ഹോര്‍മുസ് കടലിടുക്കില്‍ കുടുങ്ങിക്കിടക്കുന്ന കപ്പലുകള്‍ക്ക് യു.എസ് വഴികാട്ടിയാകും; നിര്‍ണയക ഇടപെടലുമായി ട്രംപ്

MAY 3, 2026, 7:39 PM

ദുബായ്: ഹോര്‍മുസ് കടലിടുക്കില്‍ കുടുങ്ങിക്കിടക്കുന്ന കപ്പലുകള്‍ക്ക് വഴികാട്ടാന്‍ തിങ്കളാഴ്ച മുതല്‍ യുഎസ് സഹായിക്കുമെന്ന് യു.എസ് പ്രസിഡന്റ് ഡൊണാള്‍ഡ് ട്രംപ്. ഹോര്‍മുസ് കടലിടുക്കിലെസംഘര്‍ഷാവസ്ഥയുമായി ബന്ധപ്പെട്ടുള്ള സുപ്രധാന നീക്കമാണിത്. ലോകത്തിലെ ഏറ്റവും പ്രധാനപ്പെട്ട എണ്ണക്കടത്തു പാതകളില്‍ ഒന്നാണ് ഹോര്‍മുസ് കടലിടുക്ക്. ഈ മേഖലയില്‍ ഇറാനും പാശ്ചാത്യ രാജ്യങ്ങളും തമ്മിലുള്ള തര്‍ക്കം വര്‍ദ്ധിച്ച സാഹചര്യത്തിലാണ് അമേരിക്കയുടെ ഇടപെടല്‍.

നൂറുകണക്കിന് കപ്പലുകളെയും ഏകദേശം 20,000 നാവികരെയും സഹായിക്കുന്നതിനുള്ള ഒരു വലിയ ശ്രമത്തെക്കുറിച്ചാണ് ട്രംപ് വിശദീകരിച്ചത്. നിഷ്പക്ഷരും നിരപരാധികളുമായ രാജ്യങ്ങളെ ഇറാന്‍ യുദ്ധം ബാധിച്ചിട്ടുണ്ടെന്നും ഈ രാജ്യങ്ങള്‍ക്ക് സ്വതന്ത്രമായും കാര്യക്ഷമമായും അവരുടെ ബിസിനസ്സ് തുടരാന്‍ കഴിയുന്ന തരത്തില്‍ അവരുടെ കപ്പലുകളെ ഈ നിയന്ത്രിത ജലപാതകളില്‍ നിന്ന് സുരക്ഷിതമായി പുറത്തുകൊണ്ടുവരുമെന്ന് തങ്ങള്‍ ഈ രാജ്യങ്ങളോട് പറഞ്ഞിട്ടുണ്ടെന്നും ട്രംപ് ഞായറാഴ്ച ഒരു സോഷ്യല്‍ മീഡിയ പോസ്റ്റില്‍ പറഞ്ഞു.

അമേരിക്കയുടെ നേതൃത്വത്തിലുള്ള ഈ നീക്കം പ്രധാനമായും ലക്ഷ്യമിടുന്നത് സുരക്ഷിത പാത ഒരുക്കുക എന്നതാണ്. അന്താരാഷ്ട്ര കപ്പലുകള്‍ക്ക് ഇറാന്‍ സൈന്യത്തിന്റെ ഭാഗത്തുനിന്ന് ഭീഷണിയില്ലാതെ സഞ്ചരിക്കാന്‍ സംരക്ഷണം നല്‍കുക. ആഗോള വിപണിയിലേക്കുള്ള എണ്ണ വിതരണം തടസ്സപ്പെടാതിരിക്കാന്‍ ഈ പാതയുടെ സുരക്ഷ ഉറപ്പാക്കേണ്ടത് അത്യാവശ്യമാണ്. കൂടാതെ മേഖലയില്‍ കൂടുതല്‍ യുദ്ധക്കപ്പലുകളും നിരീക്ഷണ സംവിധാനങ്ങളും ഏര്‍പ്പെടുത്തിക്കൊണ്ട് ഇറാന് മേല്‍ സമ്മര്‍ദ്ദം ചെലുത്തുക എന്നിവയും ഇതില്‍ ഉള്‍പ്പെടുന്നു.

അമേരിക്കയുടെ ഈ നീക്കത്തെ ഇറാന്‍ ശക്തമായി എതിര്‍ക്കുന്നുണ്ട്. വിദേശ ശക്തികളുടെ സാന്നിധ്യം മേഖലയില്‍ കൂടുതല്‍ അശാന്തി പടര്‍ത്തുമെന്നാണ് അവരുടെ വാദം. അതേസമയം, പല പ്രമുഖ വ്യാപാര രാജ്യങ്ങളും തങ്ങളുടെ കപ്പലുകളുടെ സുരക്ഷയില്‍ ആശങ്ക പ്രകടിപ്പിക്കുകയും അമേരിക്കയുടെ സഹായം തേടുകയും ചെയ്തിട്ടുണ്ട്. അന്താരാഷ്ട്ര രാഷ്ട്രീയത്തിലെ ഈ നീക്കങ്ങള്‍ ആഗോള വിപണിയില്‍ എണ്ണവില വര്‍ദ്ധിക്കുന്നതിനും പുതിയ നയതന്ത്ര ചര്‍ച്ചകള്‍ക്കും വഴിതെളിച്ചേക്കാം.