സര്‍വകലാശാലകളില്‍ നടന്നത് സര്‍ക്കാര്‍ സ്‌പോണ്‍സേഡ് ഗുണ്ടായിസം; വിഡി സതീശൻ

JULY 8, 2025, 9:22 AM

തിരുവനന്തപുരം: സംസ്ഥാനത്തെ സർവകലാശാലകളിൽ സർക്കാർ സ്‌പോൺസേഡ് ഗുണ്ടായിസമാണ് എസ്.എഫ്.ഐയുടെ നേതൃത്വത്തിൽ നടത്തിയതെന്ന് പ്രതിപക്ഷ നേതാവ് വിഡി സതീശൻ.

സി.പി.എമ്മിന്റെ റെഡ് വോളന്റിയർമാരെ പോലെ എസ്.എഫ്.ഐ പ്രവർത്തകരുടെ അക്രമത്തിന് കേരള പൊലീസും കൂട്ടുനിന്നു. വിവിധ ആവശ്യങ്ങൾക്ക് സർവകലാശാലകളിൽ എത്തിയ വിദ്യാർത്ഥികളെയും ജീവനക്കാരെയും സമരത്തിൻ്റെ മറവിൽ എസ്.എഫ്.ഐ ക്രിമിനൽ സംഘം ആക്രമിച്ചു.

സംസ്ഥാനത്തിന് തന്നെ എന്തൊരു നാണക്കേടാണ് ഈ സർക്കാർ ഉണ്ടാക്കിയത്? ഇത്തരമൊരു വിഷയത്തിൽ ഇങ്ങനെയാണോ പ്രതികരിക്കേണ്ടത്.

എന്തിന്റെ പേരിലുള്ള അക്രമം ആയാലും അതിനെ ന്യായീകരിക്കാനാകില്ല. ആത്യന്തികമായി എസ്.എഫ്.ഐ നടത്തിയ അക്രമസമരം ഉന്നതവിദ്യാഭ്യാസ മേഖലയെയും നമ്മുടെ വിദ്യാർത്ഥികളെയുമാണ് ബാധിക്കുന്നത്. സർക്കാരിൽ ചോദിക്കാനും പറയാനും ആരുമില്ലാത്തതു പോലെയാണ് സി.പി.എമ്മിന്റെ അവസ്ഥയും. ആരെങ്കിലും ചോദിക്കാനുണ്ടായിരുന്നെങ്കിൽ സമരാഭാസം നടത്താൻ എസ്.എഫ്.ഐ തയാറാകുമായിരുന്നോ?

കെ.എസ്.യുവും യൂത്ത് കോൺഗ്രസും യൂത്ത് ലീഗും മഹിളാ കോൺഗ്രസും ഉൾപ്പെടെയുള്ള പ്രതിപക്ഷ സംഘടനകൾ നടത്തുന്ന സമരങ്ങളെ ചോരയിൽ മുക്കിയ അതേ പൊലീസാണ് സി.പി.എമ്മിന്റെ കുട്ടിക്രിമിനലുകൾക്ക് എല്ലാ ഒത്താശയും നൽകിയത്. സി.പി.എമ്മിന് മുന്നിൽ നട്ടെല്ല് പണയംവച്ച പൊലീസ് സേനയെയാണ് കേരളം ഇന്ന് കണ്ടത്. ജനം എല്ലാ കണ്ടുകൊണ്ടിരിക്കുകയാണെന്നത് മറക്കരുതെന്ന് മാത്രമെ സർക്കാരിനോട് പറയാനുള്ളൂവെന്നും അദ്ദേഹം പറഞ്ഞു.