ഗണഗീത വിവാദം വിവാദങ്ങളിൽ നിന്ന് ശ്രദ്ധ തിരിക്കാൻ; കേന്ദ്രമന്ത്രി ജോർജ് കുര്യൻ

NOVEMBER 9, 2025, 1:59 AM

തൃശൂർ: എറണാകുളം - ബംഗളൂരു വന്ദേഭാരത് എക്‌സ്പ്രസ് ഫ്‌ളാഗ് ഓഫ് ചടങ്ങിനിടെ വിദ്യാർഥികൾ ആർ.എസ്.എസ് ഗണഗീതം പാടിയ സംഭവത്തിൽ പ്രതികരണവുമായി കേന്ദ്രമന്ത്രി ജോർജ് കുര്യൻ. കുട്ടികൾ ഗണഗീതം പാടിയതിൽ തെറ്റില്ലെന്നും ഇത് വിവാദങ്ങളിൽ നിന്ന് ശ്രദ്ധ തിരിക്കാനുള്ള സി.പി.എം ശ്രമമാണെന്നും അദ്ദേഹം പറഞ്ഞു.

ഗാനത്തിന്റെ ഒരു വാക്കിൽ പോലും ആർ.എസ്.എസിനെ പരാമർശിക്കുന്നില്ല. ദേശഭക്തിയാണ് ഗാനത്തിന്റെ ആശയം. ആർ.എസ്.എസ് പാടുന്ന വന്ദേമാതരം പാർലമെന്റിൽ പാടുന്നില്ലേ കുട്ടികൾ അത് പാടിയതിൽ തെറ്റില്ല. ബി.ജെ.പി എല്ലാ വേദികളിലും ഇത് ആലപിക്കണമെന്നും ജോർജ് കുര്യൻ പറഞ്ഞു.

കോൺഗ്രസ് ആദ്യം ഗണഗീതം പാടിയ ശിവകുമാറിനെ തിരുത്തട്ടെയെന്നു പറഞ്ഞ ജോർജ് കുര്യൻ തനിക്ക് ഗണഗീതം പാടാൻ അറിയില്ലെന്നും ശാഖയിൽ പോയിട്ടില്ലെന്നും കൂട്ടിച്ചേർത്തു.

നേരത്തെ മുഖ്യമന്ത്രി പിണറായി വിജയനും പ്രതിപക്ഷ നേതാവ് വി.ഡി. സതീശനും ഉൾപ്പെടെയുള്ളവർ ഗണഗീതാലപനത്തെ രൂക്ഷമായി വിമർശിച്ച് രംഗത്തെത്തിയിരുന്നു. ഇതിനു പിന്നാലെ സംഭവത്തിൽ വിദ്യാഭ്യാസ മന്ത്രി വി. ശിവൻകുട്ടി അന്വേഷണത്തിന് ഉത്തരവിടുകയും ചെയ്തിരുന്നു. അന്വേഷണം ആവശ്യപ്പെട്ട് കോൺഗ്രസ് നേതാവ് കെ.സി. വേണുഗോപാൽ എംപി റെയിൽവേ മന്ത്രിക്ക് കത്ത് നൽകിയിട്ടുണ്ട്.