തിരുവനന്തപുരം: ഐക്യരാഷ്ട്രസഭയില് ഇസ്രയേലിനെതിരായ യുദ്ധ പ്രമേയത്തില് നിന്ന് ഇന്ത്യ വിട്ടുനിന്നതിനെ വിമര്ശിച്ച് കോണ്ഗ്രസ് നേതാവ് രമേശ് ചെന്നിത്തല. പ്രമേയത്തില് നിന്ന് വിട്ടുനിന്നത് ഇന്ത്യ വെച്ചുപുലര്ത്തിപോരുന്ന അടിസ്ഥാനമൂല്യങ്ങളുടെ ലംഘനമാണെന്ന് രമേശ് ചെന്നിത്തല പറഞ്ഞു.
ഗാസയില് കൊല്ലപ്പെട്ടവരുടെ എണ്ണം 60,000 കവിഞ്ഞു. ഒരു രാഷ്ട്രം മറ്റൊരു രാഷ്ട്രത്തിലെ ജനതയെ വംശഹത്യ ചെയ്യുമ്പോള് ലോകത്തിന് കയ്യും കെട്ടി നോക്കി നില്ക്കാനാവില്ല. മഹാത്മാഗാന്ധിയുടെ ആശയങ്ങളില് വേരൂന്നി രൂപപ്പെട്ട ഇന്ത്യ അങ്ങനെ ചെയ്യുന്നുവെങ്കില് അത് അക്ഷന്തവ്യമായ അപരാധമാണെന്നും ചെന്നിത്തല കൂട്ടിച്ചേര്ത്തു.
ഈ വിഷയത്തില് ഇന്ത്യ നിലപാട് എടുക്കാതിരിക്കുക എന്നു പറയുന്നത് കൂട്ടക്കൊലയ്ക്ക് അനുമതി കൊടുക്കും പോലെയാണ്. ഇന്ത്യയും ഇസ്രയേലും തമ്മിലുള്ള സഹകരണം കൂട്ടക്കൊലയ്ക്ക് നല്കുന്ന മൗനാനുമതി ആയി മാറാന് പാടില്ല. ഇറാനു നേരെ ഇസ്രയേല് ഏകപക്ഷീയമായി ആരംഭിച്ച യുദ്ധവും അംഗീകരിക്കാവുന്നതല്ലെന്ന് ചെന്നിത്തല പറഞ്ഞു. അയല്രാജ്യം തങ്ങളെ ആക്രമിച്ചേക്കും എന്ന ഭീതി ഒരു യുദ്ധം തുടങ്ങുന്നതിനു ന്യായീകരണമല്ല. വരാനിരിക്കുന്ന തിരഞ്ഞെടുപ്പ് വിജയത്തിന് വേണ്ടി മധ്യപൂര്വേഷ്യാ മേഖലയെ ആകെ യുദ്ധത്തിലേക്ക് തള്ളിവിട്ടിരിക്കുകയാണ് ഇസ്രയേല് പ്രധാനമന്ത്രി നെതന്യാഹുവെന്നും അദ്ദേഹം കുറ്റപ്പെടുത്തി.
ഇസ്രയേലിന്റെ യുദ്ധ ഭീകരതയ്ക്കെതിരെ വരുന്ന എല്ലാ പ്രമേയങ്ങളും ഇന്ത്യ അനുകൂലിക്കേണ്ടതുണ്ട്. ഇറാനുമായും ഇസ്രയേലുമായും ബന്ധം പുലര്ത്തുന്ന രാഷ്ട്രമെന്ന നിലയില് ഈ വിഷയത്തില് ഒരു പ്രശ്നപരിഹാരത്തിനാണ് ഇന്ത്യ ശ്രമിക്കേണ്ടത്. ചെന്നിത്തല കൂട്ടിച്ചേര്ത്തു.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
.jpg)
-20260317044144.jpg)
