ഡൽഹി: ലേണേഴ്‌സ് ലൈസൻസ് പരീക്ഷയിലെ വിജയശതമാനം ഉയർത്തുന്നതും ലൈസൻസിലെ വിവരങ്ങൾ തിരുത്തുന്നതിനുള്ള ഫീസ് ഒഴിവാക്കുന്നതും ഉൾപ്പെടെ ഡ്രൈവിങ് ലൈസൻസ് നടപടികളിൽ മാറ്റം നിർദേശിച്ച് കേന്ദ്ര സർക്കാർ മോട്ടോർ വാഹന ചട്ടഭേദഗതിയുടെ കരട് പുറത്തിറക്കി. നിലവിൽ 60 ശതമാനം മാർക്ക് മതിയാകുന്ന പരീക്ഷയിൽ വിജയിക്കാൻ 75 ശതമാനം നേടണമെന്നാണ് നിർദേശം. അപേക്ഷ നൽകി 15 ദിവസത്തിനകം റോഡ് സുരക്ഷാ ക്ലാസിൽ പങ്കെടുക്കണമെന്നും കരടിൽ പറയുന്നു.

ആരോഗ്യവിവരങ്ങളും അപേക്ഷയിൽ ഉൾപ്പെടുത്തും

ഡ്രൈവിങ് ലൈസൻസിനായി അപേക്ഷിക്കുന്നവരുടെ ആരോഗ്യസ്ഥിതി സംബന്ധിച്ച വിവരങ്ങളും ഇനി ശേഖരിക്കാനാണ് നിർദേശം. അപസ്മാരമുണ്ടോ, അതിനുള്ള മരുന്നുകൾ ഉപയോഗിക്കുന്നുണ്ടോ തുടങ്ങിയ കാര്യങ്ങൾ അപേക്ഷയിലെ ചോദ്യാവലിയിൽ ഉൾപ്പെടുത്തും. കാഴ്ചക്കുറവ്, രാത്രികാഴ്ചയിലെ പ്രശ്നങ്ങൾ, കൈകാലുകളുടെ പ്രവർത്തനപരിമിതി എന്നിവയും വെളിപ്പെടുത്തണം.

മരുന്നുകളോടുള്ള അലർജി, ശരീരത്തിൽ ഇംപ്ലാന്റുകൾ ഉണ്ടോ തുടങ്ങിയ വിവരങ്ങളും അപേക്ഷകരോട് ചോദിക്കും. ചില ആരോഗ്യവിവരങ്ങൾ റോഡ് അപകടത്തെ തുടർന്ന് ആശുപത്രിയിൽ പ്രവേശിപ്പിക്കേണ്ട സാഹചര്യമുണ്ടായാൽ മാത്രമേ ഉപയോഗിക്കാവൂ എന്നും കരട് വ്യക്തമാക്കുന്നു.

ലൈസൻസിൽ രക്തഗ്രുപ്പും അടിയന്തര ബന്ധപ്പെടേണ്ട വിവരങ്ങളും

ലൈസൻസിൽ രക്തഗ്രുപ്പ്, അവയവദാനത്തിനുള്ള സന്നദ്ധത, അടിയന്തര സാഹചര്യത്തിൽ ബന്ധപ്പെടേണ്ട വ്യക്തിയുടെ പേര്, ഫോൺ നമ്പർ തുടങ്ങിയവ ഉൾപ്പെടുത്താനും നിർദേശമുണ്ട്.

നിലവിലുള്ള സ്മാർട്ട് കാർഡിന് പകരം പിവിസി ലാമിനേറ്റഡ് കാർഡ് നൽകാനാണ് ശുപാർശ. ലൈസൻസിലെ വിവരങ്ങൾ ക്യൂആർ കോഡ് ഉപയോഗിച്ച് പരിശോധിക്കാനും സാധിക്കും.

വിവരങ്ങൾ തിരുത്താനുള്ള നടപടികൾ ലളിതമാകും

ലൈസൻസിലെ പേര്, വിലാസം, മറ്റ് വിവരങ്ങൾ എന്നിവ തിരുത്തുന്നതിനുള്ള നടപടികൾ കൂടുതൽ ലളിതമാക്കാനും കരടിൽ നിർദേശമുണ്ട്.

വിലാസം മാറ്റുന്നതിനുള്ള അപേക്ഷയിൽ 30 ദിവസത്തിനകം തീരുമാനമെടുത്തില്ലെങ്കിൽ അത് അംഗീകരിച്ചതായി കണക്കാക്കും. മറ്റ് വിവരങ്ങൾ തിരുത്താനുള്ള അപേക്ഷകളിൽ 15 ദിവസത്തിനകം തീരുമാനമെടുക്കണം. അപേക്ഷ നിരസിക്കുകയാണെങ്കിൽ അതിനുള്ള കാരണം വ്യക്തമാക്കണമെന്നും നിർദേശമുണ്ട്.

വിവരങ്ങൾ തിരുത്തൽ, വിലാസമാറ്റം, മൊബൈൽ നമ്പർ, ഇമെയിൽ വിലാസം എന്നിവ പുതുക്കൽ, ലൈസൻസ് പുതുക്കൽ തുടങ്ങിയ സേവനങ്ങൾക്ക് ഫീസ് ഒഴിവാക്കാനും ശുപാർശയുണ്ട്.

വിലാസം തെളിയിക്കാൻ കൂടുതൽ രേഖകൾ

ലൈസൻസിനായി വിലാസം തെളിയിക്കുന്നതിന് ആധാർ കാർഡ്, വോട്ടർ തിരിച്ചറിയൽ കാർഡ്, പാസ്‌പോർട്ട്, ഇ-റേഷൻ കാർഡ്, സർക്കാർ സ്ഥാപനങ്ങൾ നൽകുന്ന തിരിച്ചറിയൽ രേഖകൾ, പെൻഷൻ രേഖകൾ എന്നിവയിൽ ഏതെങ്കിലും സമർപ്പിക്കാം.

മൂന്ന് മാസത്തിൽ കൂടുതൽ പഴക്കമില്ലാത്ത വൈദ്യുതി ബില്ലും ഗാർഹിക പാചകവാതക ബില്ലും വിലാസരേഖയായി സ്വീകരിക്കാമെന്നും കരട് നിർദേശിക്കുന്നു.

മോട്ടോർ വാഹന ചട്ടങ്ങളിൽ നിർദേശിച്ചിരിക്കുന്ന ഈ മാറ്റങ്ങൾ കരടിന്റെ അടിസ്ഥാനത്തിലുള്ളവയാണ്. അന്തിമ വിജ്ഞാപനവും പ്രാബല്യത്തിലുള്ള തീയതിയും സ്ഥിരീകരിച്ച ശേഷമേ മാറ്റങ്ങൾ നടപ്പിലാകുന്ന കാര്യം ഉറപ്പിക്കാനാകൂ.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്