‘ജി സുധാകരൻ പാർട്ടിയുടെ ചങ്കിൽ കുത്തി’; കെ സുധാകരന്റെ രാഷ്ട്രീയ ധർമ്മികത ജി സുധാകരനില്ലെന്ന് സജി ചെറിയാൻ

MARCH 20, 2026, 10:04 PM

അമ്പലപ്പുഴയിലെ സ്വതന്ത്ര സ്ഥാനാർത്ഥിയും മുൻ ഇടതുപക്ഷ പ്രമുഖനുമായ ജി. സുധാകരനെതിരെ മന്ത്രി സജി ചെറിയാൻ കടുത്ത ഭാഷയിൽ ആഞ്ഞടിച്ചു. രാഷ്ട്രീയ ധാർമ്മികത പൂർണ്ണമായും കൈവിട്ട പ്രവർത്തനമാണ് സുധാകരന്റേതെന്നും അദ്ദേഹം സ്വന്തം പാർട്ടിയെ വഞ്ചിച്ചുവെന്നും മന്ത്രി കുറ്റപ്പെടുത്തി.

കോൺഗ്രസ് നേതാവ് കെ. സുധാകരന് സീറ്റ് നിഷേധിക്കപ്പെട്ടിട്ടും അദ്ദേഹം പാർട്ടിയെ ചതിക്കാൻ മുതിർന്നില്ലെന്ന് ചൂണ്ടിക്കാട്ടിയ സജി ചെറിയാൻ, ജി. സുധാകരൻ ചെയ്തത് സ്വന്തം പ്രസ്ഥാനത്തിന്റെ നെഞ്ചിൽ കുത്തുന്നതിന് തുല്യമാണെന്ന് വിശേഷിപ്പിച്ചു. വഞ്ചകരെ കൂട്ടുപിടിച്ച് തിരഞ്ഞെടുപ്പിൽ ജയിക്കാമെന്ന് കോൺഗ്രസ് കരുതേണ്ടെന്നും ചേർത്തലയിൽ നടന്ന രാഷ്ട്രീയ വിശദീകരണ യോഗത്തിൽ മന്ത്രി ഓർമ്മിപ്പിച്ചു.

നിലവിലെ സാഹചര്യത്തിൽ കോൺഗ്രസ് പാർട്ടി പിരിച്ചുവിടുന്നതാണ് നല്ലതെന്ന് സജി ചെറിയാൻ പരിഹസിച്ചു. പാർട്ടിക്കായി ചോരയും നീരും നൽകി കഠിനാധ്വാനം ചെയ്യുന്ന സാധാരണ പ്രവർത്തകർക്ക് അവിടെ യാതൊരു പരിഗണനയും ലഭിക്കുന്നില്ല.

വെള്ളം കോരുന്നവനും വിറക് വെട്ടുന്നവനും വിലയില്ലാത്ത അവസ്ഥയാണ് കോൺഗ്രസിലെന്നും, അവസരവാദികളെ തേടിപ്പിടിച്ച് സ്ഥാനാർത്ഥികളാക്കുന്ന ഗതികേടിലാണ് ആ പാർട്ടിയെന്നും അദ്ദേഹം വിമർശിച്ചു. ആലപ്പുഴയിലെ ഇപ്പോഴത്തെ രാഷ്ട്രീയ മാറ്റങ്ങൾ കോൺഗ്രസിന്റെ തകർച്ചയുടെ തെളിവുകളാണെന്നും അദ്ദേഹം കൂട്ടിച്ചേർത്തു.

രാഷ്ട്രീയ നിലപാടുകളിൽ കുടുംബബന്ധങ്ങളേക്കാൾ പ്രാധാന്യം പ്രസ്ഥാനത്തിനാണെന്ന് സജി ചെറിയാൻ വ്യക്തമാക്കി. താൻ എന്നെങ്കിലും പാർട്ടി വിടാൻ തീരുമാനിച്ചാൽ സ്വന്തം ഭാര്യ പോലും തന്നെ പിന്തുണയ്ക്കില്ലെന്ന് അദ്ദേഹം വെളിപ്പെടുത്തി. തന്റെ ഭാര്യയ്ക്ക് പാർട്ടിയോടാണ് കൂറുള്ളതെന്നും അവർക്ക് സ്വന്തമായി പാർട്ടി അംഗത്വമുണ്ടെന്നും അദ്ദേഹം പറഞ്ഞു. ജി. സുധാകരൻ പാർട്ടി വിട്ടപ്പോൾ ഭാര്യ കൂടെപ്പോയതുപോലെ തന്റെ കാര്യത്തിൽ സംഭവിക്കില്ലെന്ന് ഭാര്യ തന്നെ തന്നോട് പറഞ്ഞിട്ടുണ്ടെന്നും, പാർട്ടിക്കൊപ്പമാണ് തങ്ങളുടെ നിലപാടുകളെന്നും മന്ത്രി ഉറപ്പിച്ചു പറഞ്ഞു.