രമേശ് ചെന്നിത്തല മന്ത്രിസഭയിലേക്ക്?; ചർച്ചകൾക്ക് പിന്നാലെ പ്രശ്നപരിഹാരം ?

MAY 15, 2026, 6:59 AM

തിരുവനന്തപുരം: കോൺഗ്രസ് നേതൃത്വത്തിലെ ചർച്ചകൾക്കും അനുനയ നീക്കങ്ങൾക്കും പിന്നാലെ രമേശ് ചെന്നിത്തല മന്ത്രിസഭയിലേക്ക് എത്താനുള്ള സാധ്യത ശക്തമാകുന്നു. ചെന്നിത്തല കാബിനറ്റിൽ അംഗമാകുമെന്ന കാര്യത്തിൽ നേതാക്കൾക്കിടയിൽ ഏകദേശ ധാരണ രൂപപ്പെടുന്നതായാണ് സൂചന. എന്നാൽ ഏത് വകുപ്പ് നൽകുമെന്ന കാര്യത്തിൽ ഇപ്പോഴും അന്തിമ തീരുമാനമായിട്ടില്ല.

മുഖ്യമന്ത്രി സ്ഥാനവുമായി ബന്ധപ്പെട്ടുണ്ടായ അസ്വാരസ്യങ്ങൾക്ക് പിന്നാലെയായിരുന്നു നിയുക്ത മുഖ്യമന്ത്രി വി ഡി സതീശൻ നേരിട്ട് രമേശ് ചെന്നിത്തലയുടെ വീട്ടിലെത്തി കൂടിക്കാഴ്ച നടത്തിയത്. കൂടിക്കാഴ്ച കോൺഗ്രസിനകത്തെ ഭിന്നതകൾ പരിഹരിക്കുന്നതിലേക്കുള്ള നിർണായക ചുവടുവയ്പായാണ് വിലയിരുത്തപ്പെടുന്നത്.

സന്ദർശനത്തിന് ശേഷം മാധ്യമങ്ങളോട് പ്രതികരിച്ച വി ഡി സതീശൻ, “രമേശ് ചെന്നിത്തല തന്റെ നേതാവാണ്” എന്ന് വ്യക്തമാക്കി. അദ്ദേഹത്തിന്റെ അനുഗ്രഹവും പിന്തുണയും തനിക്കൊപ്പമുണ്ടാകുമെന്ന് സതീശൻ പറഞ്ഞിരുന്നു.

അതേസമയം, മന്ത്രിസ്ഥാനം സംബന്ധിച്ച കാര്യങ്ങൾ പാർട്ടി തീരുമാനിക്കേണ്ട വിഷയമാണെന്നും, താൻ യാതൊരു ഉപാധിയും മുന്നോട്ടുവച്ചിട്ടില്ലെന്നും രമേശ് ചെന്നിത്തല പ്രതികരിച്ചു. കൂടിക്കാഴ്ചക്കിടെ സതീശൻ അദ്ദേഹത്തെ മന്ത്രിസഭയിലേക്ക് ക്ഷണിച്ചതായും റിപ്പോർട്ടുകളുണ്ട്.

ചെന്നിത്തലയെ മന്ത്രിസഭയിൽ ഉൾപ്പെടുത്തുന്നതിലൂടെ പാർട്ടിക്കുള്ളിലെ ഐക്യം ശക്തിപ്പെടുത്താനാകുമെന്ന വിലയിരുത്തലാണ് കോൺഗ്രസ് നേതൃത്വത്തിനുള്ളത്. അതേസമയം ആഭ്യന്തര വകുപ്പ് ഉൾപ്പെടെയുള്ള പ്രധാന വകുപ്പുകളെച്ചൊല്ലിയുള്ള ചർച്ചകൾ ഇപ്പോഴും തുടരുകയാണെന്നാണ് വിവരം.