നിങ്ങൾ ഒരു ജിമെയിൽ ഉപയോക്താവാണോ? എങ്കിൽ ഈ മുന്നറിയിപ്പ് ശ്രദ്ധിക്കുക. ഹാക്കിംഗ് ശ്രമങ്ങൾ വർദ്ധിച്ചതിനാൽ എല്ലാ ജിമെയിൽ ഉപയോക്താക്കളും അവരുടെ പാസ്‌വേഡുകൾ ഉടൻ അപ്‌ഡേറ്റ് ചെയ്യാൻ ഗൂഗിൾ നിർദ്ദേശിക്കുന്നു. മിക്ക ജിമെയിൽ ഉപയോക്താക്കളും അവരുടെ അക്കൗണ്ടുകൾ സുരക്ഷിതമാക്കാൻ എത്രയും വേഗം പാസ്‌വേഡുകൾ ശക്തിപ്പെടുത്തണമെന്ന് ഗൂഗിളിന്റെ മുന്നറിയിപ്പ് പറയുന്നു. ജിമെയിൽ അക്കൗണ്ടുകൾ കൂടുതൽ സുരക്ഷിതമാക്കാൻ പാസ്‌വേഡുകൾക്ക് പകരം പാസ്‌കീകൾ ഉപയോഗിക്കാനും ഗൂഗിൾ ശുപാർശ ചെയ്തു.

എഐ-പവർഡ് സൈബർ ആക്രമണങ്ങളെക്കുറിച്ച് 1.8 ബില്യൺ ജിമെയിൽ ഉപയോക്താക്കൾക്ക് ഗൂഗിൾ അടുത്തിടെ ഒരു സുരക്ഷാ മുന്നറിയിപ്പ് നൽകി. 'ഇൻഡയറക്ട് പ്രോംപ്റ്റ് ഇഞ്ചക്ഷൻസ്' എന്ന പുതിയ രൂപത്തിലുള്ള സൈബർ ആക്രമണത്തെക്കുറിച്ചാണ്  ഗൂഗിൾ ഉപയോക്താക്കൾക്ക് മുന്നറിയിപ്പ് നൽകിയത്. ഈ സൈബർ ഭീഷണി വ്യക്തികളെയും ബിസിനസുകളെയും സർക്കാരുകളെയും ഒരുപോലെ അപകടത്തിലാക്കുന്നുവെന്ന് ഗൂഗിൾ വിശദീകരിച്ചു. 

'ഗൂഗിളിന്റെ സെയിൽസ്ഫോഴ്‌സ് ഡാറ്റാബേസ് ഹാക്ക് ചെയ്യപ്പെട്ടതിനെത്തുടർന്ന് 2.5 ബില്യൺ ജിമെയിൽ ഉപയോക്താക്കൾ ഇപ്പോൾ അപകടത്തിലാണ്' എന്നൊരു മുന്നറിയിപ്പും ഉണ്ടായിരുന്നു. ഗൂഗിൾ സപ്പോർട്ട് സ്റ്റാഫായി വേഷമിടുന്ന സൈബർ കുറ്റവാളികൾ ഇമെയിലുകളിലൂടെയും കോളുകളിലൂടെയും അക്കൗണ്ട് ഉടമകളെ ലക്ഷ്യമിടുന്നുണ്ടെന്ന് മറ്റൊരു സമീപകാല മുന്നറിയിപ്പ് പ്രസ്താവിച്ചു. ലളിതമായ പാസ്‌വേഡുകളുള്ള ഗൂഗിള്‍ അക്കൗണ്ടുകള്‍ ഹാക്ക് ചെയ്യപ്പെടുന്നത് പതിവായതോടെയാണ് പാസ്‌വേഡുകള്‍ കരുത്തുറ്റതാക്കണമെന്ന നിര്‍ദേശം ജിമെയില്‍ ഉപയോക്താക്കള്‍ക്ക് ഗൂഗിള്‍ നല്‍കിയിരിക്കുന്നത്.

ഒട്ടുമിക്ക ജിമെയില്‍ ഉപയോക്താക്കളും അവരുടെ അക്കൗണ്ടുകളുടെ പാസ്‌വേഡുകള്‍ മാറ്റണമെന്ന നിര്‍ദേശം ഗൂഗിള്‍ ഇതിനകം നല്‍കിയിട്ടുണ്ട്. എസ്എംഎസ് വഴിയല്ലാത്ത ടു-ഫാക്‌ടര്‍ ഒതന്‍റിക്കേഷനും, പാസ്‌കീകള്‍ സൃഷ്‌ടിച്ച് കൂടുതല്‍ സുരക്ഷയോടെയുള്ള ലോഗിന്‍ രീതിയും ഉപയോഗിക്കണം എന്നാണ് ജിമെയില്‍ ഉപയോക്താക്കള്‍ക്ക് ഗൂഗിളിന്‍റെ നിര്‍ദേശം. എന്നിരുന്നാലും ഒട്ടുമിക്ക ജിമെയില്‍ ഉപയോക്താക്കളും ഇപ്പോഴും പാസ്‌കീ സെറ്റ് ചെയ്യാതെ, പാസ്‌വേഡുകള്‍ ഉപയോഗിച്ചാണ് ലോഗിന്‍ ചെയ്യുന്നത്.

പാസ്‌വേഡുകള്‍ ഉപയോഗിച്ച് ജിമെയിലില്‍ ലോഗിന്‍ ചെയ്യുന്നവര്‍ ശക്തമായതും ഹാക്കര്‍മാര്‍ക്ക് എളുപ്പം കണ്ടെത്താന്‍ കഴിയാത്തതുമായ പാസ്‌വേഡുകള്‍ സൃഷ്‌ടിക്കണം. ഒന്നിലേറെ അക്കൗണ്ടുകളിലും വ്യത്യസ്‌തമായ പ്ലാറ്റ്‌ഫോമുകളിലും ഒരേ പാസ്‌വേഡ് ഉപയോഗിക്കുന്നത് ഹാക്കര്‍മാര്‍ക്ക് ജോലി എളുപ്പമാക്കും. അതിനാല്‍ ആ പ്രവണത ഒഴിവാക്കുന്നതാണ് നല്ലത്.

അക്കൗണ്ട് ഉടമകളിൽ 36 ശതമാനം പേർ മാത്രമേ പതിവായി പാസ്‌വേഡുകൾ അപ്‌ഡേറ്റ് ചെയ്യുന്നുള്ളൂ എന്ന് ഗൂഗിൾ പറയുന്നു. അതായത് മറ്റ് അക്കൗണ്ട് ഉടമകൾ ഉടൻ തന്നെ നിലവിലുള്ള പാസ്‌വേഡ് മാറ്റുകയും പാസ്‌വേഡുകൾ പതിവായി അപ്‌ഡേറ്റ് ചെയ്യുന്ന രീതി പിന്തുടരുകയും വേണം. ഗൂഗിൾ അക്കൗണ്ടുകളിൽ ലോഗിൻ ചെയ്യാൻ പാസ്‌കീകളാണ് ഏറ്റവും സുരക്ഷിതമായ മാർഗമെന്ന് ഗൂഗിൾ പറയുന്നു.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്