വി.ഡി. സതീശന് മറുപടി പറയാൻ ആരുമില്ല; സഭയിലെ സിപിഐഎം നേതാക്കളെ വിമർശിച്ച് ജി. സുധാകരൻ

JUNE 7, 2026, 7:49 AM

ആലപ്പുഴ: നിയമസഭയിലെ സിപിഐഎം നേതാക്കളുടെ പ്രവർത്തനത്തെയും പാർട്ടിയുടെ നിലവിലെ രാഷ്ട്രീയ നിലപാടുകളെയും വിമർശിച്ച് മുതിർന്ന നേതാവും മുൻ മന്ത്രിയുമായ ജി. സുധാകരൻ രംഗത്ത്. നിയമസഭയിലെ ചില നേതാക്കളുടെ പ്രകടനത്തിൽ തനിക്ക് നിരാശയുണ്ടെന്നും അദ്ദേഹം പറഞ്ഞു.

പ്രതിപക്ഷ നേതാവ് വി.ഡി. സതീശനെതിരെ ഫലപ്രദമായി മറുപടി പറയാൻ ഭരണപക്ഷത്ത് നിന്ന് ആരും മുന്നോട്ടുവരുന്നില്ലെന്ന് സുധാകരൻ വിമർശിച്ചു. മുൻ ധനമന്ത്രി തോമസ് ഐസക് സഭയിലുണ്ടായിരുന്നെങ്കിൽ ശക്തമായ മറുപടി നൽകിയേനെ എന്നും അദ്ദേഹം അഭിപ്രായപ്പെട്ടു.

ഇടതുപക്ഷമോ വലതുപക്ഷമോ എന്നത് പുറംകാഴ്ചകളിലൂടെ നിർവചിക്കാനാവില്ലെന്നും രാഷ്ട്രീയ നിലപാടുകളിലൂടെയാണ് അത് വിലയിരുത്തപ്പെടേണ്ടതെന്നും അദ്ദേഹം പറഞ്ഞു. ആലപ്പുഴ നഗരസഭയിലെ നേതൃത്വമാറ്റം ചൂണ്ടിക്കാട്ടിയ സുധാകരൻ, ചില സംഘടനാപരമായ തീരുമാനങ്ങൾ എൽഡിഎഫിന് ഭരണനഷ്ടമുണ്ടാക്കിയെന്നും വിമർശിച്ചു.

കേരളത്തിലെ നിലവിലെ രാഷ്ട്രീയ സാഹചര്യത്തിൽ കോൺഗ്രസ് ശക്തമായ മുന്നേറ്റം നടത്തുകയാണെന്നും അദ്ദേഹം അഭിപ്രായപ്പെട്ടു. രാജ്യത്തെ മതനിരപേക്ഷ രാഷ്ട്രീയ ശക്തികളിൽ കോൺഗ്രസിന് പിന്നാലെ വലിയ സ്വാധീനമുള്ള പാർട്ടിയാണ് മുസ്ലിം ലീഗെന്നും സുധാകരൻ പറഞ്ഞു.

അതേസമയം, സിപിഐഎമ്മിന്റെ വിശ്വാസ്യതയ്ക്ക് തിരിച്ചടിയേറ്റിട്ടുണ്ടെന്നും പാർട്ടി സ്വയം വിലയിരുത്തൽ നടത്തേണ്ട സാഹചര്യമാണുള്ളതെന്നും അദ്ദേഹം കൂട്ടിച്ചേർത്തു.