കിഫ്ബിയുടെ കടമെടുപ്പ് സംബന്ധിച്ച് ധനവകുപ്പ് ഉന്നയിച്ച എതിർപ്പുകൾ അവഗണിക്കപ്പെട്ടുവെന്ന വിദഗ്ധസമിതി റിപ്പോർട്ടിനെ സാധൂകരിക്കുന്ന കൂടുതൽ വിവരങ്ങൾ പുറത്തുവന്നു. 2023 ജൂൺ ആറിന് മുൻ മുഖ്യമന്ത്രി പിണറായി വിജയന്റെ അധ്യക്ഷതയിൽ ചേർന്ന യോഗത്തിന്റെ മിനിറ്റ്സിലാണ് ഈ വസ്തുതകൾ രേഖപ്പെടുത്തിയിരിക്കുന്നത്.

സംസ്ഥാനത്തിന്റെ കടമെടുപ്പ് പരിധിയെ കിഫ്ബി വായ്പകൾ ദോഷകരമായി ബാധിക്കുമെന്നും ഉയർന്ന പലിശഭാരം വരുത്തിവെക്കുമെന്നും അന്നത്തെ ധനകാര്യ അഡീഷനൽ ചീഫ് സെക്രട്ടറി ബിശ്വനാഥ് സിൻഹ യോഗത്തിൽ മുന്നറിയിപ്പ് നൽകിയിരുന്നു. കിഫ്ബിക്ക് അധിക ഗ്യാരണ്ടി നൽകുന്നതുമായി ബന്ധപ്പെട്ട ചർച്ചയിലാണ് ധനവകുപ്പിന്റെ ഈ നിലപാട് അദ്ദേഹം വ്യക്തമാക്കിയത്.

ധനമന്ത്രിയായിരുന്ന കെ.എൻ. ബാലഗോപാലും ഗ്യാരണ്ടിക്ക് പരിധി നിശ്ചയിക്കണമെന്ന് യോഗത്തിൽ ആവശ്യപ്പെട്ടു. എന്നാൽ, കിഫ്ബി ഫണ്ട് ഉപയോഗിച്ച് വിവിധ വകുപ്പുകൾ നടത്തുന്ന വികസന പ്രവർത്തനങ്ങൾ തടസ്സപ്പെടുത്താനാകില്ലെന്ന നിലപാടാണ് മുഖ്യമന്ത്രിയായിരുന്ന പിണറായി വിജയൻ സ്വീകരിച്ചത്.

എതിർപ്പുകൾ അവഗണിച്ച് കിഫ്ബിക്ക് മൂന്ന് വർഷത്തേക്ക് അധിക ഗ്യാരണ്ടി നൽകാൻ യോഗം തീരുമാനിച്ചു. ധനവകുപ്പിന്റെ എതിർപ്പ് രേഖപ്പെടുത്തിയ ബിശ്വനാഥ് സിൻഹയെ ആഴ്ചകൾക്കുള്ളിൽ ആഭ്യന്തര വകുപ്പ് അഡീഷനൽ ചീഫ് സെക്രട്ടറി സ്ഥാനത്തേക്ക് മാറ്റി.

അധിക ഗ്യാരണ്ടി നൽകേണ്ടതില്ലെന്ന ധനവകുപ്പിന്റെ തീരുമാനം തള്ളിക്കളഞ്ഞത് റൂൾസ് ഓഫ് ബിസിനസ് ലംഘനമാണെന്ന് കിഫ്ബിയുടെ പ്രവർത്തനങ്ങളെക്കുറിച്ച് പഠിച്ച വിദഗ്ധ സമിതി റിപ്പോർട്ടിൽ ചൂണ്ടിക്കാട്ടിയിരുന്നു. ധനവകുപ്പിന്റെ തീരുമാനം മറികടക്കാൻ മന്ത്രിസഭയ്ക്ക് മാത്രമാണ് അധികാരമെന്നും, മന്ത്രിസഭാ തീരുമാനപ്രകാരം ധനവകുപ്പ് ഉത്തരവ് പുറപ്പെടുവിക്കേണ്ടിയിരുന്നുവെന്നും സമിതി വ്യക്തമാക്കി.

എന്നാൽ, ഈ നടപടിക്രമങ്ങളൊന്നും പാലിക്കാതെയാണ് കിഫ്ബി കടമെടുപ്പിന് മൂന്നു വർഷത്തേക്ക് കൂടി സർക്കാർ അധിക ഗ്യാരണ്ടി അനുവദിച്ചത്.

English Summary: New evidence confirms that KIIFB took loans despite opposition from the Finance Department. A meeting chaired by former Chief Minister Pinarayi Vijayan on June 6, 2023, revealed that then Additional Chief Secretary of Finance, Biswanath Sinha, warned against the high-interest burden and its impact on the state's borrowing limit. Despite objections from the Finance Department, including then Finance Minister K N Balagopal, the government decided to provide additional guarantees for three years. Sinha was subsequently transferred to the Home Department, raising questions about the adherence to rules of business.

Tags: Malayalam News, News Malayalam, Latest Malayalam News, Vachakam News, KIIFB, Kerala Politics, Pinarayi Vijayan, Finance Department, Biswanath Sinha

ചിത്രം: Sanu N, CC BY-SA 4.0, via Wikimedia Commons

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്