ജാഗ്രത വേണം; കേരളത്തിൽ അഞ്ചുദിവസം ഇടിമിന്നലിനും ശക്തമായ മഴയ്ക്കും സാധ്യത

MARCH 18, 2026, 4:29 AM

തിരുവനന്തപുരം: സംസ്ഥാനത്ത് അടുത്ത അഞ്ച് ദിവസങ്ങളിൽ മഴയ്ക്ക് സാധ്യതയുണ്ടെന്ന് വ്യക്തമാക്കി കേന്ദ്ര കാലാവസ്ഥാ വകുപ്പ്. പ്രത്യേകിച്ച് ഇന്നും നാളെയും (മാർച്ച് 18, 19) ഒറ്റപ്പെട്ട സ്ഥലങ്ങളിൽ ഇടിമിന്നലോടുകൂടിയ മഴയ്ക്കും മണിക്കൂറിൽ 30 മുതൽ 40 കിലോമീറ്റർ വരെ വേഗതയിലുള്ള കാറ്റിനും സാധ്യതയുണ്ടെന്നാണ് മുന്നറിയിപ്പിൽ വ്യക്തമാക്കുന്നത്.

ഇടിമിന്നൽ ഗുരുതര അപകടങ്ങൾക്ക് കാരണമാകാനിടയുള്ളതിനാൽ ജാഗ്രത പുലർത്തണമെന്ന് അധികൃതർ നിർദേശിച്ചു. മനുഷ്യജീവിതത്തിനും മൃഗങ്ങൾക്കും മാത്രമല്ല, വൈദ്യുത സംവിധാനങ്ങൾക്കും ആശയവിനിമയ ശൃംഖലകൾക്കും വലിയ നാശനഷ്ടം ഉണ്ടാകാൻ ഇടയുണ്ട്.

അതേസമയം, മേഘാവൃതമായ കാലാവസ്ഥ തുടങ്ങുന്ന സമയത്ത് തന്നെ ആവശ്യമായ മുൻകരുതലുകൾ സ്വീകരിക്കണം. ഇടിമിന്നൽ എല്ലായ്പ്പോഴും വ്യക്തമായി കാണാനാവില്ലാത്തതിനാൽ സുരക്ഷാ നിർദേശങ്ങൾ പാലിക്കുന്നതിൽ വീഴ്ച വരുത്തരുതെന്നും മുന്നറിയിപ്പിൽ പറയുന്നു.