പ്രീമിയം വിപണി പിടിക്കാൻ ആപ്പിൾ; ഐഫോൺ ഫോൾഡ് മുതൽ മാക്ബുക്കും എയർപോഡ്‌സും വരെ

MARCH 9, 2026, 4:15 AM

മാക്ബുക്ക് നിയോ പുറത്തിറക്കിയതിന് പിന്നാലെ, കൂടുതൽ പ്രീമിയം ഉൽപ്പന്നങ്ങൾ വിപണിയിലെത്തിക്കാൻ ആപ്പിൾ. ബ്ലൂംബെർഗ് റിപ്പോർട്ട് പ്രകാരം, നിലവിലുള്ള മോഡലുകൾക്കും മുകളിൽ 'അൾട്രാ' ശ്രേണിയിലുള്ള മൂന്ന് പുതിയ ഉപകരണങ്ങളാണ് ആപ്പിൾ വികസിപ്പിക്കുന്നത്.

ഇതിൽ ഏറ്റവും പ്രധാനപ്പെട്ടത് ആപ്പിളിന്റെ ആദ്യ മടക്കാവുന്ന ഫോണായ 'ഐഫോൺ ഫോൾഡ്' (iPhone Fold) ആണ്. 7.8 ഇഞ്ച് വലിപ്പമുള്ള ക്രീസ് ഇല്ലാത്ത ഒഎൽഇഡി ഡിസ്‌പ്ലേയും 5.5 ഇഞ്ച് പുറം പാനലുമായാണ് ഇത് വരുന്നത്. സാംസങ് ഗാലക്‌സി ഇസഡ് ഫോൾഡിനേക്കാൾ ഒതുക്കമുള്ള ഡിസൈനായിരിക്കും ഇതിനുണ്ടാവുക. എ20 പ്രോ ചിപ്‌സെറ്റ് കരുത്തു പകരുന്ന ഈ ഫോൺ 2026 സെപ്റ്റംബറിൽ പുറത്തിറങ്ങുമെന്നാണ് പ്രതീക്ഷിക്കുന്നത്. ഇതിന്റെ വില ഏകദേശം 2,15,000 രൂപയോളം വരാം.

മാക്ബുക്ക് പ്രോ നിരയിലും വിപ്ലവകരമായ മാറ്റങ്ങൾ ആപ്പിൾ ലക്ഷ്യമിടുന്നുണ്ട്. ചരിത്രത്തിലാദ്യമായി ടച്ച്‌സ്‌ക്രീൻ സൗകര്യമുള്ള മാക്ബുക്ക് പ്രോ മോഡലുകൾ ആപ്പിൾ അവതരിപ്പിക്കും. ഒഎൽഇഡി ഡിസ്‌പ്ലേയോടു കൂടി എത്തുന്ന ഈ ലാപ്ടോപ്പുകളിൽ ഡൈനാമിക് ഐലൻഡ് ഫീച്ചറും ഉൾപ്പെടുത്തിയേക്കാം.

പുതിയ 2nm പ്രോസസ്സറിൽ നിർമ്മിച്ച എം6 പ്രോ (M6 Pro), എം6 മാക്സ് (M6 Max) ചിപ്പുകളായിരിക്കും ഇതിലുണ്ടാവുക. മുൻപ് സ്റ്റീവ് ജോബ്‌സ് മാക്ബുക്കുകളിൽ ടച്ച്‌സ്‌ക്രീൻ കൊണ്ടുവരുന്നതിനെ എതിർത്തിരുന്നെങ്കിലും, പുതിയ വിപണി സാഹചര്യങ്ങൾ കണക്കിലെടുത്താണ് ആപ്പിളിന്റെ ഈ നീക്കം.

ഇതിനൊപ്പം തന്നെ ഐആർ (IR) ക്യാമറകളോട് കൂടിയ പുതിയ തലമുറ എയർപോഡ്‌സും കമ്പനി വികസിപ്പിക്കുന്നുണ്ട്. 'എയർപോഡ്‌സ് അൾട്രാ' എന്ന പേരിലാകും ഇത് അറിയപ്പെടുക.സിരിക്ക് (Siri) കൂടുതൽ കൃത്യമായ വിഷ്വൽ വിവരങ്ങൾ നൽകാനും ഉപഭോക്താവിന്റെ ചുറ്റുപാടുകൾ മനസ്സിലാക്കി എഐ സേവനങ്ങൾ ലഭ്യമാക്കാനും ഈ ഐആർ ക്യാമറകൾ സഹായിക്കും.

ആപ്പിൾ ഇന്റലിജൻസിന് കൂടുതൽ കരുത്തുപകരാൻ ലക്ഷ്യമിട്ടുള്ള ഈ നീക്കം, ഓഡിയോ ലോകത്ത് പുതിയ അനുഭവമായിരിക്കും നൽകുക. നിലവിൽ എയർപോഡ്‌സ് പ്രോ 3-യുടെ വില ഇന്ത്യയിൽ 25,900 രൂപയാണ്. പുതിയ അൾട്രാ മോഡലുകൾ വരുന്നതോടെ വിലയിൽ വർദ്ധനവുണ്ടാകുമോ എന്ന് വ്യക്തമല്ല. വരാനിരിക്കുന്ന മാസങ്ങളിൽ ഈ ഉപകരണങ്ങളെക്കുറിച്ചുള്ള കൂടുതൽ ഔദ്യോഗിക വിവരങ്ങൾ പുറത്തുവരുമെന്നാണ് ആരാധകർ പ്രതീക്ഷിക്കുന്നത്.