ഇറാന്റെ സാമ്പത്തിക നട്ടെല്ല് തകർത്ത് അമേരിക്കയും ഇസ്രായേലും; ഖാർഗ് ദ്വീപിൽ ശക്തമായ മിസൈൽ ആക്രമണം

APRIL 7, 2026, 7:12 AM

ടെഹ്‌റാൻ: പശ്ചിമേഷ്യയിലെ യുദ്ധസാഹചര്യം അതീവ ഗുരുതരമാക്കി ഇറാന്റെ ഏറ്റവും പ്രധാനപ്പെട്ട സാമ്പത്തിക കേന്ദ്രമായ ഖാർഗ് ദ്വീപിന് (Kharg Island) നേരെ അമേരിക്കയുടെയും ഇസ്രായേലിന്റെയും സംയുക്ത മിസൈൽ ആക്രമണം.

പ്രസിഡന്റ് ഡൊണാൾഡ് ട്രംപ് നൽകിയ സമയപരിധി അവസാനിക്കുന്നതിന് തൊട്ടുമുമ്പാണ് ഇറാന്റെ ക്രൂഡ് ഓയിൽ കയറ്റുമതിയുടെ 90 ശതമാനവും കൈകാര്യം ചെയ്യുന്ന ഈ നിർണ്ണായക മേഖല ലക്ഷ്യമിട്ട് ആക്രമണം നടന്നത്.

ഇറാന്റെ സൈനിക നിയന്ത്രണ സംവിധാനങ്ങളെയും സാമ്പത്തിക സ്രോതസ്സുകളെയും തകർക്കുക എന്ന ലക്ഷ്യത്തോടെയാണ് നീക്കമെന്ന് ഇസ്രായേൽ പ്രതിരോധ സേന (IDF) വ്യക്തമാക്കി.

ഖാർഗ് ദ്വീപിന് പുറമെ രാജ്യത്തെ പ്രധാന ഗതാഗത മാർഗ്ഗങ്ങളായ പേർഷ്യൻ ഗൾഫ് പാലം, ഉറുമിയ തടാകത്തിലെ പാലം എന്നിവയും നിലവിൽ ആക്രമണ ഭീഷണിയിലാണ്. ഇറാന്റെ തന്ത്രപ്രധാനമായ ആസ്തികളും ചരക്കുനീക്ക പാതകളും തകർക്കാനുള്ള ആസൂത്രിത ശ്രമമാണ് ഇപ്പോൾ നടക്കുന്നത്.

ഇറാന്റെ സാമ്പത്തിക നിലനിൽപ്പിനെ തന്നെ ബാധിക്കുന്ന ഈ നീക്കം മേഖലയിലെ വ്യാപാര ഇടനാഴികളെയും നഗരങ്ങളിലെ ജനജീവിതത്തെയും നിശ്ചലമാക്കുമെന്നാണ് വിലയിരുത്തപ്പെടുന്നത്. വരും മണിക്കൂറുകളിൽ കൂടുതൽ ആക്രമണങ്ങൾ ഉണ്ടായേക്കുമെന്ന സൂചനയെത്തുടർന്ന് ലോകം വലിയ ആശങ്കയോടെയാണ് ഈ സംഭവവികാസങ്ങളെ നോക്കിക്കാണുന്നത്.