എയർ ഇന്ത്യ AI 171 വിമാനാപകടം നടന്നിട്ട് ഒരു വർഷം; അന്തിമ അന്വേഷണ റിപ്പോർട്ട് വൈകിയേക്കും

JUNE 11, 2026, 3:53 AM

ന്യൂഡൽഹി: കഴിഞ്ഞ വർഷം അഹമ്മദാബാദിലുണ്ടായ എയർ ഇന്ത്യ AI 171 വിമാനാപകടത്തിന്റെ അന്തിമ അന്വേഷണ റിപ്പോർട്ട് സമർപ്പിക്കുന്നത് നീളാൻ സാധ്യതയുണ്ടെന്ന് സൂചന. വിമാനത്തിന്റെ എൻജിനുകളുമായി ബന്ധപ്പെട്ട ചില നിർണായക പരിശോധനാ ഫലങ്ങൾ കൂടി ലഭിക്കാനുള്ളതിനാലാണ് റിപ്പോർട്ട് വൈകുന്നതെന്ന് റോയിട്ടേഴ്സ് വാർത്താ ഏജൻസി റിപ്പോർട്ട് ചെയ്തു.

അപകടം നടന്ന് ഒരു വർഷം പൂർത്തിയാകുന്ന ഈ സാഹചര്യത്തിൽ, അന്തിമ റിപ്പോർട്ടിന് പകരം അന്വേഷണം വൈകാനുണ്ടായ കാരണങ്ങൾ വ്യക്തമാക്കുന്ന ഒരു 'സ്റ്റാറ്റസ് റിപ്പോർട്ട്' എയർക്രാഫ്റ്റ് ആക്‌സിഡന്റ് ഇൻവെസ്റ്റിഗേഷൻ ബ്യൂറോ (AAIB) ഈ ആഴ്ച പുറത്തുവിട്ടേക്കുമെന്ന് ബ്ലൂംബെർഗും റിപ്പോർട്ട് ചെയ്യുന്നു.

ജിഇ എയറോസ്പേസ് നിർമ്മിതമായ എൻജിനുകളെ കേന്ദ്രീകരിച്ചാണ് നിലവിൽ പ്രധാന അന്വേഷണം പുരോഗമിക്കുന്നത്. കഴിഞ്ഞ വർഷം പുറത്തുവന്ന പ്രാഥമിക റിപ്പോർട്ട് പ്രകാരം, വിമാനം പറന്നുയർന്നതിന് തൊട്ടുപിന്നാലെ ബോയിംഗ് 787 വിമാനത്തിന്റെ എൻജിൻ ഫ്യുവൽ കൺട്രോൾ സ്വിച്ചുകൾ ഒരേസമയം 'റൺ' (RUN) അവസ്ഥയിൽ നിന്ന് 'കട്ടോഫ്' (CUTOFF) അവസ്ഥയിലേക്ക് മാറിയിരുന്നു. ഇത് എൻജിനുകളിലേക്കുള്ള ഇന്ധനമൊഴുക്ക് പൂർണ്ണമായും തടസ്സപ്പെടാൻ കാരണമായി എന്നാണ് കണ്ടെത്തൽ.

എൻജിനുകളുടെ കൂടുതൽ ശാസ്ത്രീയ പരിശോധനകൾക്കായി ഇവ നിലവിൽ അമേരിക്കയിലേക്ക് അയച്ചിരിക്കുകയാണ്. ഈ പരിശോധനകൾ പൂർത്തിയാക്കി അടുത്ത മൂന്ന് മാസത്തിനകം അന്തിമ റിപ്പോർട്ട് സമർപ്പിക്കാൻ സാധിക്കുമെന്നാണ് അന്താരാഷ്ട്ര മാധ്യമങ്ങൾ വ്യക്തമാക്കുന്നത്.

അന്താരാഷ്ട്ര വ്യോമയാന നിയമങ്ങൾ അനുസരിച്ച്, ഒരപകടം നടന്ന് ഒരു വർഷത്തിനകം അന്തിമ അന്വേഷണ റിപ്പോർട്ട് സമർപ്പിക്കേണ്ടതുണ്ട്. എന്നാൽ സങ്കീർണ്ണമായ കേസുകളിൽ അന്വേഷണം നീണ്ടുപോവുകയാണെങ്കിൽ, ഓരോ വാർഷികത്തിലും നിലവിലെ അന്വേഷണ പുരോഗതി വ്യക്തമാക്കുന്ന ഒരു ഇടക്കാല പ്രസ്താവന പുറപ്പെടുവിക്കേണ്ടതുണ്ട്.

ഇതനുസരിച്ചാണ് ഇന്ത്യൻ ഉദ്യോഗസ്ഥർ ഇപ്പോൾ ഇടക്കാല റിപ്പോർട്ട് തയ്യാറാക്കുന്നത്. ഇതിന്റെ ഭാഗമായി ഏപ്രിൽ മാസത്തിൽ എൻജിൻ പരിശോധനകൾ നടത്തുകയും, എൻജിൻ മാനേജ്‌മെന്റ് യൂണിറ്റിന്റെ വിശകലനത്തിനായി കഴിഞ്ഞ മാസം അന്വേഷണസംഘം ഫ്രാൻസ് സന്ദർശിക്കുകയും ചെയ്തിരുന്നു.

വലിയ ദുരന്തം വിതച്ച അപകടം:

കഴിഞ്ഞ 2025 ജൂൺ 12-നാണ് അഹമ്മദാബാദിൽ നിന്ന് ലണ്ടനിലേക്ക് പറന്നുയർന്ന എയർ ഇന്ത്യയുടെ AI 171 വിമാനം നിമിഷങ്ങൾക്കകം തകർന്നു വീണത്. അഹമ്മദാബാദ് വിമാനത്താവളത്തിന് സമീപമുള്ള ബി.ജെ മെഡിക്കൽ കോളേജിന്റെ സ്റ്റുഡന്റ്സ് ഹോസ്റ്റലുകളിലേക്കാണ് വിമാനം പതിച്ചത്.

വിമാനത്തിലുണ്ടായിരുന്ന 242 യാത്രക്കാരിൽ 241 പേരും, കെട്ടിടത്തിലുണ്ടായിരുന്ന 19 പേരും ഉൾപ്പെടെ ആകെ 260 പേരാണ് ദുരന്തത്തിൽ മരണപ്പെട്ടത്. മുൻ ഗുജറാത്ത് മുഖ്യമന്ത്രി വിജയ് രൂപാണിയും ഈ അപകടത്തിൽ മരണപ്പെട്ടവരിൽ ഉൾപ്പെടുന്നു. എന്നാൽ, വിമാനത്തിലുണ്ടായിരുന്ന യാത്രക്കാരിൽ വിശ്വകുമാർ രമേശ് എന്ന ഒരൊറ്റ വ്യക്തി മാത്രമാണ് അത്ഭുതകരമായി ജീവനോടെ അവശിഷ്ടങ്ങൾക്കിടയിൽ നിന്നും രക്ഷപ്പെട്ടത്.