400 മീറ്റർ യാത്രയ്ക്ക് 18,000 രൂപ; മുംബൈയിൽ വിദേശ യുവതിയോട് അമിത ചാർജ്ജ് ഈടാക്കിയ ഡ്രൈവർ പിടിയിൽ

JANUARY 31, 2026, 12:12 AM

മുംബൈ: വിമാനത്താവളത്തിൽ നിന്ന് പഞ്ചനക്ഷത്ര ഹോട്ടലിലേക്ക് വെറും 400 മീറ്റർ ദൂരം യാത്ര ചെയ്തതിന് 18,000 രൂപ ഈടാക്കി ടാക്സി ഡ്രൈവർ. മുംബൈയിൽ ആണ് ഞെട്ടിക്കുന്ന സംഭവം ഉണ്ടായത്. അമേരിക്കൻ യുവതി സമൂഹമാധ്യമമായ എക്സിൽ പങ്കുവച്ച അനുഭവക്കുറിപ്പാണ് സംഭവം പുറത്തുകൊണ്ടുവന്നത്.

ജനുവരി 12ന് മുംബൈയിലെത്തിയ യുവതിയെ ടാക്സി ഡ്രൈവറും സഹായിയും വിവിധ സ്ഥലങ്ങളിലൂടെ അനാവശ്യമായി ചുറ്റിച്ചറക്കി, ഏകദേശം 20 മിനിറ്റിന് ശേഷം ഹോട്ടലിൽ എത്തിച്ച ശേഷം 18,000 രൂപ വാങ്ങുകയായിരുന്നു. ഇത് ഏകദേശം 200 ഡോളറോളം വരും.

പോസ്റ്റ് വൈറലായതോടെ പൊലീസ് സ്വമേധയാ കേസെടുത്തു. ടാക്സിയുടെ രജിസ്ട്രേഷൻ നമ്പർ അടിസ്ഥാനമാക്കി 50 വയസ്സുള്ള ഡ്രൈവർ ദേവരാജ് യാദവിനെ തിരിച്ചറിഞ്ഞ് അറസ്റ്റ് ചെയ്യുകയും ടാക്സി കസ്റ്റഡിയിൽ എടുക്കുകയും ചെയ്തു.

ഡിസിപി മനീഷ് കൽവാനിയയുടെ നേതൃത്വത്തിൽ നടത്തിയ അന്വേഷണത്തിൽ യുവതി ജനുവരി 12ന് ഹോട്ടലിലെത്തി പിറ്റേന്ന് മടങ്ങിയതായി സ്ഥിരീകരിച്ചു. പരാതി ലഭിച്ചതിന് മൂന്ന് മണിക്കൂറിനുള്ളിലാണ് പ്രതിയെ അറസ്റ്റ് ചെയ്തത്.

അതേസമയം ഇത്തരം സംഭവങ്ങൾ ഉണ്ടായാൽ ഉടൻ 112 എന്ന അടിയന്തര നമ്പറിൽ വിളിച്ച് വിവരം അറിയിക്കണമെന്ന് ഡിസിപി മനീഷ് കൽവാനിയ പൊതുജനങ്ങളോട് അഭ്യർത്ഥിച്ചു.