ഇ എൻ സുരേഷ് ബാബുവിനെതിരെ വിജിലൻസിൽ പരാതി

OCTOBER 19, 2026, 11:16 AM

പാലക്കാട്: സിപിഎം പാലക്കാട് മുൻ ജില്ലാ സെക്രട്ടറി ഇ എൻ സുരേഷ് ബാബുവിനെതിരെ ഗുരുതരമായ സാമ്പത്തിക ക്രമക്കേടുകളും അനധികൃത സ്വത്ത് സമ്പാദനവും ആരോപിച്ച് വിജിലൻസിൽ പരാതി.

പാലക്കാട്ടെ മൂന്ന് സഹകരണ സ്ഥാപനങ്ങൾ കേന്ദ്രീകരിച്ച് വലിയ തോതിൽ സാമ്പത്തിക ക്രമക്കേടുകൾ നടന്നിട്ടുണ്ടെന്ന് പരാതിയിൽ ആരോപിക്കുന്നു. ചിറ്റൂർ താലൂക്ക് ടൂറിസം കോ-ഓപ്പറേറ്റീവ് സൊസൈറ്റി ആൻഡ് റിസർച്ച് സെന്‍റർ, പാലക്കാട് ജില്ലാ എൻജിനീയറിങ് സഹകരണ സംഘം, ചിറ്റൂർ താലൂക്ക് പ്രവാസി ക്ഷേമ സഹകരണ സംഘം എന്നിവയുടെ ഇടപാടുകളാണ് അന്വേഷണ പരിധിയിൽ ഉൾപ്പെടുത്താൻ ആവശ്യപ്പെട്ടിട്ടുള്ളത്.

സിഎംപിയുടെ സംസ്ഥാന യുവ നേതാവ് വി മുസ്തഫയാണ് വിജിലൻസ് ആൻഡ് ആന്‍റി കറപ്ഷൻ ബ്യൂറോ ഡയറക്ടർക്ക് പരാതി നൽകിയിരിക്കുന്നത്. അനധികൃത സ്വത്ത് സമ്പാദനം, സാമ്പത്തിക ഇടപാടുകൾ, കള്ളപ്പണം വെളുപ്പിക്കൽ, ബിനാമി നിക്ഷേപങ്ങൾ എന്നിവ സമഗ്രമായി അന്വേഷിക്കണമെന്നാണ് പരാതിയിലെ ആവശ്യം.

പരാതിയിൽ സൂചിപ്പിച്ചിരിക്കുന്ന സഹകരണ സ്ഥാപനങ്ങൾ വഴി ബിനാമി നിക്ഷേപങ്ങളും കണക്കിൽപ്പെടാത്ത പണത്തിന്‍റെ ഇടപാടുകളും നടന്നിട്ടുണ്ടോയെന്ന് പരിശോധിക്കണം. കൂടാതെ വായ്പാ വിതരണത്തിലെ ക്രമക്കേടുകൾ, സ്വത്ത് മൂല്യനിർണയത്തിലെ കൃത്രിമം, സ്ഥാപനങ്ങളുടെ ഫണ്ട് വഴിതിരിച്ചുവിടൽ എന്നിവയും അന്വേഷിക്കണമെന്ന് ആവശ്യപ്പെട്ടിട്ടുണ്ട്.