ട്രെയിൻ മിസ്സാകുമെന്ന് പേടി വേണ്ട; ബോർഡിങ് സ്റ്റേഷൻ മാറ്റാൻ ഇനി എളുപ്പം; റെയിൽവേയുടെ പുതിയ പരിഷ്കാരം ഇങ്ങനെ

APRIL 7, 2026, 3:31 AM

ന്യൂഡൽഹി: റെയിൽവേ സ്റ്റേഷനിൽ കൃത്യസമയത്ത് എത്താൻ വൈകുന്നത് മൂലം ട്രെയിൻ നഷ്ടപ്പെടുമെന്ന ആശങ്കയിലാണോ നിങ്ങൾ? എങ്കിൽ യാത്രക്കാർക്ക് ആശ്വാസമായി പുതിയ പരിഷ്കാരവുമായി ഇന്ത്യൻ റെയിൽവേ.

യാത്ര തുടങ്ങുന്നതിന് തൊട്ടുമുമ്പ് ബോർഡിങ് സ്റ്റേഷൻ മാറ്റാൻ അനുവദിക്കുന്ന നിയമം ഈ മാസം ഒന്നാം തീയതി മുതൽ പ്രാബല്യത്തിൽ വന്നു. ഇതോടെ കൺഫേം ആയ ടിക്കറ്റുകൾ നഷ്ടമാകാതെ തന്നെ യാത്രക്കാർക്ക് സൗകര്യപ്രദമായ അടുത്ത സ്റ്റേഷനിൽ നിന്ന് ട്രെയിനിൽ കയറാൻ സാധിക്കും.

ട്രെയിൻ പുറപ്പെടുന്നതിന് ഒരു മണിക്കൂർ മുമ്പ് തയ്യാറാക്കുന്ന ഫൈനൽ റിസർവേഷൻ ചാർട്ട് പ്രസിദ്ധീകരിക്കുന്നത് വരെയാണ് ബോർഡിങ് സ്റ്റേഷൻ മാറ്റാൻ അവസരമുള്ളത്. കൺഫേം ടിക്കറ്റ് ഉള്ളവർക്കും ആർ.എ.സി (RAC) ടിക്കറ്റുകാർക്കും ഈ സൗകര്യം പ്രയോജനപ്പെടുത്താം.

എന്നാൽ വെയ്റ്റിങ് ലിസ്റ്റിലുള്ളവർക്ക് ഈ സേവനം ലഭ്യമാകില്ല. ഒരു യാത്രയിൽ ഒരു തവണ മാത്രമേ ബോർഡിങ് പോയിന്റിൽ മാറ്റം വരുത്താൻ കഴിയുകയുള്ളൂ എന്നതും ശ്രദ്ധേയമാണ്. ഒരിക്കൽ മാറ്റം അനുവദിച്ചാൽ പിന്നീട് പഴയ സ്റ്റേഷനിലേക്ക് തിരികെ മാറ്റാൻ സാധിക്കില്ല.

ബോർഡിങ് സ്റ്റേഷൻ മാറ്റേണ്ട വിധം:

ഐ.ആർ.സി.ടി.സി (IRCTC) വെബ്സൈറ്റ് വഴിയോ ആപ്പ് വഴിയോ ലളിതമായ ഘട്ടങ്ങളിലൂടെ മാറ്റം വരുത്താം:
മൈ അക്കൗണ്ട് (My Account) സെക്ഷനിൽ പോയി മൈ ട്രാൻസാക്ഷൻ (My Transaction) തിരഞ്ഞെടുക്കുക.
അതിൽ ബുക്ക്ഡ് ടിക്കറ്റ് ഹിസ്റ്ററി (Booked Ticket History) എന്നതിൽ പോയി വേണ്ട ടിക്കറ്റ് സെലക്ട് ചെയ്യുക.
ചെയ്ഞ്ച് ബോർഡിങ് പോയിന്റ് (Change Boarding Point) എന്ന ഓപ്ഷൻ നൽകി പുതിയ സ്റ്റേഷൻ തിരഞ്ഞെടുത്ത് 'ഓക്കെ' നൽകുക.

ഇതിന് പിന്നാലെ സ്ഥിരീകരണ സന്ദേശം (SMS) മൊബൈലിൽ ലഭിക്കും. ഓൺലൈൻ വഴിയല്ലാതെ റെയിൽവേ കൗണ്ടറിൽ നിന്ന് ടിക്കറ്റ് എടുത്തവർക്കും അടുത്തുള്ള പി.ആർ.എസ് (PRS) കൗണ്ടറിലെത്തി ബോർഡിങ് പോയിന്റ് മാറ്റാവുന്നതാണ്.