തിരുവനന്തപുരം: കോളിളക്കം സൃഷ്ടിച്ച 2008 ലെ കേരള സര്‍വകലാശാല അസിസ്റ്റന്റ് നിയമന തട്ടിപ്പ് കേസ് എഴുതിത്തള്ളാനുള്ള നീക്കങ്ങള്‍ പൂര്‍ണ്ണമായി പരാജയപ്പെട്ടു. മുന്‍ സര്‍വ്വകലാശാല വൈസ് ചാന്‍സലര്‍, പ്രോ-വൈസ് ചാന്‍സലര്‍, നാല് സിന്‍ഡിക്കേറ്റ് അംഗങ്ങള്‍, രജിസ്ട്രാര്‍ എന്നിവരുള്‍പ്പെടെ ഏഴ് പ്രമുഖര്‍ക്കെതിരെ പ്രോസിക്യൂഷന്‍ നടപടികളുമായി മുന്നോട്ടുപോകാന്‍ ക്രൈംബ്രാഞ്ച് തീരുമാനിച്ചു. അന്വേഷണം പൂര്‍ത്തിയാക്കിയ ക്രൈംബ്രാഞ്ച്, അന്തിമ കുറ്റപത്രം സമര്‍പ്പിക്കുന്നതിനായുള്ള ഫയല്‍ എ.ഡി.ജി.പി എച്ച്. വെങ്കിടേഷിന് കൈമാറി. എ.ഡി.ജി.പിയുടെ ഔദ്യോഗിക അംഗീകാരം ലഭിക്കുന്നതോടെ കേസിന്റെ വിചാരണ നടപടികള്‍ വിജിലന്‍സ് കോടതിയിലേക്ക് മാറ്റപ്പെടും.
നാല്‍പ്പതിനായിരത്തോളം ഉദ്യോഗാര്‍ത്ഥികള്‍ പങ്കെടുത്ത പരീക്ഷയുടെ ഒ.എം.ആര്‍ ഉത്തരക്കടലാസുകള്‍ ബോധപൂര്‍വ്വം നശിപ്പിച്ച ശേഷമാണ് ഈ വന്‍ തട്ടിപ്പ് നടത്തിയത്. തുടര്‍ന്ന് പ്രത്യേക അഭിമുഖം സംഘടിപ്പിച്ച് ഭരണകക്ഷി അനുഭാവികളെയും ഉന്നത ഉദ്യോഗസ്ഥരുടെയും ജനപ്രതിനിധികളുടെയും ബന്ധുക്കളെയും റാങ്ക് പട്ടികയുടെ മുന്‍നിരയില്‍ തിരുകിക്കയറ്റുകയായിരുന്നു. പ്രതികളെ കണ്ടെത്താന്‍ കഴിയില്ലെന്നും കൃത്യമായ തെളിവുകളില്ലെന്നും കാണിച്ച് കേസ് അവസാനിപ്പിക്കാന്‍ മുന്‍പ് വിജിലന്‍സ് കോടതിയില്‍ സമര്‍പ്പിച്ച റിപ്പോര്‍ട്ട് കോടതി തള്ളിയിരുന്നു. തുടര്‍ന്ന് വിജിലന്‍സ് കോടതി ജഡ്ജി ജി. ഗോപകുമാറിന്റെ ഉത്തരവുപ്രകാരം നടത്തിയ വിശദമായ പുനരന്വേഷണത്തിലാണ് ഞെട്ടിക്കുന്ന വിവരങ്ങള്‍ പുറത്തുവന്നത്.
മുന്‍ വി.സി ഡോ. എം.കെ രാമചന്ദ്രന്‍ നായര്‍, മുന്‍ പി.വി.സി ഡോ. വി. ജയപ്രകാശ്, മുന്‍ രജിസ്ട്രാര്‍ കെ.എ ഹാഷിം, മുന്‍ സിന്‍ഡിക്കേറ്റ് അംഗങ്ങളായ എ.എ റഷീദ്, ബി.എസ് രാജീവ്, കെ.എ ആന്‍ഡ്രൂ, എം.പി റസ്സല്‍ എന്നിവരെയാണ് കുറ്റപത്രത്തില്‍ പ്രധാന പ്രതികളാക്കിയിരിക്കുന്നത്. ഇവരില്‍ ബി.എസ് രാജീവ് മുന്‍പ് മരണപ്പെട്ടിരുന്നു. പരീക്ഷ എഴുതാത്തവരുടെ പേരുകള്‍ തിരുകിക്കയറ്റിയും എഴുത്ത് പരീക്ഷയില്‍ ഉയര്‍ന്ന മാര്‍ക്ക് നേടിയവര്‍ക്ക് അഭിമുഖത്തില്‍ കുറഞ്ഞ മാര്‍ക്ക് മാത്രം നല്‍കി പിന്നോട്ടടിച്ചും നടത്തിയ ക്രമക്കേടുകളാണ് ക്രൈംബ്രാഞ്ച് കണ്ടെത്തിയത്.
ആകെ തയാറാക്കിയ 1,401 പേരുടെ റാങ്ക് പട്ടികയില്‍ നിന്ന് നിയമനം ലഭിച്ച 181 പേരില്‍ ഭൂരിഭാഗവും തിരുവനന്തപുരം ജില്ലക്കാരും ഭരണകക്ഷി നേതാക്കളുടെ പ്രിയപ്പെട്ടവരുമായിരുന്നു.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20261023024413.jpg)
