ഇനി വെട്രി ന്യൂസ്? വിജയ്‌യുടെ TVK വാര്‍ത്താ ചാനല്‍ ആരംഭിക്കുന്നുവെന്ന് റിപ്പോര്‍ട്ട്

JUNE 12, 2026, 4:36 AM

ചെന്നൈ: തമിഴ്‌നാട് മുഖ്യമന്ത്രി സി. ജോസഫ് വിജയ്‌യുടെ രാഷ്ട്രീയ പാർട്ടിയായ തമിഴക വെട്രി കഴകം (TVK) സ്വന്തമായി വാർത്താ ചാനൽ ആരംഭിക്കുന്നതായി റിപ്പോർട്ടുകൾ. 'വെട്രി ന്യൂസ്' എന്ന് പേരിട്ടിരിക്കുന്ന ചാനൽ മുഖ്യമന്ത്രി വിജയ്‌യുടെ ജന്മദിനമായ ജൂൺ 22-ന് പ്രവർത്തനം ആരംഭിക്കുമെന്നാണ് സോഷ്യൽ മീഡിയയിൽ ശക്തമായ പ്രചാരണം നടക്കുന്നത്.

സിനിമാ-മാധ്യമ അപ്ഡേറ്റുകൾ പങ്കുവെക്കുന്ന പ്രമുഖ ഇൻസ്റ്റാഗ്രാം പേജുകളാണ് ഈ അവകാശവാദവുമായി രംഗത്തെത്തിയിരിക്കുന്നത്. തമിഴ്‌നാട്ടിൽ മാത്രമല്ല, രാജ്യവ്യാപകമായി തമിഴ് ജനതയെ ലക്ഷ്യമിട്ടാണ് ചാനൽ തുടങ്ങുന്നതെന്നും ഇവരുടെ പോസ്റ്റുകളിൽ പറയുന്നു.

ഇതിന് പിന്നാലെ ചാനലിന്റേതെന്ന പേരിൽ ആരംഭിച്ച ഇൻസ്റ്റാഗ്രാം പേജ് വഴി വിവിധ തസ്തികകളിലേക്ക് ഉദ്യോഗാർത്ഥികളെ തേടിയുള്ള റിക്രൂട്ട്‌മെന്റ് പരസ്യങ്ങളും പ്രത്യക്ഷപ്പെട്ടിട്ടുണ്ട്.

ഡിജിറ്റൽ ടെലിവിഷൻ പ്രവർത്തനങ്ങൾക്കായി ന്യൂസ് എഡിറ്റർ, വീഡിയോഗ്രാഫർ, പ്രോഗ്രാം പ്രൊഡ്യൂസർ, ജില്ലാ റിപ്പോർട്ടർമാർ, വിഷ്വൽ എഡിറ്റർമാർ എന്നിവരിൽ നിന്നാണ് അപേക്ഷ ക്ഷണിച്ചിരിക്കുന്നത്. ജൂൺ 30 ആണ് അപേക്ഷ നൽകേണ്ട അവസാന തീയതിയായി കാണിച്ചിരിക്കുന്നത്.

കറന്റ് അഫയേഴ്‌സ്, രാഷ്ട്രീയം, സാമൂഹിക പ്രശ്നങ്ങൾ, സാമൂഹിക ക്ഷേമം എന്നിവയ്ക്ക് മുൻഗണന നൽകിക്കൊണ്ടായിരിക്കും ചാനലിന്റെ സംപ്രേഷണമെന്നും ഈ പോസ്റ്റുകളിൽ വ്യക്തമാക്കുന്നു. എന്നാൽ, ചാനൽ വാർത്തകളുമായി ബന്ധപ്പെട്ട് തമിഴക വെട്രി കഴകം (TVK) നേതൃത്വത്തിന്റെ ഭാഗത്തുനിന്ന് ഇതുവരെ ഔദ്യോഗിക സ്ഥിരീകരണങ്ങളൊന്നും ലഭ്യമായിട്ടില്ല.