സംസ്ഥാനത്ത് പച്ചക്കറി വില കുതിച്ചുയരുന്നു; ആശങ്കയിൽ ജനം

AUGUST 2, 2025, 12:56 AM

കൊച്ചി: സംസ്ഥാനത്ത് പച്ചക്കറി വില കുതിച്ചുയരുന്നതായി റിപ്പോർട്ട്. സംസ്ഥാനത്ത് ഒരു മാസം കൊണ്ട് പച്ചക്കറികളുടെ വില 20 മുതല്‍ 60 ശതമാനം വരെയാണ് ഉയര്‍ന്നത് എന്നാണ് ലഭിക്കുന്ന വിവരം. ഉത്പാദനത്തിലെ കുറവാണ് വിലവർദ്ധനയ്ക്ക് കാരണമായത്.

അതേസമയം കാലാവസ്ഥ വ്യതിയാനമാണ് ഉത്പാദനം കുറയാനുള്ള പ്രധാന കാരണം എന്നാണ് വിദഗ്ധർ വ്യക്തമാക്കുന്നത്. ജൂലൈ ഒന്നിന് കിലോയ്ക്ക് 55 രൂപയുണ്ടായിരുന്ന ഇഞ്ചി വില ഒരുമാസം കൊണ്ട് 80 -100 രൂപയിലേക്കുംവെളുത്തുള്ളി കിലോയ്ക്ക് 120 -140 രൂപയിലേക്കും ഉയർന്നു.

കാരറ്റിനും തക്കാളിക്കും വില ഉയർന്നിട്ടുണ്ട്. കാരറ്റിന് 20 ശതമാനം വില ഉയര്‍ന്ന് 80 രൂപയിലും തക്കാളി കിലോയ്ക്ക് 40രൂപ ഉണ്ടായിരുന്നിടത്ത് ഒരുമാസം കൊണ്ട് 60 രൂപയിലെത്തി എന്നാണ് റിപ്പോർട്ട്. ഓണം, കല്യാണ സീസണുകള്‍ എത്തുന്നതിനു മുന്‍പേ വില ഉയര്‍ന്നത് ജനങ്ങൾക്കിടയിൽ വലിയ ആശങ്ക ഉണ്ടാക്കിയിട്ടുണ്ട്.