കലാഭവൻ മണിയുടെ ആഗ്രഹം പോലെ മകൾ ഡോക്ടർ; സന്തോഷവാർത്ത പങ്കുവച്ച് സഹോദരൻ ആർഎൽവി രാമകൃഷ്ണൻ

MARCH 5, 2026, 11:59 PM

വിടവാങ്ങിയിട്ട് പത്ത് വർഷം പിന്നിട്ടിട്ടും മലയാളി പ്രേക്ഷകരുടെ മനസിൽ ഇന്നും നിറഞ്ഞുനിൽക്കുന്ന നടനാണ് കലാഭവൻ മണി. അദ്ദേഹത്തിന്റെ മരണത്തിന് ശേഷം ഭാര്യയെയും മകളെയും കുറിച്ചുള്ള വിവരങ്ങൾ കുടുംബം പൊതുവേദികളിൽ പങ്കുവച്ചിരുന്നില്ല. മാധ്യമങ്ങളിൽ നിന്നും പൊതുപരിപാടികളിൽ നിന്നും അവർ ഏറെക്കാലം മാറിനിന്നിരുന്നു.

ഇപ്പോൾ കലാഭവൻ മണിയുടെ കുടുംബത്തിൽ നിന്നുള്ള സന്തോഷവാർത്ത പങ്കുവച്ചിരിക്കുകയാണ് അദ്ദേഹത്തിന്റെ സഹോദരൻ ഡോ. ആർഎൽവി രാമകൃഷ്ണൻ. കലാഭവൻ മണിയുടെ ആഗ്രഹം പോലെ തന്നെ മകൾ ശ്രീലക്ഷ്മി (പാപ്പ) ഡോക്ടറായി എന്നാണ് അദ്ദേഹം വ്യക്തമാക്കിയത്. മണിയുടെ ചരമവാർഷിക ദിനത്തിൽ മാധ്യമങ്ങളോട് സംസാരിക്കുമ്പോഴായിരുന്നു രാമകൃഷ്ണൻ ഈ വിവരം പങ്കുവച്ചത്.

“ചേട്ടന്റെ ആഗ്രഹം പോലെ തന്നെ മകൾ ഡോക്ടറായി. പാവപ്പെട്ടവരുടെ ഡോക്ടർ ആകണമെന്നായിരുന്നു ചേട്ടന്റെ ആഗ്രഹം. മകൾ എംബിബിഎസ് പൂർത്തിയാക്കി ഇപ്പോൾ പ്രാക്ടീസ് ചെയ്യുകയാണ്. എന്റെ ജീവിതത്തിലെ ഉയർച്ചയ്ക്കും ചേട്ടൻ വലിയ പങ്ക് വഹിച്ചിട്ടുണ്ട്. ഡോക്ടറേറ്റ് നേടാനും കലാമണ്ഡലത്തിൽ അസിസ്റ്റന്റ് പ്രൊഫസറായി ജോലി ലഭിക്കാനും ചേട്ടൻ ഒരുക്കിയ സാഹചര്യങ്ങളാണ് സഹായമായത്. മനസ് വിഷമിച്ച സമയങ്ങളിൽ പോലും ചേട്ടന്റെ ആഗ്രഹം മനസിൽ സൂക്ഷിച്ച് മുന്നോട്ടുപോകാൻ കഴിഞ്ഞു” എന്നാണ് അദ്ദേഹം പറഞ്ഞത്.