ഇന്ത്യൻ സൈന്യത്തിന് കരുത്താകാൻ ഉത്തർപ്രദേശിൽ നിന്നുള്ള സ്കിർ ഡയറി ഉൽപ്പന്നങ്ങൾ

JUNE 13, 2026, 3:32 AM

ലക്നൗ: തദ്ദേശീയ പശുക്കളുടെ സംരക്ഷണം, ആധുനിക ഡയറി സാങ്കേതികവിദ്യ, ഗ്രാമീണ തൊഴിലവസരങ്ങൾ എന്നിവ കോർത്തിണക്കി മൂല്യവർദ്ധിത പാൽ ഉൽപ്പന്നങ്ങളുടെ നിർമ്മാണത്തിൽ രാജ്യത്തിന് തന്നെ മാതൃകയാവുകയാണ് ഉത്തർപ്രദേശ്. ഡാനിഷ്, ഐസ്‌ലാൻഡിക് സാങ്കേതികവിദ്യകൾ സമന്വയിപ്പിച്ച് ഉത്തർപ്രദേശിലെ തദ്ദേശീയ പശുക്കളുടെ പാലിൽ നിന്ന് ഉൽപ്പാദിപ്പിക്കുന്ന 'സ്കിർ' (Skyr) എന്ന പ്രീമിയം ഡയറി സപ്ലിമെന്റ് ഇന്ത്യൻ സൈനികർക്കിടയിൽ വലിയ ജനപ്രീതി നേടുകയാണ്. ഉയർന്ന പോഷകഗുണമുള്ള ഈ ഉൽപ്പന്നം സൈനികരുടെ ആരോഗ്യസംരക്ഷണത്തിന് ഏറെ ഫലപ്രദമാണെന്നാണ് വിലയിരുത്തപ്പെടുന്നത്.

ഉയർന്ന ഗുണമേന്മയുള്ള പ്രോട്ടീൻ അടങ്ങിയതും കൊഴുപ്പ് കുറഞ്ഞതുമായ സ്കിർ, സൈനികർക്ക് അനുയോജ്യമായ ഒരു മികച്ച ഭക്ഷണ ഘടകമാണെന്ന് ഉദ്യോഗസ്ഥർ വ്യക്തമാക്കുന്നു. ഫ്രീസ്-ഡ്രൈഡ് രീതിയിൽ തയ്യാറാക്കിയ സ്കിർ തൈര് പൊടി, മറ്റ് അനുബന്ധ പാൽ ഉൽപ്പന്നങ്ങൾ എന്നിവ സൈനികരുടെ രോഗപ്രതിരോധ ശേഷി കൂട്ടാനും പേശികളുടെ ബലം വർദ്ധിപ്പിക്കാനും ഊർജ്ജ നില നിലനിർത്താനും സഹായിക്കുന്നവയാണ്.

മുഖ്യമന്ത്രി യോഗി ആദിത്യനാഥിന്റെ നേതൃത്വത്തിൽ ഉത്തർപ്രദേശ് വികസിപ്പിച്ചെടുത്ത പശുധിഷ്ഠിത സാമ്പത്തിക മാതൃക 'ആത്മനിർഭർ ഭാരത്' എന്ന ദൂരക്കാഴ്ചയ്ക്ക് വലിയ സംഭാവനയാണ് നൽകുന്നതെന്ന് അനിമൽ ഹസ്ബൻഡറി ഡിപ്പാർട്ട്മെന്റ് അഡീഷണൽ ചീഫ് സെക്രട്ടറി മുകേഷ് മേശ്രം പറഞ്ഞു. തദ്ദേശീയ കന്നുകാലി സംരക്ഷണത്തിലും മൂല്യവർദ്ധിത പാൽ ഉൽപ്പാദനത്തിലും സംസ്ഥാനം നടത്തുന്ന ശ്രമങ്ങൾ കർഷകർക്കും സംരംഭകർക്കും ഗ്രാമീണ മേഖലയ്ക്കും ഒരുപോലെ പുതിയ അവസരങ്ങൾ തുറന്നുനൽകുന്നുണ്ടെന്നും അദ്ദേഹം കൂട്ടിച്ചേർത്തു.

ഈ സംരംഭത്തിൽ നിർണ്ണായക പങ്ക് വഹിക്കുന്നത് നോയിഡയിൽ അത്യാധുനിക ഡയറി ഫാം സ്ഥാപിച്ച പ്രയാഗ്‌രാജിൽ നിന്നുള്ള എഞ്ചിനീയറായ എസ്.എൻ. ദ്വിവേദിയാണ്. ഗിർ, സാഹിവാൾ തുടങ്ങിയ പ്രശസ്തമായ ഇനങ്ങളിൽപ്പെട്ട ഇരുനൂറ്റമ്പതിലധികം തദ്ദേശീയ പശുക്കളാണ് ഈ ഫാമിലുള്ളത്. പോഷകസമൃദ്ധമായ ഈ പാലിൽ നിന്നാണ് പ്രീമിയം ഉൽപ്പന്നങ്ങൾ നിർമ്മിക്കുന്നത്.

സ്കിർ, ഗ്രീക്ക് തൈര്, ജലാറ്റോ ഐസ്ക്രീം, പനീർ, നെയ്യ് എന്നിവയാണ് ഇവിടുത്തെ പ്രധാന ഉൽപ്പന്നങ്ങൾ. ആധുനിക അൾട്രാ ഫിൽട്ടറേഷൻ സാങ്കേതികവിദ്യയും വിപുലമായ സംസ്കരണ രീതികളും ഉപയോഗിച്ചാണ് പ്രീമിയം ഗുണനിലവാരമുള്ള ഉയർന്ന പ്രോട്ടീൻ അടങ്ങിയ ഡയറി ഉൽപ്പന്നങ്ങൾ ഇവിടെ തയ്യാറാക്കുന്നത്.