പാമ്പ് പേടിയിൽ കേരളം; സംസ്ഥാനത്ത് ഒരു ദിവസത്തിൽ 23 പാമ്പുകടി കേസുകൾ; ജാഗ്രത നിർദേശങ്ങളുമായി ആരോഗ്യ വകുപ്പ്

APRIL 26, 2026, 9:55 PM

തിരുവനന്തപുരം: സംസ്ഥാനത്ത് ഇന്നലെ മാത്രം 23 പാമ്പ് കടിയേറ്റ കേസുകൾ റിപ്പോർട്ട് ചെയ്തതായി റിപ്പോർട്ട്. 108 ആംബുലൻസ് സർവീസിന്റെ കണക്കുകൾ പ്രകാരം കണ്ണൂർ, കോഴിക്കോട്, മലപ്പുറം, കോട്ടയം ജില്ലകളിലാണ് ഏറ്റവും കൂടുതൽ കേസുകൾ രജിസ്റ്റർ ചെയ്തത്.

ഈ നാല് ജില്ലകളിൽ നാല് കേസുകൾ വീതം റിപ്പോർട്ട് ചെയ്തു എന്നാണ് റിപ്പോർട്ടുകൾ വ്യക്തമാക്കുന്നത്. കൊല്ലത്ത് മൂന്ന് കേസുകളും പത്തനംതിട്ടയിൽ രണ്ട് കേസുകളും, എറണാകുളം, പാലക്കാട് ജില്ലകളിൽ ഓരോ കേസ് വീതവും രേഖപ്പെടുത്തി.

അതേസമയം, പാമ്പ് കടിയേറ്റതായി സംശയിക്കുന്ന ഒൻപത് കേസുകളും റിപ്പോർട്ട് ചെയ്തു. കൊല്ലത്തും കോഴിക്കോടും രണ്ട് കേസുകൾ വീതവും, കണ്ണൂർ, മലപ്പുറം, കോട്ടയം, പാലക്കാട്, തിരുവനന്തപുരം ജില്ലകളിൽ ഓരോ കേസുകളും രേഖപ്പെടുത്തി.

പ്രധാന മുൻകരുതലുകൾ

വീടിനോട് ചേർന്നുള്ള പുൽക്കാടുകൾ, കരിയിലക്കൂട്ടങ്ങൾ, വിറക് കൂട്ടിയിടങ്ങൾ എന്നിവ വൃത്തിയാക്കുക.
വാതിലുകളും ജനാലകളും അടുക്കള ഭാഗങ്ങളിലെ വിടവുകൾ അടയ്ക്കുക.
ജനലുകൾ തുറന്നിടുമ്പോൾ നെറ്റ് ഉപയോഗിക്കുക.
ഭക്ഷണാവശിഷ്ടങ്ങൾ പുറത്തുവിടുന്നത് ഒഴിവാക്കുക (എലികളെ ആകർഷിക്കാതിരിക്കാൻ).
രാത്രി പുറത്തിറങ്ങുമ്പോൾ ടോർച്ച് കരുതുക.
ഷൂസ്, ചെരുപ്പുകൾ ധരിക്കുന്നതിന് മുമ്പ് പരിശോധിക്കുക.
തറയിൽ കിടന്ന് ഉറങ്ങുന്നത് ഒഴിവാക്കി കട്ടിലിലോ കൊതുകുവലയ്ക്കുള്ളിലോ ഉറങ്ങുക.

പ്രഥമ ശുശ്രൂഷ

പരിഭ്രാന്തരാകാതിരിക്കുക; ശരീരം അനക്കാതിരിക്കുക.
കടിയേറ്റ വ്യക്തിയെ ശാന്തമായി ഇരുത്തുക അല്ലെങ്കിൽ കിടത്തുക.
മുറിവ് അമർത്തുകയോ മുറിവുണ്ടാക്കുകയോ ചെയ്യരുത്.
കയറോ തുണിയോ മുറുക്കി കെട്ടരുത്.
എത്രയും വേഗം ആന്റി സ്നേക്ക് വെനം ലഭ്യമായ ആശുപത്രിയിൽ എത്തിക്കുക.

ശംഖുവരയൻ പോലുള്ള ചില പാമ്പുകളുടെ കടി പലപ്പോഴും വേദനയില്ലാതെ സംഭവിക്കാമെന്നും, ലക്ഷണങ്ങൾ വ്യക്തമായില്ലെങ്കിലും സംശയം തോന്നിയാൽ ഉടൻ ചികിത്സ തേടണമെന്നും ആരോഗ്യ വിദഗ്ധർ മുന്നറിയിപ്പ് നൽകുന്നു.