കോൺസ്റ്റബിളിനെ വീട്ടുജോലിക്ക് ഉപയോഗിച്ചെന്ന് പരാതി; ഐപിഎസ് ഉദ്യോഗസ്ഥന് സസ്‌പെൻഷൻ

JUNE 19, 2026, 4:18 AM

ഭുവനേശ്വർ: പൊലീസ് കോൺസ്റ്റബിളിനെ സ്വകാര്യ വീട്ടുജോലികൾക്കായി ഉപയോഗിച്ചെന്ന ആരോപണത്തെ തുടർന്ന് മുതിർന്ന ഐപിഎസ് ഉദ്യോഗസ്ഥനായ ദയാൽ ഗംഗ്‌വറിനെ ഒഡിഷ സർക്കാർ സസ്‌പെൻഡ് ചെയ്തു. ആരോപണങ്ങളിൽ നടന്ന വകുപ്പുതല അന്വേഷണത്തിൽ പ്രാഥമികമായി വീഴ്ച കണ്ടെത്തിയതിനെ തുടർന്നാണ് നടപടി.

അനുവദനീയമല്ലാത്ത രീതിയിൽ ഒരു കോൺസ്റ്റബിളിനെ വീട്ടുജോലികൾ ചെയ്യാൻ നിർബന്ധിച്ചുവെന്ന ആരോപണം ശരിവെക്കുന്ന വിവരങ്ങൾ അന്വേഷണത്തിൽ ലഭിച്ചതിനെ തുടർന്നാണ് സസ്‌പെൻഷൻ ഉത്തരവ് പുറപ്പെടുവിച്ചതെന്ന് സർക്കാർ വൃത്തങ്ങൾ അറിയിച്ചു. മുഖ്യമന്ത്രി മോഹൻ ചരൺ മാജി സസ്‌പെൻഷൻ ഉത്തരവിൽ ഒപ്പുവച്ചതായും റിപ്പോർട്ടുകളുണ്ട്.

കഴിഞ്ഞ മേയ് മാസത്തിൽ ആൾക്കൂട്ട ആക്രമണത്തിൽ കൊല്ലപ്പെട്ട പൊലീസ് കോൺസ്റ്റബിളായ സൗമ്യ രഞ്ജൻ സെയിൻ ദയാൽ ഗംഗ്‌വറിന്റെ കീഴിൽ ജോലി ചെയ്തിരുന്ന കാലത്ത് ശാരീരികവും മാനസികവുമായി പീഡനങ്ങൾ നേരിട്ടിരുന്നുവെന്നാണ് കുടുംബത്തിന്റെ ആരോപണം.

സൗമ്യയുടെ പിതാവ് പറയുന്നതനുസരിച്ച്, ഔദ്യോഗിക ചുമതലകളുമായി യാതൊരു ബന്ധവുമില്ലാത്ത സ്വകാര്യ ജോലികൾ ചെയ്യാൻ മകനെ നിർബന്ധിച്ചിരുന്നു. കൂടാതെ, ദയാൽ ഗംഗ്‌വറിന്റെ സഹായിയുമായി ബന്ധപ്പെട്ട ഒരു ജിമ്മിൽ പണം നിക്ഷേപിക്കാൻ മകനെ നിർബന്ധിച്ചെന്നും, ആ തുക തിരികെ ലഭിക്കാത്തത് അദ്ദേഹത്തെ കടുത്ത മാനസിക സമ്മർദത്തിലാക്കിയിരുന്നുവെന്നും കുടുംബം ആരോപിക്കുന്നു.

അതേസമയം, സൗമ്യ രഞ്ജൻ സെയിന്റെ മരണവുമായി ബന്ധപ്പെട്ട ആൾക്കൂട്ട ആക്രമണക്കേസിൽ ദയാൽ ഗംഗ്‌വറിന് നേരിട്ട് ബന്ധമില്ലെന്ന് അധികൃതർ വ്യക്തമാക്കിയിട്ടുണ്ട്. ഈ കേസിനെക്കുറിച്ചുള്ള അന്വേഷണം വേറിട്ടാണ് പുരോഗമിക്കുന്നത്.

ദയാൽ ഗംഗ്‌വറിനെതിരായ ആരോപണങ്ങൾ അന്വേഷിക്കാൻ എഡിജിപി റാങ്കിലുള്ള ഉദ്യോഗസ്ഥനെ ചുമതലപ്പെടുത്തിയിരുന്നു. അന്വേഷണ റിപ്പോർട്ടിന്റെ അടിസ്ഥാനത്തിലാണ് നടപടി സ്വീകരിച്ചതെന്നാണ് വിവരം.