പഞ്ചാബില്‍ വീണ്ടും ചോരക്കളം: ആം ആദ്മി പാര്‍ട്ടി സര്‍പഞ്ചിനെ ബൈക്കിലെത്തിയ സംഘം വെടിവെച്ചുകൊന്നു; മൂന്ന് ദിവസത്തിനിടെ മൂന്നാമത്തെ കൊലപാതകം

OCTOBER 6, 2026, 11:07 AM

ചണ്ഡിഗഡ്: നിയമസഭാ തിരഞ്ഞെടുപ്പ് പടിവാതില്‍ക്കല്‍ നില്‍ക്കെ പഞ്ചാബില്‍ വീണ്ടും രാഷ്ട്രീയ കൊലപാതകം. തണ്‍ തരണ്‍ ജില്ലയിലെ ടൂട്ട് ഗ്രാമത്തിലെ ആം ആദ്മി പാര്‍ട്ടി (എഎപി) സര്‍പഞ്ചായ അശ്വനി കുമാര്‍ ബൈക്കിലെത്തിയ അജ്ഞാത അക്രമികളുടെ വെടിയേറ്റ് കൊല്ലപ്പെട്ടു. ആക്രമണത്തില്‍ അദ്ദേഹത്തിന്റെ സഹായി ചാംകൗര്‍ സിംഗിന് ഗുരുതരമായി പരിക്കേറ്റു. കഴിഞ്ഞ മൂന്ന് ദിവസത്തിനിടെ സംസ്ഥാനത്ത് അരങ്ങേറുന്ന മൂന്നാമത്തെ സമാനമായ വെടിവെപ്പാണിത്, ഇതോടെ പഞ്ചാബിലെ ക്രമസമാധാന നില പൂര്‍ണ്ണമായും തകര്‍ന്നെന്ന വിമര്‍ശനം ശക്തമാകുകയാണ്.

ചൊവ്വാഴ്ച പ്രാദേശിക വിപണിയിലേക്ക് തന്റെ കാറില്‍ സഞ്ചരിക്കുമ്പോഴാണ് അശ്വനി കുമാറിന് നേരെ ആക്രമണമുണ്ടായത്. മകനും ഡ്രൈവര്‍ക്കും അക്കൗണ്ടന്റിനുമൊപ്പം യാത്ര ചെയ്യുകയായിരുന്ന അദ്ദേഹത്തിന്റെ വാഹനത്തെ ബൈക്കിലെത്തിയ രണ്ടംഗ സംഘം തടഞ്ഞുനിര്‍ത്തി തുരുതുരെ വെടിയുതിര്‍ക്കുകയായിരുന്നു. നാലഞ്ചു വെടിയുണ്ടകളേറ്റ അശ്വനി കുമാറിനെ ഉടന്‍തന്നെ പാട്ടിയിലെ സ്വകാര്യ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. ഗുരുതരമായി പരിക്കേറ്റ സഹായി ചാംകൗര്‍ സിംഗ് നിലവില്‍ തീവ്രപരിചരണ വിഭാഗത്തില്‍ ചികിത്സയിലാണ്. സംഭവത്തിന് ശേഷം അക്രമികള്‍ ബൈക്കില്‍ രക്ഷപ്പെട്ടു.

ശനിയാഴ്ച ലുധിയാനയിലെ മനേവാള്‍ ഗ്രാമത്തിലെ മുന്‍ സര്‍പഞ്ച് നവ്‌തേജ് സിംഗും സമാനരീതിയില്‍ കൊല്ലപ്പെട്ടിരുന്നു. വീടുകളിലേക്ക് മടങ്ങുകയായിരുന്ന നവ്‌തേജിന്റെ വാഹനം തടഞ്ഞു നിര്‍ത്തി പത്തിലധികം റൗണ്ടുകളാണ് അക്രമികള്‍ വെടിയുതിര്‍ത്തത്. ഈ നടുക്കുന്ന ദൃശ്യങ്ങള്‍ വാഹനത്തിന്റെ ഡാഷ്‌ക്യാമില്‍ കൃത്യമായി പതിഞ്ഞിരുന്നു. അതേദിവസം തന്നെ അമൃത്സറില്‍ വെച്ച് പ്രശസ്ത പഞ്ചാബി സോഷ്യല്‍ മീഡിയ ഇന്‍ഫ്‌ലുവന്‍സറും മേക്കപ്പ് ആര്‍ട്ടിസ്റ്റുമായ മാഡ് സന്ധു എന്ന മധുസൂദനും ബൈക്കിലെത്തിയവരുടെ വെടിയേറ്റ് കൊല്ലപ്പെട്ടു. LGBTQ+ സമൂഹത്തിന്റെ അവകാശങ്ങള്‍ക്കായി സംസാരിച്ചിരുന്ന സന്ധുവിന്റെ കൊലപാതകത്തിന്റെ ഉത്തരവാദിത്തം ഒരു പ്രാദേശിക ഗുണ്ടാസംഘം ഏറ്റെടുത്തിരുന്നു.

തുടര്‍ച്ചയായുണ്ടാകുന്ന ഈ ദാരുണ സംഭവങ്ങള്‍ സംസ്ഥാന സര്‍ക്കാരിന്റെ സുരക്ഷാ വീഴ്ചയെയും പോലീസിന്റെ നിഷ്‌ക്രിയത്വത്തെയും തുറന്നുകാട്ടുന്നു. സംഭവസ്ഥലങ്ങളില്‍ ഫോറന്‍സിക് സംഘങ്ങള്‍ പരിശോധന നടത്തി തെളിവുകള്‍ ശേഖരിച്ചിട്ടുണ്ട്. അക്രമികളെ കണ്ടെത്തുന്നതിനും കൊലപാതകങ്ങള്‍ക്ക് പിന്നിലെ ഗൂഢാലോചന പുറത്തുകൊണ്ടുവരുന്നതിനുമായി പ്രത്യേക അന്വേഷണ സംഘങ്ങള്‍ രൂപീകരിച്ച് പോലീസ് തിരച്ചില്‍ ഊര്‍ജിതമാക്കി.