കെ. കൃഷ്ണൻകുട്ടിയുടെ പേരിൽ പ്രചരിച്ച ശബ്ദരേഖ: ക്രൈംബ്രാഞ്ച് അന്വേഷണത്തിന് ഉത്തരവ്

JULY 14, 2026, 8:13 AM

തിരുവനന്തപുരം: മുൻ മന്ത്രി കെ. കൃഷ്ണൻകുട്ടിയുടേതെന്ന പേരിൽ പ്രചരിച്ച വിവാദ ശബ്ദരേഖ സംബന്ധിച്ച് ക്രൈംബ്രാഞ്ച് അന്വേഷണം നടത്താൻ ആഭ്യന്തര മന്ത്രി രമേശ് ചെന്നിത്തല നിർദേശം നൽകി. ശബ്ദരേഖയുടെ ആധികാരികതയും പ്രചരണത്തിന് പിന്നിലെ സാഹചര്യങ്ങളും അന്വേഷിക്കാനാണ് ക്രൈംബ്രാഞ്ചിനെ ചുമതലപ്പെടുത്തിയിരിക്കുന്നത്.

2018-ലെ പ്രളയം മനുഷ്യനിർമിതമാണെന്ന തരത്തിലുള്ള പരാമർശങ്ങൾ ഉൾപ്പെട്ടതായി പറയുന്ന ശബ്ദരേഖ 2026 ഏപ്രിൽ 7-ന് വാർത്താസമ്മേളനത്തിൽ മാത്യു കുഴൽനാടൻ പുറത്തുവിട്ടിരുന്നു. ഇത് കെ. കൃഷ്ണൻകുട്ടിയുടെ പഴയ സംഭാഷണമാണെന്നായിരുന്നു അദ്ദേഹത്തിന്റെ അവകാശവാദം.

ശബ്ദരേഖയിൽ തോട്ടപ്പള്ളി സ്പിൽവേ, മണിയാർ പദ്ധതി, പരമ്പിക്കുളം ഉൾപ്പെടെയുള്ള ജലസംഭരണികളും പ്രളയനിയന്ത്രണവുമായി ബന്ധപ്പെട്ട തീരുമാനങ്ങളും പരാമർശിക്കപ്പെടുന്നുണ്ട്. കരാറുകാർക്ക് സാമ്പത്തിക നേട്ടം ലഭിക്കുന്നതിനായി ജലനിയന്ത്രണത്തിൽ വീഴ്ച വരുത്തിയെന്ന തരത്തിലുള്ള ആരോപണങ്ങളാണ് സംഭാഷണത്തിലുണ്ടെന്ന് പുറത്തുവന്നിരുന്നു.

എന്നാൽ ശബ്ദരേഖ തന്റേതല്ലെന്ന് മുൻ മന്ത്രി കെ. കൃഷ്ണൻകുട്ടി ഉടൻ തന്നെ നിഷേധിച്ചിരുന്നു. രാഷ്ട്രീയ ലക്ഷ്യത്തോടെ കൃത്രിമമായി തയ്യാറാക്കിയ ശബ്ദരേഖയാണിതെന്നും, ഇതിന് പിന്നിൽ ഗൂഢലക്ഷ്യമുണ്ടെന്നും അദ്ദേഹം ആരോപിച്ചു. ശബ്ദരേഖ ശാസ്ത്രീയ പരിശോധനയ്ക്ക് വിധേയമാക്കണമെന്നും നിയമനടപടി സ്വീകരിക്കുമെന്നും മന്ത്രി വ്യക്തമാക്കിയിരുന്നു.

ശബ്ദരേഖയിൽ പരാമർശിക്കപ്പെട്ട മുൻ മന്ത്രി മാത്യു ടി. തോമസും ആരോപണങ്ങൾ തള്ളി രംഗത്തെത്തിയിരുന്നു. ശബ്ദരേഖ വ്യാജമാണെന്നും സാങ്കേതിക വിദ്യ ഉപയോഗിച്ച് കൃത്രിമമായി സൃഷ്ടിച്ചതാണെന്നുമാണ് അദ്ദേഹത്തിന്റെ പ്രതികരണം. 2018-ലെ പ്രളയത്തിന് കാരണം അതിതീവ്ര മഴയാണെന്നും, അത് സംബന്ധിച്ച പഠന റിപ്പോർട്ടുകൾ നിലവിലുണ്ടെന്നും അദ്ദേഹം ചൂണ്ടിക്കാട്ടി. ആരോപണങ്ങൾക്കെതിരെ നിയമനടപടി സ്വീകരിക്കുമെന്നും മാത്യു ടി. തോമസ് അറിയിച്ചിരുന്നു.

വിവാദം രാഷ്ട്രീയതലത്തിൽ ചർച്ചയായ സാഹചര്യത്തിലാണ് ശബ്ദരേഖയുടെ യാഥാർഥ്യം കണ്ടെത്തുന്നതിനായി ക്രൈംബ്രാഞ്ച് അന്വേഷണം നടത്താൻ സർക്കാർ തീരുമാനിച്ചത്.