വിതുര പീഡനക്കേസ്: ഒന്നാം പ്രതി സുരേഷിന് 37 വര്‍ഷം കഠിനതടവ്

APRIL 11, 2026, 1:12 AM

കോട്ടയം: പ്രായപൂര്‍ത്തിയാകാത്ത പെണ്‍കുട്ടിയെ തട്ടിക്കൊണ്ടുപോയി തടവില്‍ പാര്‍പ്പിച്ച് പീഡിപ്പിച്ച കേസില്‍ ഒന്നാം പ്രതിയായ കൊല്ലം സ്വദേശി സുരേഷ് (ഷംസുദ്ദീന്‍ മുഹമ്മദ് ഷാജഹാന്‍, 52)യ്ക്ക് 37 വര്‍ഷം കഠിനതടവും പിഴയും വിധിച്ചു കോടതി. വിതുര പീഡനക്കേസുമായി ബന്ധപ്പെട്ട് രജിസ്റ്റര്‍ ചെയ്ത കേസുകളില്‍ ആദ്യമായി വിചാരണ പൂര്‍ത്തിയായ കേസിലാണ് കോട്ടയം അഡീഷണല്‍ ജില്ലാ സെഷന്‍സ് കോടതി (II) വിധി പ്രസ്താവിച്ചത്.

ഇതിന് മുമ്പ് തന്നെ മറ്റൊരു കേസില്‍ ജീവപര്യന്തം തടവിന് ശിക്ഷിക്കപ്പെട്ട സുരേഷ് ഇപ്പോള്‍ ജയിലില്‍ കഴിയുകയാണ്. കൂടാതെ, മറ്റ് രണ്ട് കേസുകളിലെ ശിക്ഷ ഈ മാസം 13-ന് പ്രഖ്യാപിക്കും. മൂന്ന് കേസുകളിലും പ്രതി കുറ്റം സമ്മതിച്ചതായി കോടതി വ്യക്തമാക്കി. ശിക്ഷകള്‍ ഒരുമിച്ച് അനുഭവിച്ചാല്‍ മതിയെന്നും, നിലവില്‍ അനുഭവിക്കുന്ന ശിക്ഷാകാലം ഇതിലും പരിഗണിക്കാമെന്നും കോടതി അറിയിച്ചു.

വിവിധ കുറ്റങ്ങള്‍ക്കായി വ്യത്യസ്ത കാലയളവുകളിലാണ് ശിക്ഷ വിധിച്ചത്. അന്യായമായി തടഞ്ഞുവെച്ചതിന് ഒരു വര്‍ഷം, ദീര്‍ഘകാല തടങ്കലിന് മൂന്ന് വര്‍ഷം, മനുഷ്യക്കടത്തിന് 10 വര്‍ഷം, പ്രായപൂര്‍ത്തിയാകാത്ത പെണ്‍കുട്ടിയെ വാങ്ങിയതിന് 10 വര്‍ഷം, വ്യഭിചാരശാല നടത്തിയത് സംബന്ധിച്ച് മൂന്ന് വര്‍ഷം, പ്രായപൂര്‍ത്തിയാകാത്തവളെ വ്യഭിചാരത്തിലേക്ക് പ്രേരിപ്പിച്ചതിന് 10 വര്‍ഷം എന്നിവയാണ് ശിക്ഷ. കൂടാതെ 14,000 രൂപ പിഴയും വിധിച്ചു. ഈ തുക ഇരയായ പെണ്‍കുട്ടിക്ക് നല്‍കാന്‍ കോടതി നിര്‍ദേശിച്ചു.

ഇരയ്ക്ക് നല്‍കേണ്ട നഷ്ടപരിഹാരത്തുക ജില്ലാ ലീഗല്‍ സര്‍വീസസ് അതോറിറ്റി തീരുമാനിക്കണമെന്ന് കോടതി നിര്‍ദേശിച്ചിട്ടുണ്ട്. മുന്‍പ് വിധി വന്ന മറ്റൊരു കേസില്‍ 10 ലക്ഷം രൂപ നഷ്ടപരിഹാരമായി അനുവദിച്ചിരുന്നു.

1995-ല്‍ വിതുര സ്വദേശിനിയായ പെണ്‍കുട്ടിയെ പരിചയമുള്ള ഒരാള്‍ വീട്ടില്‍നിന്ന് പുറത്താക്കി ഒന്നാം പ്രതിക്ക് കൈമാറുകയും, തുടര്‍ന്ന് മാസങ്ങളോളം സംസ്ഥാനത്തിനകത്തും പുറത്തും പലര്‍ക്കുമിടയില്‍ കൈമാറ്റം ചെയ്ത് പീഡിപ്പിച്ചുവെന്നതാണ് പ്രോസിക്യൂഷന്‍ കേസ്. കേസില്‍ മറ്റ് പ്രതികള്‍ക്കെതിരെ വിചാരണ തുടരുകയാണ്.