പാലാ നഗരസഭയില്‍ രാഷ്ട്രീയ അട്ടിമറി: സ്വതന്ത്ര കൂട്ടായ്മയ്ക്കുള്ള പിന്തുണ പിന്‍വലിച്ച് കോണ്‍ഗ്രസ്, ഭരണം പ്രതിസന്ധിയില്‍

JULY 5, 2026, 7:57 AM

പാലാ: നാടകീയ നീക്കങ്ങള്‍ക്കൊടുവില്‍ പാലാ നഗരസഭയിലെ യു.ഡി.എഫ്‌സ്വതന്ത്ര സഖ്യഭരണത്തില്‍ വന്‍ വിള്ളല്‍. നഗരസഭ ഭരിക്കുന്ന സ്വതന്ത്രകൂട്ടായ്മയ്ക്ക് നല്‍കിവന്ന പിന്തുണ കോണ്‍ഗ്രസ് ഔദ്യോഗികമായി പിന്‍വലിച്ചു. ഭരണത്തേക്കാള്‍ വലുത് പാര്‍ട്ടിയുടെ ആത്മാഭിമാനം സംരക്ഷിക്കലാണെന്ന് വ്യക്തമാക്കിക്കൊണ്ടാണ് കോണ്‍ഗ്രസ് മണ്ഡലം കമ്മറ്റി പ്രമേയം പാസ്സാക്കിയത്. ഇതോടെ നഗരസഭയിലെ യു.ഡി.എഫ് ഭരണം കടുത്ത പ്രതിസന്ധിയിലായിരിക്കുകയാണ്.

കൊട്ടാരമറ്റം ബസ്സ്റ്റാന്‍ഡ് ഡി.വൈ.എഫ്.ഐ. ജില്ലാ സമ്മേളനത്തിനായി വിട്ടുകൊടുക്കാനുള്ള നഗരസഭയുടെ തീരുമാനമാണ് നിലവിലെ രാഷ്ട്രീയ പൊട്ടിത്തെറിക്ക് ആധാരം. നഗരസഭാ ചെയര്‍മാന്‍ ഉള്‍പ്പെടെയുള്ള സ്വതന്ത്ര അംഗങ്ങള്‍ ഇടതുപക്ഷ നീക്കങ്ങള്‍ക്ക് ഒത്താശ ചെയ്തുവെന്ന് കോണ്‍ഗ്രസ് പരസ്യമായി കുറ്റപ്പെടുത്തിയിരുന്നു. ഈ വിഷയത്തില്‍ കൗണ്‍സില്‍ യോഗത്തില്‍ ഉണ്ടായ കടുത്ത ഭിന്നതയെത്തുടര്‍ന്ന് കോണ്‍ഗ്രസ് അംഗങ്ങള്‍ നേരത്തെ യോഗം ബഹിഷ്‌കരിച്ച് ഇറങ്ങിപ്പോയിരുന്നു. സ്വതന്ത്ര കൂട്ടായ്മയുമായി ഇനി ഒരു തരത്തിലുള്ള വിട്ടുവീഴ്ചയ്ക്കുമില്ലെന്ന കോണ്‍ഗ്രസ് നിലപാടാണ് ഇപ്പോള്‍ പിന്തുണ പിന്‍വലിക്കുന്നതിലേക്ക് നയിച്ചത്.

കഴിഞ്ഞ നഗരസഭ തിരഞ്ഞെടുപ്പില്‍ എല്‍.ഡി.എഫിനും യു.ഡി.എഫിനും കേവലഭൂരിപക്ഷം ലഭിക്കാതിരുന്ന സാഹചര്യത്തിലാണ് നാടകീയ നീക്കങ്ങളിലൂടെ യു.ഡി.എഫ് അധികാരം പിടിച്ചത്. അന്ന് സ്വതന്ത്ര സ്ഥാനാര്‍ഥികളായി വിജയിച്ച ബിനു പുളിക്കക്കണ്ടം, മകള്‍ ദിയാ ബിനു പുളിക്കക്കണ്ടം, ബിനുവിന്റെ സഹോദരന്‍ ബിജു പുളിക്കക്കണ്ടം എന്നിവര്‍ യു.ഡി.എഫിന് പിന്തുണ പ്രഖ്യാപിക്കുകയായിരുന്നു. ആദ്യ ടേമില്‍ ദിയാ ബിനുവിന് ചെയര്‍പേഴ്സണ്‍ സ്ഥാനം നല്‍കാം എന്ന ധാരണയുടെ പുറത്തായിരുന്നു ഈ സഖ്യം രൂപപ്പെട്ടത്.

26 അംഗ നഗരസഭയില്‍ എല്‍.ഡി.എഫിന് പതിനൊന്നും യു.ഡി.എഫിന് പത്തും അംഗങ്ങളാണ് ഉണ്ടായിരുന്നത്. പുളിക്കക്കണ്ടം കുടുംബത്തിലെ മൂന്ന് പേര്‍ക്ക് പുറമെ, കോണ്‍ഗ്രസ് വിമതയായി ജയിച്ച മായാ രാഹുല്‍ ഉള്‍പ്പെടെയുള്ള മറ്റ് രണ്ട് സ്വതന്ത്രര്‍ കൂടി പിന്തുണച്ചതോടെയാണ് യു.ഡി.എഫിന്റെ അംഗബലം 14 ആയി ഉയര്‍ന്നതും ഭരണം പിടിച്ചെടുത്തതും. എന്നാല്‍ ഡി.വൈ.എഫ്.ഐ സമ്മേളനവുമായി ബന്ധപ്പെട്ട് ഉടലെടുത്ത തര്‍ക്കം സഖ്യത്തിന്റെ തകര്‍ച്ച ഉറപ്പാക്കുകയായിരുന്നു. കോണ്‍ഗ്രസ് പിന്തുണ പിന്‍വലിച്ചതോടെ പാലാ നഗരസഭയില്‍ വരും ദിവസങ്ങളില്‍ വലിയ രാഷ്ട്രീയ പുനക്രമീകരണങ്ങള്‍ക്ക് സാധ്യതയേറി.