ഹെബ്രോണ്‍: മിലിട്ടറി ചെക്ക്‌പോസ്റ്റിന് നേരെയുണ്ടായ വെടിവെപ്പില്‍ രണ്ട് ഇസ്രായേലി സൈനികര്‍ കൊല്ലപ്പെടുകയും മൂന്ന് പേര്‍ക്ക് പരിക്കേല്‍ക്കുകയും ചെയ്തതിന് പിന്നാലെ ഓക്യുപൈഡ് വെസ്റ്റ് ബാങ്കിലെ ഹെബ്രോണ്‍ നഗരത്തില്‍ വ്യാപക ഒഴിപ്പിക്കലുമായി ഇസ്രായേല്‍ പ്രതിരോധ സേന. വെള്ളിയാഴ്ച രാവിലെ രണ്ട് പാലസ്തീന്‍ തോക്കുധാരികള്‍ സൈനിക ചെക്ക്‌പോസ്റ്റിലേക്ക് വെടിയുതിര്‍ക്കുകയായിരുന്നു. തുടര്‍ന്ന് ഇരുവിഭാഗങ്ങളും തമ്മില്‍ 20 മിനിറ്റോളം നീണ്ട ശക്തമായ ഏറ്റുമുട്ടലുണ്ടായി.
സംഭവസ്ഥലത്തുവെച്ച് തന്നെ രണ്ട് ആക്രമണകാരികളെയും സൈന്യം വെടിവെച്ചുകൊന്നു. ഇവര്‍ സഞ്ചരിച്ചിരുന്ന വാഹനത്തില്‍ നിന്നും വലിയ അളവില്‍ ആയുധങ്ങളും വെടിയുണ്ടകളും കണ്ടെടുത്തതായും, ഇതിലൂടെ വലിയൊരു ആക്രമണ പദ്ധതിയാണ് സൈന്യം തടഞ്ഞതെന്നും ഐ.ഡി.എഫ് ചീഫ് ഓഫ് സ്റ്റാഫ് ലെഫ്റ്റനന്റ് ജനറല്‍ ഇയാല്‍ സമീര്‍ പറഞ്ഞു. ആക്രമണത്തെ ഹമാസ് പ്രശംസിച്ചെങ്കിലും ഉത്തരവാദിത്തം ഏറ്റെടുത്തിട്ടില്ല. സംഭവത്തെ തുടര്‍ന്ന് വെസ്റ്റ് ബാങ്കില്‍ പൂര്‍ണ്ണ ഉപരോധം ഏര്‍പ്പെടുത്തുമെന്ന് ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹു ആദ്യം പ്രഖ്യാപിച്ചെങ്കിലും, പിന്നീട് ഹെബ്രോണ്‍, ഹല്‍ഹൂല്‍ നഗരങ്ങളെ കേന്ദ്രീകരിച്ച് സുരക്ഷാ വലയം ശക്തമാക്കാന്‍ ഉത്തരവിടുകയായിരുന്നു.
ഭീകരവിരുദ്ധ പ്രവര്‍ത്തനങ്ങളുടെ ഭാഗമായി പ്രദേശത്തെ കെട്ടിടങ്ങള്‍ ഒഴിപ്പിക്കാനും ഭീഷണി ഉയര്‍ത്തുന്ന നിര്‍മാണങ്ങള്‍ പൊളിച്ചുനീക്കാനും അദ്ദേഹം നിര്‍ദ്ദേശം നല്‍കി. ജനിന്‍, തുല്‍കര്‍ം അഭയാര്‍ത്ഥി ക്യാമ്പുകളില്‍ നേരത്തെ നടപ്പിലാക്കിയ മാതൃകയിലാണ് ഹെബ്രോണിലും നടപടികള്‍ തുടരുന്നത്.
വെള്ളിയാഴ്ച ഉച്ചയോടെ ഹെബ്രോണിലെ ഫര്‍ഷ് അല്‍-ഹവ പ്രദേശത്ത് ഇസ്രായേല്‍ ബുള്‍ഡോസറുകള്‍ക്കൊണ്ട് കെട്ടിടങ്ങള്‍ പൊളിച്ചുതുടങ്ങി. താമസക്കാര്‍ക്ക് ഒഴിഞ്ഞുപോകാന്‍ സൈന്യം സമയം നല്‍കിയിരുന്നു. നിലവില്‍ പ്രദേശവാസികള്‍ക്ക് പുറത്തുകടക്കാന്‍ പ്രത്യേക പരിശോധനാ കേന്ദ്രങ്ങള്‍ ഏര്‍പ്പെടുത്തിയിട്ടുണ്ട്. ഇസ്രായേലില്‍ പൊതുതിരഞ്ഞെടുപ്പിന് ദിവസങ്ങള്‍ മാത്രം ബാക്കിനില്‍ക്കെയാണ് സുരക്ഷാ ആശങ്കകള്‍ വര്‍ധിപ്പിക്കുന്ന ഈ സംഭവം നടന്നത്. നിലവിലെ രാഷ്ട്രീയ സാഹചര്യത്തില്‍ ശക്തമായ സുരക്ഷാ നിലപാടുകളിലൂടെ അധികാരം നിലനിര്‍ത്താന്‍ ശ്രമിക്കുന്ന നെതന്യാഹുവിന് ഈ സംഭവം വലിയ രാഷ്ട്രീയ പരീക്ഷണമായി മാറിയിട്ടുണ്ട്.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
1-20261021100141.jpg)
