കച്ചവടക്കാർക്കും നിർമ്മാതാക്കൾക്കും പുതിയ പണി വരുന്നു: ഒക്ടോബർ ഒന്നു മുതൽ ഈ ഇലക്ട്രിക്കൽ ഉൽപ്പന്നങ്ങൾ വിൽക്കാൻ സാധിക്കില്ല

JULY 6, 2026, 7:08 AM

രാജ്യത്തെ ഇലക്ട്രിക്കൽ ഉൽപ്പന്നങ്ങളുടെ നിർമ്മാതാക്കളും ഇറക്കുമതിക്കാരും വ്യാപാരികളും ഒക്ടോബർ മാസം മുതൽ വലിയൊരു നിയമമാറ്റത്തെ നേരിടാൻ ഒരുങ്ങുകയാണ്. ഒക്ടോബർ ഒന്നു മുതൽ രാജ്യത്ത് വിൽക്കുന്ന പ്രധാനപ്പെട്ട തൊണ്ണൂറോളം ഇലക്ട്രിക്കൽ ഉൽപ്പന്നങ്ങൾക്ക് ബ്യൂറോ ഓഫ് ഇന്ത്യൻ സ്റ്റാൻഡേർഡ്സ് അഥവാ ബിഐഎസ് സർട്ടിഫിക്കേഷൻ നിർബന്ധമാക്കാൻ കേന്ദ്ര സർക്കാർ തീരുമാനിച്ചു. ഇതോടെ ഗുണനിലവാരമില്ലാത്തതും ഐഎസ്ഐ മുദ്ര ഇല്ലാത്തതുമായ വ്യാജ ഉൽപ്പന്നങ്ങളുടെ വിപണനത്തിന് പൂർണ്ണമായി തടസ്സമാകും.

ബിഐഎസ് ലൈസൻസും കൃത്യമായ ഐഎസ്ഐ മുദ്രയും ഇല്ലാത്ത ഉൽപ്പന്നങ്ങൾ ഒക്ടോബർ ഒന്നിന് ശേഷം ഇന്ത്യയിൽ നിർമ്മിക്കാനോ വിദേശത്തുനിന്ന് ഇറക്കുമതി ചെയ്യാനോ വിതരണം ചെയ്യാനോ വിപണിയിൽ സംഭരിച്ച് വെക്കാനോ സാധിക്കില്ല. വീടുകളിൽ ദിവസേന ഉപയോഗിക്കുന്ന ഇലക്ട്രിക് ടൂത്ത് ബ്രഷുകൾ, വാക്വം ക്ലീനറുകൾ, കോഫി മേക്കറുകൾ, ഫുഡ് പ്രൊസസ്സറുകൾ, ഓവനുകൾ, വാട്ടർ ഹീറ്ററുകൾ, ഹെയർ ക്ലിപ്പറുകൾ തുടങ്ങിയ നിരവധി നിത്യോപയോഗ സാധനങ്ങൾ ഈ പുതിയ പരിധിയിൽ വരുന്നുണ്ട്.

വിപണിയിൽ ഇറങ്ങുന്ന ഉൽപ്പന്നങ്ങൾ കൃത്യമായ സുരക്ഷാ മാനദണ്ഡങ്ങൾ പാലിക്കുന്നുണ്ടെന്ന് ഉറപ്പുവരുത്താൻ ഉത്തരവാദിത്തമുള്ള ദേശീയ സ്ഥാപനമാണ് ബ്യൂറോ ഓഫ് ഇന്ത്യൻ സ്റ്റാൻഡേർഡ്സ്. പുതിയ നിയമങ്ങൾ ഘട്ടങ്ങളായാണ് രാജ്യത്ത് നടപ്പിലാക്കാൻ ഉദ്ദേശിക്കുന്നത്. വലിയ ഇടത്തരം ഉൽപ്പാദകരും എല്ലാത്തരം ഇറക്കുമതിക്കാരും ഒക്ടോബർ ഒന്നിനകം പുതിയ നിർദ്ദേശങ്ങൾ നിർബന്ധമായും പാലിച്ചിരിക്കണം.

ചെറുകിട വ്യാവസായിക സ്ഥാപനങ്ങൾക്ക് പുതിയ നിയമങ്ങൾ പാലിക്കാൻ അടുത്ത വർഷം ജനുവരി ഒന്നു വരെ സമയം അനുവദിച്ചിട്ടുണ്ട്. അതേസമയം അതിസൂക്ഷ്മ സംരംഭങ്ങൾക്ക് അടുത്ത വർഷം ഏപ്രിൽ ഒന്നു വരെ ഇളവ് നൽകിയിട്ടുണ്ട്. ബിഐഎസ് സർട്ടിഫിക്കേഷൻ പ്രക്രിയകൾ പൂർത്തിയാകാൻ മൂന്ന് മുതൽ ആറ് മാസം വരെ സമയമെടുക്കുമെന്നാണ് പ്രമുഖ ഉൽപ്പാദകർ വ്യക്തമാക്കുന്നത്.

ഫാക്ടറി പരിശോധനകളും വിശദമായ പ്രൊഡക്ട് ടെസ്റ്റിംഗും കഴിഞ്ഞ ശേഷമേ ഔദ്യോഗികമായി ലൈസൻസുകൾ അനുവദിക്കുകയുള്ളൂ. അതുകൊണ്ടുതന്നെ അവസാന നിമിഷം വരെ കാത്തുനിൽക്കാതെ വ്യാപാരികൾ എത്രയും വേഗം അപേക്ഷകൾ നൽകണമെന്ന് വിപണി വിദഗ്ധർ മുന്നറിയിപ്പ് നൽകുന്നുണ്ട്. സമയപരിധി കഴിഞ്ഞും മാനദണ്ഡങ്ങൾ പാലിച്ചില്ലെങ്കിൽ വലിയ തിരിച്ചടികളാണ് ബിസിനസ്സ് മേഖലയിൽ ഉണ്ടാവുക.

ലൈസൻസ് ഇല്ലാത്ത ഉൽപ്പന്നങ്ങൾ കസ്റ്റംസ് വിഭാഗം അതിർത്തികളിൽ തടയുകയും നിർമ്മാണവും വിൽപ്പനയും പൂർണ്ണമായി തടസ്സപ്പെടുകയും ചെയ്യും. കൂടാതെ നിയമം ലംഘിക്കുന്ന കമ്പനികൾക്കെതിരെ ബിഐഎസ് ആക്ട് പ്രകാരം കടുത്ത പിഴശിക്ഷകളും വിപണിയിൽ നിന്നും ഉൽപ്പന്നങ്ങൾ തിരിച്ചുവിളിക്കാനുള്ള നടപടികളും നേരിടേണ്ടി വരും.

പുതിയ മാറ്റങ്ങൾ കച്ചവടക്കാർക്ക് കടുത്ത വെല്ലുവിളി ഉയർത്തുമെങ്കിലും സാധാരണക്കാരായ ഉപഭോക്താക്കൾക്ക് ഇത് വലിയ രീതിയിൽ ഗുണം ചെയ്യും. വിപണിയിൽ വാങ്ങാൻ കിട്ടുന്ന എല്ലാത്തരം ഗാർഹിക ഇലക്ട്രിക്കൽ ഉപകരണങ്ങളും മികച്ച ഗുണനിലവാരവും സുരക്ഷയും ഉള്ളതാണെന്ന് ഉറപ്പാക്കാൻ ഈ നിയമത്തിലൂടെ സാധിക്കും. ഷോർട്ട് സർക്യൂട്ടുകൾ മൂലമുണ്ടാകുന്ന അപകടങ്ങൾ കുറയ്ക്കാനും ഇത് സഹായിക്കും.

English Summary

The Bureau of Indian Standards will make BIS certification and ISI mark mandatory for 90 categories of electrical appliances in India from October 1 2026 which will impact manufacturers importers and sellers