ഹെൽമെറ്റില്ലാത്തതിന് പിഴ 500 വേണ്ട, 250 മതി! ഓഫർ ഏപ്രിൽ 30 വരെ

APRIL 23, 2026, 9:58 PM

കൊച്ചി: റോഡിലെ പഴയ ട്രാഫിക് നിയമലംഘനങ്ങൾക്ക് ലഭിച്ച പിഴത്തുക പകുതിയായി കുറച്ച് തീർപ്പാക്കാൻ മോട്ടോർ വാഹന വകുപ്പ് 'അമ്‌നസ്റ്റി സ്‌കീം 2026' പ്രഖ്യാപിച്ചു. ഹെൽമെറ്റ് ധരിക്കാത്തതിന് 500 രൂപ പിഴ ലഭിച്ചവർക്ക് ഈ പദ്ധതിയിലൂടെ 250 രൂപ അടച്ച് കേസുകൾ അവസാനിപ്പിക്കാം.

2024 ഡിസംബർ 31 വരെ പോലീസോ മോട്ടോർ വാഹന വകുപ്പോ ചുമത്തിയ പിഴകൾക്കാണ് ഈ ഇളവ് ബാധകം. പിഴത്തുക വലിയ ബാധ്യതയായതിനെ തുടർന്ന് പണമടയ്ക്കാൻ കഴിയാത്തവർക്കും സാങ്കേതിക കാരണങ്ങളാൽ കുടുങ്ങിക്കിടക്കുന്നവർക്കും ആശ്വാസമേകാനാണ് സർക്കാർ ഈ തീരുമാനം കൈക്കൊണ്ടിരിക്കുന്നത്. നിശ്ചിത സമയത്തിനുള്ളിൽ അടയ്ക്കാൻ കഴിയാത്ത ചെല്ലാനുകൾക്കും 50 ശതമാനം ഇളവ് ലഭിക്കും. എന്നാൽ കോടതി നേരിട്ട് പരിഗണിക്കുന്ന കേസുകൾക്ക് ഈ ആനുകൂല്യം ലഭ്യമല്ല.

എറണാകുളം ജില്ലയിലുള്ളവർക്ക് ഏപ്രിൽ 27 മുതൽ 30 വരെ കളക്ടറേറ്റ് സമുച്ചയത്തിലെ എൻഫോഴ്‌സ്‌മെന്റ് ആർ.ടി.ഒ. ഓഫീസിൽ നേരിട്ടെത്തി അദാലത്തിൽ പങ്കെടുക്കാവുന്നതാണ്. രാവിലെ 10.30 മുതൽ വൈകുന്നേരം 5 മണി വരെയാണ് അദാലത്ത് സമയം.

നേരിട്ട് എത്താൻ കഴിയാത്തവർക്ക് മോട്ടോർ വാഹന വകുപ്പിന്റെ ഔദ്യോഗിക വെബ്സൈറ്റ് വഴി ഓൺലൈനായും പിഴ അടച്ചു തീർക്കാം. പോർട്ടലിലെ സാങ്കേതിക തകരാറുകൾ മൂലം പിഴയടയ്ക്കാൻ ബുദ്ധിമുട്ടുന്നവർക്ക് അദാലത്ത് വലിയൊരു പരിഹാരമാകും.

ഏപ്രിൽ 30-ന് ശേഷം പഴയ നിരക്കിൽ തന്നെ പിഴ അടയ്ക്കേണ്ടി വരുമെന്നും, അതിനാൽ പരമാവധി ആളുകൾ ഈ സുവർണാവസരം പ്രയോജനപ്പെടുത്തണമെന്നും അധികൃതർ അറിയിച്ചു.