അട്ടപ്പാടി ഇരട്ടക്കൊലപാതകം; യുവതിയെയും കുഞ്ഞിനെയും കൊലപ്പെടുത്തിയ പ്രതി പശ്ചിമബംഗാളിൽ പിടിയിൽ

SEPTEMBER 8, 2026, 5:57 AM

പാലക്കാട്: അട്ടപ്പാടിയിൽ യുവതിയെയും കുഞ്ഞിനെയും കൊലപ്പെടുത്തിയ കേസിൽ പ്രതി പിടിയിൽ. പശ്ചിമബംഗാൾ സ്വദേശിയായ പ്രാവത് ദാസിനെയാണ് പ്രത്യേക അന്വേഷണ സംഘം പിടികൂടിയത്. പാലക്കാട് നിന്ന് പശ്ചിമബംഗാളിലെത്തിയാണ് പൊലീസ് ഇയാളെ കസ്റ്റഡിയിലെടുത്തത്.

കൊലപാതകം നടത്തിയതായി പ്രതി പൊലീസിനോട് സമ്മതിച്ചെന്നാണ് അന്വേഷണ സംഘത്തിന്റെ വിശദീകരണം. കൊല്ലപ്പെട്ട യുവതി തന്റെ ഭാര്യയല്ലെന്നും രണ്ട് മാസമായി മാത്രമാണ് പരിചയമുണ്ടായിരുന്നതെന്നും പ്രതി മൊഴി നൽകിയിട്ടുണ്ട്. എന്നാൽ കൊലപാതകത്തിലേക്ക് നയിച്ച കൃത്യമായ കാരണം ഇതുവരെ വ്യക്തമായിട്ടില്ലെന്ന് പൊലീസ് അറിയിച്ചു.

കഴിഞ്ഞ രണ്ട് മാസമായി പ്രതി യുവതിക്കൊപ്പം താമസിച്ചുവരികയായിരുന്നുവെന്നാണ് അന്വേഷണത്തിൽ വ്യക്തമായത്. ഭവാനിപ്പുഴയിൽ ചാക്കിൽ കെട്ടിയ നിലയിലാണ് യുവതിയുടെയും കുഞ്ഞിന്റെയും മൃതദേഹങ്ങൾ കണ്ടെത്തിയത്. പുഴയിൽവച്ചുതന്നെയാണ് കൊലപാതകം നടന്നതെന്നാണ് പൊലീസിന്റെ പ്രാഥമിക നിഗമനം.