ഇൻസ്റ്റഗ്രാം അലർട്ട് എത്തിയത് എട്ട് മിനിറ്റിൽ; യുവാവിന്റെ ജീവൻ രക്ഷിച്ച് പൊലീസ്

JUNE 8, 2026, 10:18 PM

മീററ്റ്: ഇൻസ്റ്റഗ്രാമിൽ പങ്കുവെച്ച ആശങ്കാജനകമായ പോസ്റ്റിനെ തുടർന്ന് മെറ്റ നൽകിയ മുന്നറിയിപ്പിന്റെ അടിസ്ഥാനത്തിൽ അതിവേഗ ഇടപെടൽ നടത്തി 25കാരന്റെ ജീവൻ രക്ഷിച്ച് മീററ്റ് പൊലീസ്. അലർട്ട് ലഭിച്ച് എട്ട് മിനിറ്റിനുള്ളിൽ പൊലീസ് സ്ഥലത്തെത്തി യുവാവിനെ ആശുപത്രിയിലെത്തിച്ചതോടെയാണ് ജീവൻ രക്ഷിക്കാനായത്.

യുവാവ് ഇൻസ്റ്റഗ്രാമിൽ ഒരു വീഡിയോ പങ്കുവെയ്ക്കുകയായിരുന്നു. അതോടൊപ്പം ആശങ്കയുണർത്തുന്ന സന്ദേശവും പോസ്റ്റിലുണ്ടായിരുന്നു. ഇത് ശ്രദ്ധയിൽപ്പെട്ടതിനെ തുടർന്ന് മെറ്റയുടെ സുരക്ഷാ സംവിധാനത്തിലൂടെ ഉത്തർപ്രദേശ് പൊലീസിന്റെ സോഷ്യൽ മീഡിയ സെന്ററിലേക്ക് മുന്നറിയിപ്പ് കൈമാറി.

വൈകിട്ട് 6.53-ഓടെ ലഭിച്ച അലർട്ടിന്റെ അടിസ്ഥാനത്തിൽ പൊലീസ് ആസ്ഥാനം ഉടൻ മീററ്റ് പൊലീസിനെ വിവരം അറിയിച്ചു. ലഭ്യമായ മൊബൈൽ നമ്പറും ലൊക്കേഷൻ വിവരങ്ങളും ഉപയോഗിച്ച് സർധന പൊലീസ് യുവാവിന്റെ വീട്ടിലെത്തി പരിശോധന നടത്തി.

അവിടെ എത്തിയപ്പോൾ യുവാവിന്റെ ആരോഗ്യനില ഗുരുതരമായിരുന്നുവെന്നും സമീപത്ത് സംശയാസ്പദമായ ഒരു ദ്രാവകമുള്ള കുപ്പി കണ്ടെത്തിയതായും പൊലീസ് അറിയിച്ചു. തുടർന്ന് കുടുംബാംഗങ്ങളുടെ സഹായത്തോടെ യുവാവിനെ ആശുപത്രിയിലെത്തിച്ച് അടിയന്തര ചികിത്സ ഉറപ്പാക്കി. ചികിത്സയ്ക്ക് ശേഷം ആരോഗ്യനില മെച്ചപ്പെട്ടതായും അധികൃതർ വ്യക്തമാക്കി.

വ്യക്തിപരമായ ബന്ധത്തിലെ പ്രശ്നങ്ങളെ തുടർന്നുണ്ടായ മാനസിക സമ്മർദമാണ് സംഭവത്തിന് കാരണമായതെന്ന് യുവാവ് പിന്നീട് പൊലീസിനോട് പറഞ്ഞതായി റിപ്പോർട്ടുണ്ട്. തുടർന്ന് യുവാവിനും കുടുംബത്തിനും കൗൺസിലിംഗും ആവശ്യമായ മാർഗനിർദേശങ്ങളും നൽകിയതായി പൊലീസ് അറിയിച്ചു.

2022 മുതൽ മെറ്റയും ഉത്തർപ്രദേശ് പൊലീസും തമ്മിൽ ആത്മഹത്യാ സാധ്യത സൂചിപ്പിക്കുന്ന സാമൂഹിക മാധ്യമ പോസ്റ്റുകൾ സംബന്ധിച്ച വിവരങ്ങൾ കൈമാറുന്ന പ്രത്യേക ഏകോപന സംവിധാനം നിലവിലുണ്ട്. ഈ സംവിധാനത്തിലൂടെ ലഭിച്ച മുന്നറിയിപ്പുകളിൽ ഇടപെട്ട് 2023 ജനുവരി മുതൽ 2026 മെയ് വരെ സംസ്ഥാനത്ത് 3,011 പേരുടെ ജീവൻ രക്ഷിക്കാൻ കഴിഞ്ഞതായി ഉത്തർപ്രദേശ് പൊലീസ് അറിയിച്ചു.