എസ്.ബി അലുംമ്‌നി ഗ്ലോബൽ മഹാസമ്മേളനത്തിന് അമേരിക്കൻ എസ്.ബി അലുംമ്‌നികളുടെ ദേശിയ നെറ്റ് വർക്കിന്റെ അഭിനന്ദനങ്ങൾ

JANUARY 29, 2025, 1:30 PM

ഷിക്കാഗോ: ഭാരതത്തിന്റെ 76-ാം റിപ്പബ്ലിക് ദിനമായ ജനുവരി 26ന് ചങ്ങനാശേരി എസ്.ബി കോളജിൽ വച്ച് നടന്ന പൂർവ്വ വിദ്യാർത്ഥി മഹാസമ്മേളനത്തിന് അമേരിക്കൻ ഐക്യനാടുകളിലെ എല്ലാ എസ്.ബി പൂർവ്വ വിദ്യാർത്ഥികളുടേയും അഭിനന്ദനങ്ങൾ. മുഖ്യാതിഥിയും എസ്.ബി കോളജ് പൂർവ്വ വിദ്യാർത്ഥിയും ബാംഗ്‌ളൂർ സേവ്യർ ഇൻസ്റ്റിറ്റിയൂട്ട് ഓഫ് മാനേജ്‌മെന്റ് ആൻഡ് എൻടർപ്രണർഷിപ്പ് ചെയർമാനുമായ പ്രൊഫ. ജെ. ഫിലിപ്പ് സമ്മേളനം ഉദ്ഘാടനം ചെയ്തു. അലുംമ്‌നി അസോസിയേഷൻ മദർ ചാപ്റ്റർ പ്രസിഡന്റ് ഡോ.എൻ.എം. മാത്യു അദ്ധ്യക്ഷത വഹിച്ചു.

അതിരൂപതാ വികാരി ജനറാളും കോളജ് മാനേജരുമായ മോൺ ആന്റണി ഏത്തക്കാട് അനുഗ്രഹ പ്രഭാഷണം നടത്തി. പ്രിൻസിപ്പൽ ഫാ. റെജി പ്ലാത്തോട്ടം സ്വാഗത പ്രസംഗവും മികച്ച വിദ്യാർത്ഥികൾക്കുള്ള വിവിധ സ്‌കോളർഷിപ്പുകളും വിതരണം ചെയ്തു. ചങ്ങനാശേരി എം.എൽ.എ ജോബ് മൈക്കിൾ, ബ്രിഗേഡിയർ ഒ.എ. ജെയിംസ്, മുൻ പ്രിൻസിപ്പൽ ഡോ. സ്റ്റീഫൻ മാത്യൂസ്, ബർസാർ ഫാ. ജെയിംസ് ആന്റണി, വൈസ് പ്രിൻസിപ്പൽമാരായ ഫാ.ഡോ. ടെഡി കാഞ്ഞൂപ്പറമ്പിൽ, ഡോ. കെ. സിബി ജോസഫ്, അസോസിയേഷൻ ഭാരവാഹികളായ ഡോ. ഷിജോ കെ. ചെറിയാൻ, ഫാ. ജോൺ ജെ. ചാവറ, ഡോ. ജോസഫ് ജോബ്, ഷാജി പാലാത്ര, ഡോ. സെബിൻ എസ്. കൊട്ടാരം എന്നിവർ പ്രസംഗിച്ചു.

കേരളാ യൂണിവേഴ്‌സിറ്റി മുൻ വൈസ് ചാൻസലർ ഡോ. ബി. ഇക്ബാൽ, മുൻ ബ്രിസ്റ്റോൾ നോർത്ത് (ലണ്ടൻ) മേയർ ടോം അദിത്യ അടക്കമുള്ള നിരവധി പൂർവ്വ വിദ്യാർത്ഥികൾ പങ്കെടുത്തു. വിദ്യാഭ്യാസ മേഖലയിൽ പ്രത്യേകിച്ച് ഉന്നത വിദ്യാഭ്യാസ മേഖലയിൽ നിലനിൽക്കുന്ന സർക്കാർ തല നിയന്ത്രണങ്ങളും നിബന്ധനകളും ധാരാളം വെല്ലുവിളികൾ ഉയർത്തുന്നതാണ്. കോളജിനെ കൂടുതൽ ഉയരങ്ങളിലേക്കും നിലവാരത്തിലേക്കും ഉയർത്തുന്നതിനു വിദ്യാഭ്യാസ മേഖലയിലെ മോഡേൺ ട്രെന്റ് അനുസരിച്ച് ചെയ്യേണ്ട കാര്യങ്ങൾ ചെയ്താൽ മാത്രമേ ആ ലക്ഷ്യപ്രാപ്തിയിൽ എത്തുകയുള്ളുവെന്നും അതിന് എന്തൊക്കെ ചെയ്യണമെന്നുമുള്ളതും പ്രിൻസിപ്പൽ അച്ചൻ തന്റെ സ്വാഗത പ്രസംഗത്തിൽ അടിവരയിട്ട് പറഞ്ഞു.

എസ്. കോളജിനെ തങ്ങളുടെ നെഞ്ചോട് ചേർത്തുപിടിച്ച് സ്‌നേഹിക്കുന്നു എന്നതിന്റെ സാക്ഷ്യപത്രമാണ് എസ്.ബി കോളജ് പൂർവ്വ വിദ്യാർത്ഥികൾ പ്രത്യേകിച്ച് അമേരിക്കൻ ഐക്യനാടുകളിൽ നിന്നുള്ളവരും ലോകത്തിന്റെ മറ്റ് ഭാഗങ്ങളിൽ നിന്നുള്ളവരും ഈ മഹാ സമ്മേളനത്തിൽ പങ്കെടുക്കുകയും സാക്ഷ്യം വഹിക്കുകയും ചെയ്തതും കൂടാതെ നിരവധിയാളുകൾ ഓൺലൈൻ വഴിയായി പരിപാടികൾ ദർശിച്ചതും ഏറെ ചാർതാർത്ഥ്യജനകവും ശ്ശാഘനീയവുമാണ്. മികച്ച വിദ്യാർത്ഥികൾക്കുള്ള സ്‌കോളർഷിപ്പുകളുടെ വിതരണം, 50 വർഷം പൂർവ്വ വിദ്യാർത്ഥികളെ ആദരിക്കുന്ന ചടങ്ങുകൾ, രണ്ട് ഘട്ടങ്ങളിലായി നടത്തിയ കലാസന്ധ്യ എന്നീ വൈവിദ്ധ്യമാർന്ന പരിപാടികൾ സമ്മേളനത്തെ പ്രൗഢഗംഭീരമാക്കി.

ഈ മഹാ സമ്മേളനത്തിന്റെ വിജയത്തിനായി ചുക്കാൻപിടിച്ച എസ്.ബി അലുംമ്‌നി അസോസിയേഷൻ മദർ ചാപ്റ്റർ പ്രസിഡന്റ് ഡോ. എൻ.എം. മാത്യുവിനും, സെക്രട്ടറി ഡോ. ഷിജോ കെ. ചെറിയാനും മറ്റ് ഭാരവാഹികൾക്കും കോളജ് പ്രിൻസിപ്പൽ ബഹു. റെജി അച്ചനും മറ്റ് കോളജ് അധികൃതർക്കും അമേരിക്കൻ എസ്.ബി അലുംമ്‌നികളുടെ ദേശിയ നെറ്റ് വർക്കിന്റെ സ്‌നേഹാദരവുകളും അഭിനന്ദനങ്ങളും.