മിന്ത്രയെ ലാഭത്തിലാക്കിയ 'സൂപ്പര്‍ വുമണ്‍' ഇനി സ്വിഗ്ഗിയില്‍: ഇന്‍സ്റ്റമാര്‍ട്ട് സിഇഒയായി നന്ദിത സിന്‍ഹ

JULY 28, 2026, 6:33 AM

ന്യൂഡല്‍ഹി: പ്രമുഖ ഓണ്‍ലൈന്‍ ഡെലിവറി പ്ലാറ്റ്ഫോമായ സ്വിഗ്ഗിയുടെ ക്വിക്ക് കൊമേഴ്സ് വിഭാഗമായ ഇന്‍സ്റ്റമാര്‍ട്ടിന്റെ പുതിയ ചീഫ് എക്സിക്യൂട്ടീവ് ഓഫീസറായി മുന്‍ മിന്ത്ര സിഇഒ നന്ദിത സിന്‍ഹ ചുമതലയേല്‍ക്കുന്നു. ഓഗസ്റ്റ് മൂന്നിന് പുതിയ നിയമനം നിലവില്‍ വരുമെന്ന് കമ്പനി അറിയിച്ചു. ഇ-കൊമേഴ്സ്, ഫാഷന്‍, എഫ്.എം.സി.ജി മേഖലകളില്‍ രണ്ടു പതിറ്റാണ്ടിലേറെ പ്രവര്‍ത്തന പരിചയമുള്ള പ്രമുഖ കണ്‍സ്യൂമര്‍ ഇന്റര്‍നെറ്റ് ലീഡറാണ് നന്ദിത.

മിന്ത്രയെ ഇന്ത്യയിലെ ഏറ്റവും വലിയ ഫാഷന്‍ ഇ-കൊമേഴ്സ് ബ്രാന്‍ഡാക്കി മാറ്റുന്നതില്‍ നന്ദിത സിന്‍ഹ നിര്‍ണായക പങ്കുവഹിച്ചിരുന്നു. 2024 ല്‍ മിന്ത്രയെ സാമ്പത്തികമായി ലാഭത്തിലാക്കാനും വിപണിയിലെ തങ്ങളുടെ സ്വാധീനം വര്‍ധിപ്പിക്കാനും നന്ദിതയുടെ നേതൃത്വത്തില്‍ കമ്പനിക്ക് സാധിച്ചു. മിന്ത്രയ്ക്ക് പുറമേ ഫ്‌ളിപ്കാര്‍ട്ട്, ബ്രിട്ടാനിയ ഇന്‍ഡസ്ട്രീസ്, ഹിന്ദുസ്ഥാന്‍ യുണിലിവര്‍ തുടങ്ങിയ വന്‍കിട കമ്പനികളിലും വിവിധ ഉന്നത നേതൃ സ്ഥാനങ്ങള്‍ വഹിച്ച മികച്ച അനുഭവസമ്പത്തും അവര്‍ക്കുണ്ട്.

ഇന്ത്യയിലെ ക്വിക്ക് കൊമേഴ്സ് രംഗത്ത് കമ്പനികള്‍ തമ്മിലുള്ള മത്സരം കൂടുതല്‍ ശക്തമായിക്കൊണ്ടിരിക്കുന്ന പശ്ചാത്തലത്തിലാണ് ഇന്‍സ്റ്റമാര്‍ട്ടിന്റെ അമരത്തേക്ക് നന്ദിത എത്തുന്നത്. എതിരാളികളില്‍ നിന്നുള്ള വെല്ലുവിളികളെ മറികടന്ന് തങ്ങളുടെ ക്വിക്ക് കൊമേഴ്സ് ശൃംഖലയെ ശക്തിപ്പെടുത്താനാണ് സ്വിഗ്ഗി ലക്ഷ്യമിടുന്നത്. നന്ദിത സിന്‍ഹയുടെ ബിസിനസ്സ് വൈദഗ്ധ്യവും ദീര്‍ഘവീക്ഷണവും ഇന്‍സ്റ്റമാര്‍ട്ടിന്റെ വളര്‍ച്ചയ്ക്ക് പുതിയ വേഗത നല്‍കുമെന്നാണ് വിദഗ്ധരുടെ വിലയിരുത്തല്‍.

ലക്നൗ സ്വദേശിയായ നന്ദിത ഡല്‍ഹി സര്‍വകലാശാലയില്‍ നിന്ന് ബിരുദവും വരാണസിയിലെ ഐഐടിയില്‍ നിന്ന് ബി.ടെക് ബിരുദവും നേടിയിട്ടുണ്ട്. അക്കാദമിക് മികവുള്ള അന്തരീക്ഷമുള്ള കുടുംബത്തില്‍ വളര്‍ന്ന പശ്ചാത്തലമാണ് അവരുടെ കരിയറിലെ വിജയങ്ങള്‍ക്ക് പ്രചോദനമായത്. ഫിസിക്സ് അധ്യാപികയായിരുന്ന അമ്മയാണ് തനിക്ക് മുന്നോട്ട് പോകാനുള്ള പ്രധാന ഊര്‍ജ്ജവും വഴികാട്ടിയുമെന്ന് മുന്‍പൊരു അഭിമുഖത്തില്‍ നന്ദിത പറഞ്ഞിരുന്നു.