസ്റ്റി ബോർഡ് അംഗങ്ങളായി ജോർജ് പൂഴിക്കുന്നേൽ, ജോർജ് പണിക്കർ, മനോജ് മാത്യു, ജിജോ വർഗീസ്, ടോണി തോമസ്, എന്നിവരും പ്രവർത്തിക്കുന്നു. സീനിയർ ഫോറം ചെയറായി ജോർജ് പൂഴിക്കുന്നേലിനൊപ്പം പി.ഒ ഫിലിപ്പ്, കോശി വൈദ്യൻ, ലീലാമ്മ പോളച്ചിറ, ഫിലോ ഫിലിപ്പ്, കോര പോളച്ചിറ, ബെറ്റി വൈദ്യൻ എന്നിവരുടെ നേതൃത്വത്തിലുള്ള കമ്മിറ്റിയും ചുമതലയേറ്റു.

വിമൻസ് ഫോറം പ്രസിഡന്റ് മഞ്ജു ബേബിക്കൊപ്പം ലിഷ ജോണി, ഡോ. സിബിൽ ഫിലിപ്പ്, ഡോ. മോനി എബ്രഹാം, സിനിൽ ഫിലിപ്പ്, റീന വർക്കി, ഷീബ മാത്യു, അലീന ഗ്രിഗറി, സിമി ഐസക്ക് എന്നിവർ ചുമതലയേറ്റു. യൂത്ത് ഫോറം പ്രസിഡന്റായി ചാൾസ് ജെ മാത്യു, സെക്രട്ടറിയായി ആൽബിൻ എബ്രഹാം എന്നിവർക്കൊപ്പം സിറിൽ ഫിലിപ്പ്, റെയ്‌നു തോമസ്, സാം പണിക്കർ, ജേക്കബ് ജോർജ് എന്നിവരും നിയമിതരായി. കിഡ്‌സ് ഫോറം പ്രസിഡന്റായി ഗ്രിഗറി ഡാനിയേലിന്റെ നേതൃത്വത്തിലുള്ള ഭാരവാഹികളും, വെബ് സൈറ്റ് കോ-ഓർഡിനേറ്റർമാരായി ഷെറി തോമസും ബിബു ഫിലിപ്പും പബ്‌ളിക് റിലേഷൻസ് ചെയറായി ജോർജ് പണിക്കരും സ്ഥാനമേറ്റു.

ഉദ്ഘാടന സമ്മേളനത്തിന്റെ കൺവീനേഴ്‌സായി ഡോ. സിബിൽ ഫിലിപ്പ്, ലിഷ ജോണി  എന്നിവരുടെ നേതൃത്വത്തിലുള്ള ഭാരവാഹികളും, രജിസ്‌ട്രേഷൻ ചെയറായി സിനിൽ ഫിലിപ്പിന്റെ നേതൃത്വത്തിലുള്ള കമ്മിറ്റിയും പ്രവർത്തനമാരംഭിച്ചു. അമേരിക്കയിലെ വിവിധ കൺവൻഷനുകൾക്കും സ്റ്റാർ ഷോകൾക്കും ക്രിയേറ്റീവ് ഹെഡ് ആയി പ്രവർത്തിക്കുന്ന ബിജു സക്കറിയയെ ഈ പ്രോഗ്രമിന്റെ ഇവന്റ് ഡയറക്ടറായും നിയമിച്ചു.

വിഷ്വൽ ട്രീറ്റോടുകൂടി ഷിക്കാഗോ മാരിയറ്റ് ഓക് ബ്രൂക്ക് ഹോട്ടലിൽ 2025 മെയ് 10-ാം തീയതി വൈകുന്നേരം 6 മണി മുതൽ അരങ്ങേറുന്ന ഉദ്ഘാടന സമ്മേളനത്തിൽ അമേരിക്കയുടെ വിവിധ സ്ഥലങ്ങളിൽ നിന്നെത്തുന്ന അതിഥികൾക്കൊപ്പം ചലചിത്ര രംഗത്തുനിന്നുള്ളവരും സന്നിഹിതരാവും. മലങ്കര ഓർത്തഡോക്‌സ് ക്രിസ്റ്റ്യൻ സഭയുടെ ഷിക്കാഗോയിലെ നാല് ഇടവകകളിൽ നിന്നുള്ള അംഗങ്ങൾ ഒരുക്കുന്ന വിവിധ കലാ പരിപാടികൾക്കൊപ്പം മദേഴ്‌സ് ഡേ സ്‌പെഷ്യൽ ഫാഷൻ ഷോയും ഈ ഫാമിലി നൈറ്റിന് മാറ്റ് കൂട്ടും. ഉദ്ഘാടന സമ്മേളനത്തിലേയ്ക്കും ഫാമിലി നൈറ്റിലേയ്ക്കും ഷിക്കാഗോയിലെയും പരിസര പ്രദേശങ്ങളിലെയും മലങ്കര ഓർത്തഡോക്‌സ് സഭാംഗങ്ങളെ ഹൃദയപൂർവം സ്വാഗതം ചെയ്യുന്നതായി ഭാരവാഹികൾ അറിയിച്ചു.

കൂടുതൽ വിവരങ്ങൾക്ക് ഡോ. ബിനു ഫിലിപ്പ് (630-697-2240), ഡോ. ജോസഫ് ഏബ്രഹാം (630-291- 1440), എബ്രഹാം വർക്കി (630-677-3020), അജിത്ത് ഏലിയാസ് (630-337-5898), ഫിലിപ്പ് കുന്നേൽ ജോസഫ് (708-289-5882), രാജീവ് കോര (224-766-9046) എന്നിവരുമായി ബന്ധപ്പെടാൻ താത്പര്യപ്പെടുന്നു.

എ.എസ്. ശ്രീകുമാർ

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്