ആൾ താമസമില്ലാത്ത വീട്ടിന് 1.99 കോടി രൂപയുടെ വൈദ്യുതി ബിൽ; പിന്നാലെ കാരണം കണ്ടെത്തി അധികൃതർ

MARCH 9, 2026, 3:24 AM

അമരാവതി: ആന്ധ്രാ പ്രദേശിൽ ആൾ താമസമില്ലാത്ത ഒരു വീട്ടിന് 1.99 കോടി രൂപയുടെ വൈദ്യുതി ബിൽ ലഭിച്ച സംഭവം വലിയ ചർച്ചയാകുന്നു. സമർലക്കോട്ട സ്വദേശിയായ ഉപഭോക്താവിന്റെ പരാതിയെ തുടർന്നാണ് സംഭവം പുറത്തുവന്നത്. പരിശോധനയിൽ വൈദ്യുതി മീറ്ററിലുണ്ടായ സാങ്കേതിക തകരാറാണ് ഇത്രയും വലിയ ബിൽ വരാൻ കാരണമെന്നു കണ്ടെത്തി.

സമർലക്കോട്ടയിലെ ടിഡ്‌കോ കോളനിയിൽ താമസിക്കുന്ന ദാസരി ദുർഗയ്ക്കാണ് ഓൺലൈനായി ബില്ലിന്റെ വിവരം ലഭിച്ചത്. കുടുംബത്തോടൊപ്പം സ്വന്തം ഫ്ലാറ്റിലാണ് ദുർഗ താമസിക്കുന്നത്. ആരും താമസിക്കാത്ത വീട്ടിന് ഇത്രയും വലിയ ബിൽ വന്നതോടെ ദുർഗ മാത്രമല്ല നാട്ടുകാരും അമ്പരന്നു.

തുടർന്ന് ദുർഗ സമീപത്തെ വൈദ്യുതി വകുപ്പ് ഓഫീസിൽ പരാതി നൽകി. പരാതി ലഭിച്ചതിന് പിന്നാലെ ഉദ്യോഗസ്ഥർ സ്ഥലത്തെത്തി പരിശോധന നടത്തി. പുതിയ വൈദ്യുതി മീറ്റർ സ്ഥാപിക്കുന്ന സമയത്ത് ഉണ്ടായ സാങ്കേതിക തകരാറാണ് ബില്ലിന് കാരണമെന്നു അധികൃതർ വ്യക്തമാക്കി.