മുൻഗണന റേഷൻ കാർഡിന് പുതിയ മാനദണ്ഡങ്ങൾ; 1,200 ചതുരശ്ര അടി വീട്, 800 സിസി കാർ എന്നിവയ്ക്ക് ഇളവ് പരിഗണിക്കും

JULY 4, 2026, 1:24 AM

തിരുവനന്തപുരം: മുൻഗണന റേഷൻ കാർഡിനുള്ള അർഹതാ മാനദണ്ഡങ്ങൾ പുതുക്കാൻ സർക്കാർ നടപടി തുടങ്ങി. സിവിൽ സപ്ലൈസ് കമ്മീഷണർക്ക് പുതിയ മാനദണ്ഡങ്ങൾ തയ്യാറാക്കാൻ ഭക്ഷ്യവകുപ്പ് മന്ത്രി അനൂപ് ജേക്കബ് നിർദേശം നൽകി.

പുതിയ നിർദേശപ്രകാരം 1,200 ചതുരശ്ര അടി വരെ വിസ്തീർണമുള്ള വീടുകൾ, 800 സിസി വരെയുള്ള കാറുകൾ ഉൾപ്പെടെയുള്ള നാല് ചക്ര വാഹനങ്ങൾ, കൂടാതെ ഭൂമിയുണ്ടെങ്കിലും കൃഷിയോഗ്യമല്ലാത്ത സാഹചര്യങ്ങൾ എന്നിവ മുൻഗണനാ റേഷൻ കാർഡിനുള്ള അർഹത നിർണയിക്കുമ്പോൾ പരിഗണിക്കും.

ആദിവാസി, ഗോത്രമേഖലകളിൽ സഞ്ചരിക്കുന്ന റേഷൻ കടകൾ വഴി ഭക്ഷ്യധാന്യം എത്തിക്കുന്ന പദ്ധതിയുടെ സാധ്യതാ റിപ്പോർട്ട് സമർപ്പിക്കാനും മന്ത്രി നിർദേശം നൽകി. സ്കൂൾ-കോളേജ് തലങ്ങളിലെ കൺസ്യൂമർ ക്ലബ്ബുകളുടെ പ്രവർത്തനവും വിലയിരുത്തിയ മന്ത്രി, സംസ്ഥാനത്ത് 1,500 ക്ലബ്ബുകൾ പ്രവർത്തനക്ഷമമാക്കുകയാണ് ലക്ഷ്യമെന്ന് അറിയിച്ചു.

നിലവിൽ 2017ലെ മാനദണ്ഡങ്ങൾ പ്രകാരം 1,000 ചതുരശ്ര അടിയിലധികം വിസ്തീർണമുള്ള വീടുള്ളവർ, നാലോ അതിലധികമോ ചക്രമുള്ള വാഹനം സ്വന്തമായുള്ളവർ (സ്വയം ഓടിക്കുന്ന ടാക്സി ഒഴികെ), ഒരു ഏക്കറിലധികം ഭൂമിയുള്ളവർ എന്നിവർക്ക് മുൻഗണനാ റേഷൻ കാർഡിന് അർഹതയില്ല.

എന്നാൽ, ഇന്നത്തെ സാമൂഹിക സാഹചര്യത്തിൽ 1,000 ചതുരശ്ര അടി വീട് അല്ലെങ്കിൽ ചെറിയ നാല് ചക്ര വാഹനം ആഡംബരമായി കണക്കാക്കാനാകില്ലെന്നും, ഭിന്നശേഷിക്കാരായ കുടുംബാംഗങ്ങളുടെ ആവശ്യങ്ങൾക്കായി വാഹനങ്ങൾ ഉപയോഗിക്കുന്ന കുടുംബങ്ങളും ഉണ്ടെന്നും ചൂണ്ടിക്കാട്ടി മാനദണ്ഡങ്ങളിൽ ഇളവ് വേണമെന്ന ആവശ്യം വിവിധ കോണുകളിൽ നിന്ന് ഉയർന്നിരുന്നു. ഇതിന്റെ അടിസ്ഥാനത്തിലാണ് സർക്കാർ മാനദണ്ഡങ്ങൾ പുനഃപരിശോധിക്കുന്നത്.